Filemon 1

1

¹O wölböt alani aka neŋakni Filemon! Pol nöŋön Jisös Kraistkö nupŋi memakzalaŋgöra aka gwaröhöm niŋgigetka kösö mire tatzal. Urumeleŋ alani Timoti yaŋön nömbuk tariga nöŋön göbuk keu eraum mötpitköra kimbi ki ohozal.

²Mewöyök ambi ketaŋi urumeleŋ nenini Apia aka Arkipus urumeleŋgö bimqeqe azinini aka urumeleŋ könagesö göhö mire tokomakzei, nöŋön kimbi ki eŋgöra ohozal.

³Anutu Iwinini aka Kembu Jisös Kraist yetkön kalem möriam eŋgiyohotka luainöŋ malme.

⁴Nöŋön nalö dop köuluköba gi mötmörim gihimakzalaŋgö dop kewögöra Anutuni saiwap jim waŋgimakzal:

⁵Gi Kembu Jisös möt nariba jöpaköm waŋgiba Anutugö ambazip sarakŋi pakpak jöpaköba urukalem ak eŋgiba maljan.

⁶Saiwap jiba kewö köulukömakzal: Mötnaripkan mönö köhöiba pöwöwöm aiga ölöp qöhöröŋnine kinda nembuk mötnaripkö keuŋi jim sehiba malman. Mewö Kraistpuk qekötahöba kininga kalem ölöpŋi ölöpŋi neŋgimakzawi, gi miaŋgö könaŋi körekŋanök möt sölöŋgöman.

⁷O urumeleŋ alani, gi ambazip sarakŋi körö-ölöwak qem eŋginöŋga amgöba malje. Urukalemgi miaŋgöra nöŋön gwötpuk söŋgaibiga miaŋön uruni naŋgömakza.

⁸Mewö malnöŋga Kraistpuk qekötahöziga ölöp awösamkakak aka kukösum qakŋe kinda yuai akŋangö jim kutum gihibileŋak.

⁹Mi töndup Anutunöŋ uruŋan jöpaköm netkizawaŋgöra aka ölöp jimkutukutuni mosöta ulet miyök ulet gihimam. Gi Pol nöŋgö silikni mötzan. Nöŋön azi namŋi akzal aka Kraist Jisösgö nupköra aka nalö kewöŋe kösö miri azia mewöyök akzal.

¹⁰Ni kösö miri kiaŋgöreŋ alagi qetŋi Onesimus aitoŋgöba bauköm waŋgibiga uruŋi meleŋda mötnaripkö nahöni ahök. Miaŋgöra merak yaŋgö numbu jit memba yaŋgöra aka ulet gihizal.

¹¹Yaŋön mutuk welen qeba laŋ möndöba injarere mala qemasolokep ak gihiba malökmö, nalö kewöŋe letota gi aka ni ölöpŋanök bauköm netkiiga ölŋi asuhumakŋawaŋgö dop akza.

¹²Yaŋön nani wölböt nahöni akza aiga nani wölbötni ewö melaim waŋgibi liliŋgöba göhöreŋ kaza.

¹³Nöŋön Ölöwak Buŋagöra aka kösö mire tatzal. Miaŋgöra Onesimus jöhöbi nömbuk mala göhö salupke bauköm niŋgimapkö mötzal.

¹⁴Mewö mötzalmö, bauköm niŋgimapkö qahö kuŋgum gihizal. Sihimgan jiiga bauköm niŋginöŋga dop köljapmö, göŋön welenqeqegi niŋgiman me aŋgön kölman, miaŋgöra Oŋ! qahö jinöŋga nanök jöhöm waŋgimamgö osizal.

¹⁵Onesimusnöŋ kewögöra aka gömosörök me? Yaŋön nalö töröptökŋi yaigep mala kunbuk liliŋgöba kaba göbuk nalö teteköŋi qahö malma.

¹⁶Mutuk welenqeqe omaŋi aka malökmö, nalö kewöŋe mi oŋgita azi qainŋi kun akza. Uruŋi meleŋda mönö wölböt alanina akza. Nöŋön yaŋgöra gwötpuk ak niŋgiiga göŋön azi mi eknöŋga Kembugö buŋaŋi aiga yaŋgöra mewö ni noŋgita önöŋi qahö ak gihimakŋa.

¹⁷Göŋön nömbuk ala-ala aka maljit mötnöŋga nöŋön kabi köl öröm niŋgibanak ewö, mönö Onesimusnöŋ kaiga mewö köl öröm waŋgiman.

¹⁸Yuai kun ak bölim gihiyök me yaŋgöreŋ tosa kun göhöreŋ ahöza ewö, mia mönö nöŋgö tosaya jinöŋ ahöma.

¹⁹Ni Pol mönö nani börönan kewö ohozal, “Nöŋön mi mekömam.” Nöŋön bauköm gihibi urugi meleŋnöŋga tosagi ketaŋi mi mekömangöra nangi mewöŋanök nöŋgö buŋaya jim teköm aŋgunöŋga dop kölbawak. Miaŋgöra ölöp kewö jibileŋak: Onesimusgö tosaŋi mi mönö jinöŋga nange tosaya ahöma.

²⁰O urumeleŋ alani, Kembugö Buŋa gihiali, mi mönö meleŋda bauköm niŋgimangö ak niŋgiza. Kraist qekötahözani, miaŋgö dop mönö Onesimus köl örönöŋga nöŋgö urunan amgöba ölöwakŋa.

²¹Keuni tem kölmani, mi möt nariba keuni ohoba könaŋamgi kewö ahöi mötzal: Keu jizali, mi mönö oŋgita qetpuk ak soroköman. Mewö.

²²Keu kun ki: Eŋön köulukögetka Kembunöŋ ni meleŋ niŋgii eŋgöreŋ kamamgö al mamböta jörömqöröm akzal. Miaŋgöra mönö miri uruŋi kun nöŋgöra mem kelötman.

²³Alani Epafras yaŋön Jisös Kraistkö nupköra aka nömbuk kösö mire tata yaizökzökŋi ali göhöreŋ kaza.

²⁴Neŋakurupni nup mohotŋe memakzini Mak, Aristarkus, Demas aka Luk yeŋön mewöyök yaizökzökŋini algetka göhöreŋ kaza.

²⁵Kembu Jisös Kraistkö kalem möriamnöŋ mönö uŋaŋini kötuetköba embuk ahöma. Mewö.