Filemón 1

1

¹Nuti Pablo tapresu­cha­que­nenuhi eta néhisirahi ema Jesucristo, puiti nucachane ema Timoteo eta vicaju­re­ravihi eta carta piti Filemón, vichamu­rivihi vémuna­ru­vi­quenehi tayehe eta vémata­ne­re­pianahi.

²Vémecha­ji­si­havare namutu ena vichamu­rianahi tiúruji­ca­va­ra­hianahi te pipena. Péchaji­si­na­ha­vivare esu vichamuri Apia, émapa ema Arquipo, vicompa­ñe­ro­quenehi muraca tayehe eta vémata­ne­re­pianahi.

³Nuvaraha macata­ji­ca­hehini ichape ema Tata Vicaiyaquene, émapa ema Viáquenu Jesucristo. Náijara­ca­hehini táurivaina eta epane­reruana.

⁴Néchavi­paraca te nuyuja­ra­sirana, nuhasu­lu­pa­yachahi ema Viya.

⁵Taicha nusamai­ri­ricahi eta pímiya­ni­rávahi pémunaca ema Viáquenu Jesús, péhicahi yátupi. Pémuna­ca­hivare namutu ena machanerana ema Viya.

⁶Nuyaseu­cha­vacahi me Viya nayehe namutu ena téhica­via­na­paipahi táichavenehi eta náimairahi eta pisuapirahi yátupi. Nuvaraha nácaicu­tia­ra­que­nénaini muraca tamutu eta táuriqueneana máijara­ru­ha­vianahi ema Cristo Jesús.

⁷Ichape­rinehi eta núrisa­mu­revahi picha piti nuparape. Tijara­hinehi picha te nusamure eta nusamai­ri­rí­sirahí eta pímiya­ni­ravahi pémuna­cavaca yátupi ena vichamuriana, étapa eta picuri­sa­mu­re­chi­ra­vacahi ichape éna.

⁸Tiuri puiti, nuvaraha néchajiucha ema Onésimo. Picata­jicanu piperdo­na­chinanu éma. Núti yátupi­que­nenuhi mayehenuhi apóstole ema Cristo. Titupa­ra­ca­nu­hinéni nuvane­ca­vihini. Étasera eta vémuna­si­ra­cacahi, nuyaseacavi nuti paure ichavica, nucaera­ta­quenehi puiti máichavenehi ema Cristo. Puiti éma, nuchichahi némuna­ru­quenehi te juca cárcel taicha éma téhica­ha­viripa eta visuapirahi ema Jesús.

¹¹Ema maca Onésimo, cape juca másine­quenehi, vahi máitaurahini eta picamu­su­rairahi. Tijuna­hivare. Púitisera éma, ichape­rinehi eta máitáti­ranuhi. Eta máitáti­ranuhi núti tacutiyare eta máitáti­ra­vi­yareva píti apana.

¹²Puiti névata­cayare éma eta ara piyehe. Picata­jicanu pijaca­pi­na­nuyare táimicu­ti­ji­ricava nútina­yarehi níteca­pauchavi piyehe.

¹³Nuvara­ha­hineni mánasihini eta ani nuyehe. Émainahini pítsivai­nahini eta pivarairahi píteca pítátinuya eta návihairahi te juca cárcel táichavenehi eta nucame­ta­rai­ruirahi eta máechaji­ri­ruvana ema Viya.

¹⁴Nuvara­ha­hineni níminasicha éma, nucucha­pa­hisera tájahapuca picaye­mayare píti. Váhisera nuvaraha nupamicavi eta juca picata­ji­si­ranuya, nucucha­payare eta pijica­pi­ra­nuyare. Nuvaraha étachucha tásiha­que­ne­yarehi eta táurivaina eta pipanereru.

¹⁵Táitaure­vaquene tijuni­ji­cavihi ánipi ema Onésimo. Émari­chu­se­rapuca jácani ema Viya tásihahi máisapahi eta macahe­yarehi ema Onésimo. Puítisera tétupi­ri­cavapa éma. Máraja­painapa tichavayare eta ara piyehe, apaja­ra­hinapa eta máitáti­raviya.

¹⁶Váipa tácutimahi cape juca másine­quenehi. Puiti pímahainapa eta máurivayare macamu­nu­ca­re­vayare eta piyehe, taicha váchupa puiti vichamu­ripahi éma te mavahuana ema Viáquenu. Núti, ichape eta némuna­sirahi ema maca. Énénapa picaheyare píti apanava, tiápaju­ca­vai­napaipa eta pémuna­siraya ema maca.

¹⁷Te yátupina pémunacanu eta nuchamu­ri­vírahi, pijaca­pi­na­nuyare éma táimicu­ti­ji­ricava nútina­yarehi pijacapa.

¹⁸Te tatiari­hi­napuca eta máejeca­pi­ravahi piyehe, ticante­ve­hipuca, nútinarine picobracha.

¹⁹Nuvacha­cha­viyare núti. Nuti Pablo, nútiquenehi nájuchahi eta nufirma­chirahi puiti eta nuvacha­chi­ra­viyare. Nuvara­ha­hinéni némechavi píti apana eta pintevehi nuyehe eta nucatiu­chi­ravihi.

²⁰Tiuri, nuparape, picata­ji­ca­nuchaha eta juca nuyasea­ruvihi táichavenehi eta nucacha­mu­ri­virahi mayehe ema Viáquenu. Picuri­sa­mu­ré­chanuya.

²¹Németeaca vahi táeñama­vacare eta juca pisuapi­ra­nuyare. Eta tacahe, nucaju­revihi puiti. Taicha néchahivare eta vahi tácari­chuimahi pítauchaya eta juca nuyasea­ru­vianahi. Tatiari­hiyare jácani apanayare píjara­ru­va­nayare píti tásiha­que­neyare te pisamure.

²²Éneri­chuvare nuvaraha pétupi­ri­si­nanuya eta níteca­pihaya. Étanecha nucuchapahi eta tasama­ca­revaina eta eyuja­ra­casana me Viya eta nítuji­si­ravaina níteca­pauchahe.

²³Téchajicavi ema Epafras, ema nucompa­ñerohi te juca cárcel, tapresu­cha­que­ne­hivare ema apana eta véhisirahi ema Jesucristo.

²⁴Éneri­chuvare téchaji­caheana ena apamuriana vicompa­ñe­roanahi tayehe eta vémata­ne­re­pianahi: ema Marcos, ema Aristarco, ema Demas, émapa ema Lucas.

²⁵Nuyaseu­cha­paraca ema Viáquenu Jesucristo táetaviu­chahíni eta iúrica­ca­revaya máicha. Tamu­ tupa.