ፒሊሞና 1

1

¹ታኒ ጳዉሎሲ፥ ዬሱሲ ኪሪስቶሳ ዲራው ቃሹዋን ዴዒያዌኔ ኑ ኢሻ ፂሞቶሲ፥ ኑናና ኦꬂያ ኑኒ ሲቂያ ፒሊሞናው፥

²ኔ ጎሌን ሺቂያ ኣማኒያዋንቶ፥ ኑ ሚቻቲ ኣፊቢሲኔ ኑናና ኢቲፔ ዴዒያ ኪሪስቶሳ ዎታዳራ ኣርኪፖሳው ሃ ዳቢዳቢያ ፃፌቶ።

³ፆሳ ኑ ኣዉዋፔኔ ኑ ጎዳ ዬሱሲ ኪሪስቶሳፔ ኣꬎ ኬካቴꬃይኔ ሳሮቴꬃይ ሂንቴንቱሲ ጊዶ።

⁴ኔኒ ፆሳ ኣሳቱዋ ሲቂያዋኔ ጎዳ ዬሱሳ ኣማኒያዋ ታኒ ሲሲያ ዲራው፥ ፆሳ ዎሳዴ ኔና ሃሳዪያ ዎዴ ኡባን፥ ታ ፆሳ ጋላታይ።

⁶ኔኒ ኔ ኣማኑዋ ሃራቱዋና ሻኪያዌ ኑሲ ኪሪስቶሲ ዬሱሳ ባጋና ዪያ ሎዖባ ኡባ ኤሪሳና ማላ፥ ታኒ ፆሳ ዎሳይ።

⁷ኣዪሲ ጎፔ፥ ፆሳ ኣሳቱዋ ዎዛናይ ኔ ኪታን ሚኔዳ ዲራው፥ ታ ኢሻው፥ ታኒ ኔ ሲቁዋን ዳሮ ናሼቻኔ ሜንꬄꬁዋ ዴማዲ።

⁸ሄዋ ዲራው፥ ኔኒ ኦꬃናው ቤሲያዋ ኦꬃና ማላ፥ ታኒ ኔና ኣዛዛናው ኪሪስቶሳ ባጋና ፃሎፔካ፥

⁹ታኒ ጳዉሎሲ ጪሜዳዌ፥ ኪሪስቶሲ ዬሱሳው ሃዒካ ቃሹዋን ዴዒያዌ፥ ሲቁዋ ዲራው፥ ኔና ዎሳይ።

¹⁰ታኒ ቃሹዋን ዴዓዴ ኣው ኣዉዋ ጊዴዳ ታ ናዓ ኣናሲሞሳ ዲራው፥ ኔና ዎሳይ።

¹¹ኢ ካሴ ኔና ጎዔና፤ ሺን ሃዒ ኔናካ ታናካ ቱሙ ጎዔ።

¹²ታኒ ዎዛናፔ ዶሲያ ኣናሲሞሳ ኔኮ ዬዶዌ ታ ዎዛና ዬዶዋ። ታኒ ዎንጋላ ዲራው ቃሼታ ኡታ ዴዒሺን፥ ኔና ኮቺዴ፥ ታና ማዳና ማላ፥ ታ ማታን ኣ ኣሻናው ኮያይ።

¹⁴ሺን ኔኒ ኔ ሼኒያዳን ኦꬃናዋ ኮያይፔ ኣቲን፥ ኔናና ዞሬቴናን ዎልቃን ኣይኔ ኦꬃናው ኮዪኬ።

¹⁵ኣናሲሞሲ ጉꬃ ዎዲያ ኔፔ ሻኬቴዳዌ፥ ኦኒ ኤሪ ሲሚዴ፥ ኡባ ዎዴካ ኔናና ዴዓናሴንቶኔ።

¹⁶ሲሚ ሃዋፔ ሲንꬃው ኣናሲሞሲ ኣይሊያ ጊዴና፤ ሺን ኣይሊያፔ ኢ ሎይꬂ ኣꬌ፤ ኢ ታው ኣይ ኬና ሲቆ ኢሼ! ቃሲ ኢ ኔው ኣሳ ባጋናካ ጎዳ ባጋናካ ኣይ ኬና ኣꬌዳ ኢሻ ጊዳንዴሻ!

¹⁷ሲሚ ኔኒ ታና ኔ ላጌꬃ ጊያዋ ጊዶፔ፥ ታና ሞኪያዋዳን፥ ኣ ሞካ።

¹⁸ኢ ኔው ባዪዜዳባይ ዎይ ኣ ቦላ ኔው ኣጩ ዴዖፔ፥ ታፔ ጪጋ ኣካ።

¹⁹ሄ ኣጩዋ ታኒ ጪጋና ጋዴ፥ ታኒ ጳዉሎሲ ታ ኩሺያን ፃፋይ። ኔኒ ታው ኔ ሼምፑዋ ኣጮታ ኡቴዳዋ ታኒ ኔና ሃሳዪሳናው ኮሼና።

²⁰ኤ፥ ታ ኢሻው፥ ጎዳ ባጋና ኔፔ ማዱዋ ዴማናው ኮያይ። ኪሪስቶሳ ባጋና ታና ሜንꬄꬃ።

²¹ታኒ ጌዳዋፔ ዳሩዋ ኔኒ ኦꬃናዋ ኤራዴ፥ ቃሲ ኔ ታው ኣዛዜታናዋካ ኣማናዴ፥ ሃዋ ኔው ፃፋይ።

²²ቃሲ ሂንቴንቱ ኤሌካ ታው ኢማꬃይ ሼምፒያ ጎሊያ ጊጊሲቴ። ኣዪሲ ጎፔ፥ ፆሳይ ሂንቴንቱ ዎሳን ታና ሂንቴንቱሲ ጉዬ ዛሪዴ ኢማና ጋዴ ቆፓይ።

²³ኪሪስቶሲ ዬሱሳ ዲራው፥ ታናና ቃሹዋን ዴዒያ ኤፓፊሪ ኔና ሳሮ ሳሮ ጌ።

²⁴ቃሲ ታናና ኢቲፔ ኦꬂያ ማርቆሲ፥ ኣሪስፂሮኮሲ፥ ዴማሲኔ ሉቃሲ ኔና ሳሮ ሳሮ ጊኖ።

²⁵ጎዳ ዬሱሲ ኪሪስቶሳ ኣꬎ ኬካቴꬃይ ሂንቴንቱ ኣያናና ጊዶ።