ፒልሞናም 1

1

¹ኪሪስቶሴ ዛሎ''ሮ ቱኡቲ ዓኣ ጳውሎሴና ዒሻሢ ፂሞቴዎሴናይዳፓ፦ ኑኡና ዎላ'' ማዻያ ማዔ፥ ናሽኪንታ ዒሻሢ፥ ፒልሞናም፤

²ኔ ማኣሮይዳ ቡካ ኪሪስቶሴ ጉሙርቃ ዓሶም፤ ኑ ሚሼሎ ዓፒቢያም፤ ዬያጉዲ ሃሣ ኑኡና ዎላ'' ኪሪስቶሴ ዛሎ''ሮ ፖኦሊሴ ማዔ፥ ዓርኪጶሴም፤

³ኑ ዓዳሢ፥ ፆኦዛሢዳፓ ሃሣ ኑ ጎዳሢ፥ ዬሱስ ኪሪስቶሴይዳፓ ማዔ ኮሹሞ ዒንጊፃ ዒንሢም ማዖንጎ።

⁴ታ ቢያ ዎዴ ኔኤም ሺኢቃኣና ታ ጎዳሢ ታ ጋላታኔ፤

⁵ዓይጎሮ ጌዔቴ ፆኦሲም ዱማዼ ዓሶ ኔ ናሽካሢና ጎዳ ዬሱስ ኪሪስቶሴ ኔ ጉሙርቃሢ ታ ዋይዜሢሮኬ።

⁶ኑኡኒ ኪሪስቶሴሮ ማዔሢሮ ኑኡኮ ዓኣ ኮዦ ባኮ ቢያ ኔ ዔራንዳጉዲ ኔኤኮ ጉሙርቂፆ ሜሌ'' ዓሲም ኔ ዻዊሢና ዶዳንዳጉዲ ታኣኒ ፆኦሲ ሺኢቃኔ።

⁷ዒሻሢዮ! ኔ ዛሎ''ና ፆኦሲ ዓሶኮ ዒና'' ሃውሻሢሮ ኔኤኮ ናሹማ ዼኤፒ ዎዛና ዶዱሞዋ ታኣም ዒንጌኔ።

⁸ዬያሮ ኔኤኒ ማዻንዳጉዲ ኮይሳ ባኮ ማዻንዳጉዲ ኪሪስቶሴና ጫርቂ ታ ኔና ዓይሣንዳያታዖ፥

⁹ኔና ዓይሢፆይዳፓ ናሹሞና ታ ኔና ሺኢቃኔ፤ ታኣኒ ኪሪስቶሴ ዛሎ'' ጌስታያና ሃሢ ዒዛ ዛሎ'' ቱኡቲ ዓኣ፥ ታኣኒ ጳውሎሴ፥

¹⁰ቱኡዞ ማኣራ ዓኣዖ ዓያናና ታ ሾዔ ዓናሲሞሴ ዛሎ''ኬ ታ ኔና ሺኢቃሢ፤

¹¹ዓናሲሞሴ ሃያኮ ቤርታ ኔና ማኣዱ''ዋያኬ፤ ሃሢ ጋዓንቴ ኔናንታ ታናንታም ማኣዳ''ያ ማዔኔ፤

¹²ሃኣዛጌ፤ ዒዛ ኔ ባንሢ ማሂ ታ ዳኬኔ፤ ታኣኮ ዒ ሼምፓሢታንቴኬ ታ ኔኤም ዒዛ ዳኬሢ።

¹³ኮዦ ሃይሶ ዛሎ''ና ታ ሃካ ቱኡቲ ዓኣንቴ ኔጉዲ ማዒ ዒዚ ታኣም ማዻኒ ታኣና ዎላ'' ዓኣቴ ኮሺታንቴኬ፤

¹⁴ጋዓንቴ ኔ ታኣም ማዻ ኮዦ ማዻ'' ዎልቄናቱዋንቴ ናሹሞና ኔ ማዻያ ማዓንዳጉዲ ኔና ዖኦጩዋዖ ዓይጎ ባኣዚ''ያ ማዻኒ ታ ኮይባኣሴ።

¹⁵ዓናሲሞሴ ሃይማ ሄላ''ንዳኣና ዻካ'' ዎዴ ኔጊዳፓ ዱማዼሢ' ጊንሣ ኔ ዒዛ ዔኬም ጎዖንቴ ሃይፓ ሴካ ቢያ ዎዴ ኔኤና ናንጋንዳጉዲ ናንዳኔ።

¹⁶ዓካሪ ሃይፓ ሴካ ዒ ኔኤና ዎላ'' ናንጋንዳሢ' ካራሚ ማዒቱዋንቴ ካራሚፓ ዑሣ፥ ናሽኪንታ ጌርሲጉዲ ማዒኬ፤ ዒዛ ታ ናሽካያ ታኣኮ ጌርሲኬ፤ ማዔቴያ ዒዚ ማዾ''ና ኔና ማኣዳ''ንዳሢሮና ኪሪስቶሴ ሱ'ንፆና ጌርሲ ኔኤኮ ማዔሢሮ ኔኤኮ ባሼ ዒ ናሽኪንታ ላጌ ማዓንዳኔ።

¹⁷ኔ ታና ኪሪስቶሴ ዛሎ''ና ላጌ ማሂ ዛጋያታቴ ሃሢ ኔ ታና ቦንቺ ዔካሢጉዲ ዒዛኣ ዔኬ።

¹⁸ዒ ኔኤም ዻቤ ባኣዚ''ና ባይዜ ባኣዚ'' ኔኤኮ ዓኣቴ ዒዛ ጋሎ'' ታ ዑፃ ማሄ፤

¹⁹ታኣኒ፥ ጳውሎሴ፦ «ዒዛኮ ጋሎ'' ጪጋንዳኔ» ጌዒ ታ ኩቻ ታ ፃኣፔኔ። ኔኤኒያ ኔ ቶኦኪና ታኣሮ ማዔሢ ታ ኔኤም ኬኤዛንዳያ ኮይሱዋሴ።

²⁰ዓካሪ ታ ዒሻሢዮ! ታ ኮዓ ባኮ ኔ ታኣም ማዻንዳጉዲ ታ ኮዓኔ፤ ሃዳራ ኪሪስቶሴሮ ጌዒ ታኣኮ ዒኖ ሃውሺሴ።

²¹ሃያ ታ ኔኤም ፃኣፔሢ' ኔ ታኣም ዋይዛንዳሢ ጉሙርቂሢናኬ፤ ታ ኔኤም ጋዓሢዳፓ ዑሣ ኔ ታኣም ማዻንዳሢያ ታ ዔራኔ።

²²ፆኦሲ ዒንሢኮ ሺኢጲፆ ዋይዚ፥ ታኣኒ ዒንሢ ኮይላ'' ሙካንዳጉዲ ታና ማሃንዳኔ ጌይ ሃጊ ማዓንዳ ዎዛ ታ ጌሣሢሮ ታኣኒ ሃውሻንዳ ማኣሪ ታኣም ኮዔ።

²³ዬሱስ ኪሪስቶሴ ዛሎ''ሮ ታኣና ዎላ'' ቱኡቲ ዓኣ፥ ዔጳፒራ «ኮሺዳ?» ዒንሢ ጋዓኔ፤

²⁴ዬያጉዲ ታኣና ዎላ'' ማዻ ማርቆሴ፥ ዓሪስፂሮኮሴ፥ ዴማሴንታ ሉቃሴንታ ዒንሢ «ኮሺዳ?» ጋዓኔ።

²⁵ጎዳ ዬሱስ ኪሪስቶሴኮ ኮሹሞ ዒንጊፃ ዒንሢ ቢያሢም ማዖንጎ።