1Poronɨ —Nionɨ Kiraisɨ Jisasomɨ nɨxɨ́dɨrɨ yarɨŋápɨ nánɨ gwɨ́ aŋɨ́yo nɨŋwɨrárɨgɨ́onɨrɨnɨ. Nionɨ tɨ́nɨ negɨ́ nɨrɨxɨ́meá Timotio tɨ́nɨ payɨ́ rɨna nearɨ mónaparɨŋwiɨ. Pairimonoxɨ, yegɨ́ dɨŋɨ́ sɨxɨ́ rɨyigwɨ́íoxɨ —Joxɨ yawawi tɨ́nɨ nawínɨ Jisasomɨ nɨxɨ́dɨrɨ yarɨŋwá nánɨ gwɨ́ mónɨŋwá woxɨrɨnɨ.
2Joxɨ tɨ́nɨ negɨ́ nɨrɨxɨ́meáí Apiaí tɨ́nɨ Akipaso tɨ́nɨ —O none tɨ́nɨ negɨ́ nawínɨ roarɨŋwá worɨnɨ. O tɨ́nɨ Jisasoyá sɨyikɨ́ imónɨgɨ́á joxɨyá aŋɨ́ iwámɨ awí eánarɨgɨ́áyɨ́ tɨ́nɨ ayɨ́ nɨ́nɨ enɨ aí tɨ́nɨ nánɨ payɨ́ rɨna nearɨ mónaparɨŋwiɨ.
3“Negɨ́ ápo Gorɨxo tɨ́nɨ Ámɨná Jisasɨ Kiraiso tɨ́nɨ awaú wá seawianɨri seyɨ́né píránɨŋɨ́ nɨwayɨrónɨro ŋweapɨ́rɨ nánɨ seaiiri éɨ́isixɨnɨ.” nimónarɨnɨ.
4Nionɨ negɨ́ Gorɨxomɨ xwɨyɨ́á rɨrɨmɨ́ nɨwirɨ joxɨ nánɨ rɨxɨŋɨ́ nɨrurɨyirɨ́ná arɨ́á re nɨwirɨ nánɨ, “O ámá Gorɨxoyá imónɨgɨ́á nɨyonɨ dɨŋɨ́ sɨpí nɨwirɨ arɨrá wirɨ Ámɨná Jisasomɨ dɨŋɨ́ wɨkwɨ́rorɨ yarɨŋorɨnɨ.” Arɨ́á e nɨwirɨ nánɨ joxɨ nánɨ rɨxɨŋɨ́ nɨrurɨyirɨ́ná Gorɨxomɨ yayɨ́ wiarɨŋárɨnɨ.
6Joxɨ nene tɨ́nɨ nawínɨ Kiraisomɨ dɨŋɨ́ wɨkwɨ́roarɨŋagwɨ nánɨ nawínɨ ikárɨnɨŋwápimɨ dánɨ “rɨpɨ re oimónɨnɨ.” nimónarɨnɨ, “Amɨpí naŋɨ́ Kiraisomɨ nuxɨ́dɨrɨ́ná epaxɨ́ imónɨŋwá nɨpɨnɨ nánɨ xɨxenɨ nɨjɨ́á oimónɨnɨ.” nimónarɨnɨ.
7Gɨ́ nɨrɨxɨ́meáoxɨnɨ, joxɨ ámá Gorɨxoyá imónɨgɨ́áyo dɨŋɨ́ sɨpí nɨwirɨ nerɨŋɨ́pimɨ dánɨ dɨŋɨ́ sɨxɨ́ umímoŋɨ́ eŋagɨ nánɨ nionɨ yayɨ́ ayá wí nɨninɨrɨ dɨŋɨ́ niɨ́á ninarɨnɨ.
8Ayɨnánɨ Poronɨ —Nionɨ rɨxa xweyaŋonɨ nerɨ Kiraisɨ Jisasomɨ nuxɨ́dɨrɨ́ná yarɨŋápɨ nánɨ gwɨ́ ŋweaŋáonɨrɨnɨ. Nionɨ yawawi Kiraiso nánɨ nawínɨ gwɨ́ mónɨgwɨ́íwawi eŋagɨ nánɨ masɨsɨ́á bɨ mɨsí “O e nerɨ́náyɨ́ naŋɨ́ imónɨŋɨ́pɨ yarɨnɨ.” yaiwiarɨŋápɨ e éɨrɨxɨnɨrɨ sekaxɨ́ bɨ rɨrɨpaxɨ́ aiwɨ dɨŋɨ́ sɨxɨ́ yinarɨgwɨ́íwawi eŋagɨ nánɨ awayinɨ rɨxɨŋɨ́ bɨ orɨrɨmɨnɨ.
10Onesimaso —O nionɨ gwɨ́ aŋɨ́ tɨ́yo nɨŋwearɨ́ná wáɨ́ urɨ́ápimɨ dánɨ Gorɨxomɨ dɨŋɨ́ wɨkwɨ́roarɨŋɨ́ eŋagɨ nánɨ gɨ́ íwónɨŋɨ́ emeááorɨnɨ. “O nánɨ rɨxɨŋɨ́ bɨ owurɨyimɨnɨ.” nimónɨgoɨ.
11Xámɨ “Yɨ́wɨ́ imónɨŋorɨ́anɨ?” wiaiwiago aiwɨ agwɨ joxɨ tɨ́nɨ nionɨ tɨ́nɨ nɨwawinɨ dɨŋɨ́ uŋwɨrárɨpaxɨ́ imónɨŋorɨnɨ.
12Agwɨ nionɨ omɨ joxɨ tɨ́ŋɨ́ e nánɨ nurowárɨrɨ́ná gɨ́ dɨŋɨ́ aí tɨ́nɨ nɨxeyánɨrɨ́nɨŋɨ́ wɨ́rénaparɨŋɨnɨ.
13Nionɨ xwɨyɨ́á yayɨ́ neainarɨŋɨ́pɨ wáɨ́ urɨmearɨŋáonɨ eŋagɨ nánɨ gwɨ́ aŋɨ́yo ŋweaŋáná “Onesimaso nionɨ tɨ́nɨ nɨŋwearɨ joxɨ nánɨ wayɨ́á arɨrá oninɨ.” nɨnimónɨrɨ aiwɨ joxɨ “Ayɨ́ ananɨrɨnɨ.” sɨnɨ mɨnɨrɨpa eŋánáyɨ́, “E apɨ xe oemɨnɨ.” mɨnimónɨ́agɨ nánɨ ámɨ joxɨ tɨ́ŋɨ́ e nánɨ urowárénaparɨŋɨnɨ. Joxɨ “Poro sekaxɨ́ nɨrɨ́ɨ́pimɨ dánɨ oemɨnɨ.” mɨyaiwí dɨxɨ́ dɨŋɨ́yo dánɨ “Xe Poro tɨ́nɨ nɨŋwearɨ arɨrá owinɨ.” yaiwirɨ́a nánɨ omɨ joxɨ tɨ́ŋɨ́ e nánɨ úrowárénaparɨŋɨnɨ.
15Ayɨ́ rɨpɨ nánɨ rɨrarɨŋɨnɨ. O ámɨ anɨŋɨ́ joxɨyá imónɨnɨ́a nánɨ bɨ onɨmiápɨ pɨ́nɨ nɨrɨwiárɨmɨ nɨbɨrɨ ŋweaŋɨ́rɨ́anɨ?
16O sɨnɨ dɨxɨ́ rɨnáínɨŋɨ́ nimónɨrɨ omɨŋɨ́ siiarɨŋo aí sɨnɨ axɨ́ apɨnɨ mimónɨ́ apimɨ nɨmúrorɨ Jisasomɨ dɨŋɨ́ nɨwɨkwɨ́rorɨ nánɨ gɨ́ nɨrɨxɨ́meá dɨŋɨ́ sɨxɨ́ uyiŋáónɨŋɨ́ imónɨŋɨ́rɨnɨ. E nimónɨrɨ aiwɨ joxɨ aŋɨpaxɨ́ “Rɨxa gɨ́ nɨrɨxɨ́meáónɨŋɨ́ imónɨŋɨ́ worɨ́anɨ?” wiaiwipaxorɨnɨ.
17Ayɨnánɨ “Poro nionɨ tɨ́nɨ nawínɨ gwɨ́ mónɨgwɨ́íorɨ́anɨ?” nɨniaiwirɨ́náyɨ́, Onesimaso símeááná nionɨ nɨmímɨnɨmɨnɨrɨ eŋɨ́pa omɨ enɨ axɨ́pɨ umímɨnɨ́ɨrɨxɨnɨ.
18E nɨrɨrɨrɨ aí o pɨ́nɨ nɨrɨwiárɨmɨ nurɨ́ná sɨpí nɨsikárɨmɨ uŋɨ́pɨranɨ, amɨpí ɨ́wɨ́ rɨrápɨŋɨ́pɨranɨ, ananɨ nionɨ rɨyɨpárómɨ́árɨnɨ.
19Poronɨ niɨwanɨŋonɨ gɨ́ wé tɨ́nɨ rɨ́wamɨŋɨ́ rɨpɨ “Nionɨ rɨyɨpárómɨ́árɨnɨ.” nɨrɨrɨ eaarɨŋɨnɨ. Ayɨ́ joxɨ enɨ maŋɨ́ nionɨyáyo dánɨ rarɨ́ná Jisasomɨ dɨŋɨ́ wɨkwɨ́róagɨ nánɨ joxɨ nionɨ enɨ nɨyɨpáropaxɨ́ imónɨŋɨ́pɨ nánɨ mɨrɨrɨpa éɨmɨgɨnɨ.
20Gɨ́ nɨrɨxɨ́meáoxɨnɨ, Ámɨná Kiraiso tɨ́nɨ nawínɨ ikárɨnɨgwɨ́íoxɨ eŋagɨ nánɨ nionɨ rɨxɨŋɨ́ rɨrɨ́ápɨ xɨxenɨ niíɨrɨxɨnɨ. E nerɨ́náyɨ́, apɨnɨ mé dɨŋɨ́ sɨxɨ́ enɨ nɨmímorɨ́árɨnɨ.
21“Arɨ́á yɨ́mɨgɨ́ ninɨŋoɨ.” nɨsiaiwirɨ dɨŋɨ́ sɨ́ŋá neánarɨŋagɨ nánɨ re nɨnimónɨrɨ payɨ́ eaarɨŋɨnɨ, “Joxɨ nionɨ rɨrɨ́ápɨnɨ mé apɨ nɨmúrorɨ ámɨ seáyɨ e imónɨŋɨ́ bɨ tɨ́nɨ erɨ́árɨnɨ.” nɨnimónɨrɨ payɨ́ rɨna eaarɨŋɨnɨ.
22Rɨxɨŋɨ́ ámɨ bɨ rɨpɨ orɨrɨmɨnɨ, “Aŋɨ́ awawá nionɨ wepaxɨ́ imónɨŋɨ́wá óɨ́ nimoáríɨrɨxɨnɨ.” orɨrɨmɨnɨ. Ayɨ́ rɨpɨ nánɨ rɨrarɨŋɨnɨ. Seyɨ́né Gorɨxomɨ rɨxɨŋɨ́ nurɨyarɨgɨ́ápimɨ dánɨ oyá dɨŋɨ́ tɨ́nɨ gwɨ́ aŋɨ́yo dánɨ nɨwáráná seyɨ́né tɨ́ámɨnɨ bɨ́ɨmɨgɨnɨrɨ dɨŋɨ́ nikwɨ́morɨ nánɨ rarɨŋɨnɨ.
23Epapɨraso —O enɨ Kiraisɨ Jisasomɨ uxɨ́darɨŋɨ́ wo eŋagɨ nánɨ nionɨ tɨ́nɨ nawínɨ gwɨ́ ŋweagwɨ́íorɨnɨ. O joxɨ nánɨ yayɨ́ siowárénaparɨnɨ.
24Mako tɨ́nɨ Arisɨtakaso tɨ́nɨ Dimaso tɨ́nɨ Ruko tɨ́nɨ —Awa Jisasomɨ nɨxɨ́dɨro yarɨŋagɨ́a nánɨ gwɨ́ nɨmónɨgɨ́áwarɨnɨ. Awa enɨ yayɨ́ siowárénaparɨŋoɨ.
25“Ámɨná Jisasɨ Kiraiso anɨŋɨ́ wá nɨseawiaga úwɨnɨgɨnɨ.” nimónarɨnɨ.
