1Lau Paulo, Keriso Iesu dainai abi-mauri tauna, varavarada Timoteo ida, raruosi ese emai lalokau Filemona, ai ida ta ḡaukara heboumu taumu, a tore henimumu.
2Oi bona taihumai Apia, bona bamomai Arekipo, ia ida a tuari heboumu, bona ekalesia oreana emu ruma ai e heboumu, a tore henimuimu, a tomu:
3Harihari-bada bona maino, Tamada Dirava ena amo bona Lohiabada Iesu Keriso ena amo, bavabi.
4Na ḡuriḡurimu negadia iboudiai oi na lalomumu, bona Dirava na hanamoamu;
5badina be na kamonaimu oi ese Lohiabada Iesu o lalokau heniamu bona o abidadama heniamu, helaḡa taudia danu o lalokau henidiamu bona o abidadama henidiamu.
6Taunabunai egu ḡuriḡuri be oiemu abidadama huahuana baine dobi idia ediai, Keriso lalonai ita edai e miamu ḡaudia namodia iboudiai bae diba.
7Una dainai, tadigu e, name moale bada bona taugu danu eme lo, emu lalokau dainai, badina be helaḡa taudia lalodia vada o hakeru.
8Taunabunai, Keriso ladana ai bama haḡanimu diba, ede boma kara toma,
9to lalokau dainai asina haḡanimumu, na noimumu hari. Oibe, lau Paulo, tau badana bona Keriso Iesu ena abi mauri tauna,
10na nounumu natugu Onesimo, iḡui ai na nohomu ai tamana ai na hahelao merona, dainai.
11Gunaguna ena hesiai ilao-henina na dika oiemu ai, a harihari ena hesiai ilao-henina na namo, oiemu ai bona lauegu ai.
12Na siaia loumu, be vasimu, bona lalogu idoinai danu ia ida.
13Bena egu ura be bama dogoa tao, sivarai namo ena iḡui ai isiaigu bema lao heni, oi ibolomu.
14To asina uramu kara ta baina karaia, oi do so gwau maoro negana ai; egu ura be emu kara namo na dia lauegu hahedua dainai a oiemu ura dainai bema vara.
15Badina bunai, readia, una nega sina oiemu amo e heabi oho, bavabia hanaihanai helaoreana:
16dia hesiai tauna, a hesiai e hereaiamu tauna, varavara bona lalokau, lauegu bona oiemu, tau-anina ai bona Lohiabada lalonai.
17Lau be oi turamu o tomamu; benaini, ia bavabia dae, lau boma abigu dae heḡereḡerena.
18A ia ese e hadikamu eiava emu ai e abi torehai readia: benaini, ena abi-torehai egu ai ba gwauraia.
19Lau Paulo sibogu imagu ai na toreamu: davana idoinai do baina henimu. Asina tomu oi ese laumamu egu ai o abia doa;
20ḡau tamona, tadigu e, mani ba hamoalegu Lohiabada lalonai, lalogu ba hakerua Keriso lalonai.
21Lalogu na e tomamu ba kamonai henigu dainai na tore henimumu; dibagu na gwauraimu karadia ba hereadia.
22Vadivadi daiutuna ta bavabia heḡaeḡae lauegu; badina be name helaro emu ḡuriḡuri daidiai egu vasi dalana baine helailai.
23Bamogu Epafra, Keriso Iesu dainai lau ida iḡui ai a nohomu, ese e hahenamo henimumu.
24Mareko bona Aristako bona Dema bona Luka, lau ida a ḡaukara heboumu, ese danu e hahenamo henimumu.
25Lohiabada Iesu Keriso ena harihari-bada laumamu ai baine mia.
