1Ne hein netuenan ni Mordecai is planu kuntra kandan, mibindas din is bisti zin he tuus te kegkeseeng din. Ne mibivisti te saku wey mibpen-evuwan din is ulu zin, ne midhendiyà sikandin te inged is midsineǥew.
2Piru zuen dà sikandin metaman te ǥawas duen te pultahan te turuǥan su wazà minsan hentei he edtuǥutan te kedseled dutun te turuǥan he ebivisti te saku.
3Ne ziyà te kada prubinsya he neumahan dutun te suǥù te hadì, utew grabi is kedlalew te menge Judio zutun. Mibpuasa zan, nemenineǥew zan, wey nemenlelendag dan. Ne mahabet kandan is nemengukumbalà te saku wey midtelilid diyà te avu.
4Hein impenudtul ki Ester te menge suluǥuen din he menge vahi wey te menge upisyal he ed-atur kandin is mehitenged ki Mordecai, ne utew mibmesakit is gehinawa zin. Ne mibpeuwitan din si Mordecai te visti su wey zin meilisi sikan is saku he ingkukumbalè din, piru wazè din dewata haazà.
5Ne impetawag ni Ester si Hatac, he sevaha he upisyal te hadì he sineriǥan he impesilbi ki Ester. Ne midsuǥù sikandin ni Ester te kedsusi ki Mordecai ke hengkey is utew zin ingkeseeng wey ke maan is egkehenduen sikandin.
6Umbe, mibeyaan ni Hatac si Mordecai ziyà te pelasa zutun te inged, he atbang duen te pultahan te turuǥan.
7Ne inseysey ni Mordecai ziyà te ki Hatac is langun he hinungdan te utew zin kegkeseeng, ragkes sikan is kezekelà te selapì he impenaad ni Haman he ibeǥey zin diyà te hadì he vayad te kegeraa te menge Judio.
8Ne mibeǥayan daan ni Mordecai si Hatac te kupya zuen te suǥù te hadì he midhimu ziyà te Susa he midhisgut te kebpuawa kandan te menge Judio su wey zin ikeseysey wey ikepaahà diyà te ki Ester. Intelaan din daan diyà te ki Hatac he kinahanglan he mebpekidhinguma si Ester zuen te hadì su wey zin mehengyui he ikehizu zin sikandan is menge Judio.
9Ne midlikù si Hatac diyà te ki Ester ne midtudtul zin is langun he intelaan kandin ni Mordecai.
10Ne impelikù sikandin ni Ester ziyà te ki Mordecai su wey zin metudtuli kayi:
11“Netuenan duen te langun he menge upisyal te hadì wey te langun he menge etew ziyà te minsan hendei he neseled te ginhedian din, maama etawa vahi he ebpekid-etuvang te hadì minsan pa te wazà sikandin pesuǥui, ne sevaha zà is belaud te hadì mehitenged dutun he iyan is: Kinahanglan he edhimetayan haazà he etew. Ne wey zà sikandin kenà edhimetayi ke ibayew zuen te hadì diyà te kandin sikan is tuked din he vulawan. Ne siak, seled en te senge vulan ne wazè e pa ipetawag duen te hadì.”
12Ne hein netudtulan dutun si Mordecai,
13iyan heini tavak din he impetudtul zin diyà te ki Ester: “Kenè nu kun isipa he iyan ke zà ebpekelingkawas te egkehitavù diyà te langun he menge Judio tenged te ziyè ka ed-ubpà te turuǥan te hadì.
14Su minsan ebpeeemew ke en kayi te mereǥen he timpu, zuen selakew en he ed-uǥup wey edlibri te menge Judio, piru sikew wey is pemilya nu egkekeizan mulà. Kela ke iyan ingkehimuwa kenikew he rayna su wey ka meketavang te zuma nu he menge Judio te timpu he iring kayi.”
15Ne impetudtul ni Ester ziyà te ki Mordecai is tavak din. Ke sikandin te,
16“Genat ka, ne tiǥuma nu is langun he menge Judio he kayi te Susa ne puasa kew para kediey. Kenè kew megkaan wey med-inum seled te tetelu he andew wey tetelu he kezukileman. Ebpuasa a zaan wey is menge suluǥuen ku he menge vahi. Ne emun egkepasad, ne edhendiyà a te hadì minsan pa te supak heini te kesuǥuan. Belaǥad ke himetayi a.”
17Ne migenat si Mordecai ne midtuman din haazà is langun he mibpeveelan ni Ester.
