1Uta Pauro. Ikia Piremo bo piwatahaka. Sesus Kiristu soho iktsasoko ana humo hi kytsa siakyriukrẽnikitsa hurukwy bo zikoktyhyryknaha. Mytuky Timoteo katuk mykara. Ata kino katuk papeu humo piwatahaka.
2Katsaktsa Sesus tuktsa bo papeu humo tawatahaka. Asahi awahoro bo inauzuzuknaha. Myzawy Apia bo piwatahaka. Arakipus kino niwatihi atakta sodadu wata atahi mytuk Sesus tsyhyryze tarabajaziu mynakara. Sesus tuktsa awahoro bo mynakypyknahaze papeu ty sibo tsipinyny. Ikia mytuk Sesus tsyhyryze tarabajaziu tsimykara. Katsaktsa ikia humo mymypokzitsirẽtsa.
3Ahatsyhyryze Deus bo mopamykysoko. Sesus Kiristu mypehatsa bo niwatihi mopamykysoko. Ispe mynakara: — O Deus myzo Piremo bo tsisapywyky. Sesus tuktsa iwahoro bo inazuzuknahaze tysisapywyky. Tysipokzitsikikta! Ba paikpa mytsaty tynakaranaha. Ikia humo sakurẽtsa moziknaha — mykara.
4O kaharereziuwytsa Piremo. Kytsa tihi: — O Piremo mypehakatsa Sesus humo tispirikporẽta hỹ. Atakta Sesus tuktsa humo tsimypokzitsiukrẽta — mykaranaha. Ana iwabyze Deus bo asoho mopamykysoko: — O Deus myzo Piremo humo kakurẽta mykara. Tsipisapywyky Piremo bo ustsa Sesus tuktsa bo niwatihi — my.
6Katsaktsa ikiahatsa tuk Sesus humo myspirikporẽtsa. Myspirikporẽtsa babatsa zeka hawa Sesus tazo bo mymyoktyhyryk naha humo tanymyrytohinaha. Sesus humo mykurẽtsa babatsa tsipinymyrykynaha.
7O kaharereziuwy ahumo kamypokzitsiarẽta. Ikia Deus hyrytsa humo tsamypokzitsiukrẽta ana iwabyze kakurẽta. Iwatahi ikia humo kapunihikrẽta mozik. Ikia kytsa ba ziksimyiwy ustsa Sesus tuktsa nisiakusukni.
8Iwaze katsaktsa Sesus tuktsa humo mymypokzitsiukrẽtsa. Hawa tykta tsimyzeka ba zapeha. Sesus Kiristu humo aziky wata ikia bo zuba motsaso.
9Katsa tsimyharape pokzitsikinaha. Kaharere bo yhỹ tsimykara ikia kino tsimyzihikik. Iwa abo motsasoko. Taparakta ypykyhy Sesus Kiristu wasania ty iktsasoikik ana humo hi kytsa siakyriukrẽnikitsa hurukwy bo zikoktyhyryknaha.
10Abaka Onesimu soho motsaso. Utakta siakyriukrẽnikitsa hurukwy eze tuze atahi Sesus humo tispirikporẽta. Kaharere bo Sesus soho humo hyỹ nikaraze iwaze Sesus humo tispirikporẽta niyzik. Iwatahi katse wata niyzik. Ihumo kamypokzitsiarẽta. Ikia tsipiktsumuẽhĩ naha humo hi mozihikik.
11Taparaka atakta asohometuwy. Aharere bo batu yhỹ ziknakara. Abaka atakta Sesus humo mektatu niyzik. Kaokzeka tsimysapyrẽta patsumuẽhĩ. Botu ziktsumuẽhĩkĩ. Ata hi tsimysapyrẽta iwatahi mymytsumuẽhĩ.
12Onesimu humo kamypokzitsiarẽta. Iwatatu abo piserezo.
13Siakyriukrẽnikitsa hurukwy eze Sesus soho wasania ty iktsasoko naha humo, atakta katuk natasapy tsihikik, iwaze piktsumuẽhĩ. Atahi asapyzeky mozik.
14Aharere piwaby tsihikik. Ibete yhỹ tsimyzeka uta kino niwatihi hyỹ my. Ba zapehariziubyi.
15Atakta nokponi niukuru. Taparaka atuk batu are. Tozeka ja inaparak iwaze myziksizoze atuk tawahi mynapykyryk.
16Taparaka atuk tarabajaziu ziknakara batu okyrysaro ty ibo nyny tsiky. Ipehakatsa tsikyzik. Abaka atsy hi Sesus humo tispirikporẽta. Ihumo kamypokzitsiarẽta. Ikia kino ihumo tsamypokzitsiarẽta babata atsyhyryze tarabaja mykara. Atsy wata Sesus humo tispirikporẽta. Iwatahi ihumo tsimypokzitsiarẽta.
17Ikia hi: — O Pauro katukta. Sesus harere humo harapetok tarabaja tsimykaranaha — tsimykara. Uta awahoro bo my zeka kape: — Pakutyny — tsimy. Onesimu bo ka wa tsimy my.
18Taparaka abo imysapybyita tu nikara. Anamy ziakse zeka zamyi. Amy ziakse zeka papeu humo tsipiwataha. Anatyhi itsyhyryze pisirezo.
19Abaka katsyhyryty piwatahaka: — Uta Pauro abo pisirezo. Amy ty Onesimu ziakse zeka ana kino uta pisirezo — my. Ikia Sesus humo tsaspirikporẽta kaharere humo. Deus tuk awahi tsimynapykyryk. Deus wasania ty tyso byizeka batu aspirikpo. Anahi kabo tsipisirezo wata anasoho bo mytsatyziutykta!
20Iwaze katsaktsa Sesus humo myspirikporẽtsa ikia Onesimu humo tsimypokzitsiukrẽta! Katsy my. Awahoro bo pomoze: — O pakutynykta — iwa tsimyzeka kakurẽta mozik.
21Botu iktsaso: — O Onesimu katsy humo tsimypokzitsiukrẽta — my. Ikia kaharere bo hyỹ tsimykara kahyrinymyrẽta. Hawa Onesimu tsyhyryze myzapykyky wasani isopyk. Iwa piwatahakaze ta botu mytsaty mykara.
22Iwaze kawanu sapy tsikymynahaktsa! Hawa ikiahatsa katsyhyryze Deus bo tsimypamykysokonaha utakta iharere piperyky. Amy ty ibo tsizapykykynaha anahi Deus ahabo yhỹ my. Kytsa tihi: — Tsipiksi za — maha hi piperyky.
23Epaparas ikiahatsa humo tsihyrizikbarẽta. Atakta katuk siakyriukrẽnikitsa hurukwy eze tu. Atahi Sesus soho nitsasoko iwatahi kytsa siakyriukrẽnikitsa hurukwy bo zioktyhyryknaha.
24Katuktsa Marakos, Aristarakus, Demas, Rukas iwatsa ahahumo sihyrizikbarẽtsa mykaranaha.
25Deus bo ahatsyhyryze mopamykysoko: — O Deus myzo Sesus Kiristu ikia tysisapywyky. Siwahi tsimynapykyryk — my. Iwa Deus bo mynapamykysoko. De. Niwazuba. Pauro niy
