1Duen sevaha he hadì te Persia he migngezanan ki Ahasuerus. Diyà sikadin med-ubpà te turuǥan he miberengbeng diyà te inged he Susa. Edhedian din is 127 he prubinsya puun te India taman te Etiopia.
3Ne hein iketelu en he tuig te kedhadì din, midhimu sikandin te zekelà he keemuran para te menge upisyal zin, wey te zuma pa he ebpenilbi kandin. Midtelavuk daan is menge pengulu te sundaru zutun te Persia wey Media, ne elin daan midtelavuk is dungganen he menge etew wey is menge upisyal ziyà te menge prubinsya.
4Heenem he vulan is keluǥayad te midhimu zin he keemuran, ne impaahà ni Ahasuerus is kesesepian din dutun te ginhedian din, wey is dekelà he ventuǥan din wey kegketelehuzen.
5Ne hein neiwas haazà, mid-uman en maan sikandin medhimu te pitu he andew he keemuran he para te langun he meǥinged diyà te vinerengbeng he inged he Susa, ebpuun te pinekedungganen pehendiyà te menge egkengeayuayu. Diyà haazà umani himuwa is keemuran te lama te turuǥan te hadì.
6Ne haazà is lugar ne mideyzeyanan te meputì wey meitem is kaavuavu zin he menge kurtina he midhiketan te hiket he iyan mibeelan is merudtem he linu, ne impikit haazà duen te menge mibpen-iring te sising he pelata zuen te menge tukud he marmul. Ne zuen dutun menge vangkù he vulawan wey pelata, he ziyà ipelastar te saag he meupiya he ed-ahaan he kristal, marmul, perlas wey zuma pa he menge mahalen he menge vatu.
7Mid-inum is menge visita ne migamit is menge inumà he vulawan he nekedseselekawà te zayandayan. Impevayèbayè en sikandan te hadì te menge mahalen he vinu. Midsuǥù is hadì te menge suluǥuen he iyan en ibpevayàbayà is menge visita.
9Dutun te kemulu is keemuran haazà is menge maama he menge visita, midhimu zaan te keemuran si Rayna Bashti para te menge vahi he zutun te turuǥan ni Hadì Ahasuerus.
10Dutun te ikepitu he andew zutun te keemuran, melipayen is hadì te subra he ked-inum. Midsuǥù din is pitu he menge keugelingen din he sineriǥan he si Mehuman, si Bizta, si Harbona, si Bigta, si Abagta, si Zetar, wey si Carkas. Midsuǥù din sikandan
11he zumaha zan diyà te kandin si Rayna Bashti he midsun-uzan is ulu zin te kuruna su wey maahà te menge upisyal zin wey te langun he menge visita zin is kempet din, su si Bashti, utew mekempet he vahi.
12Piru hein midtudtulan te menge suluǥuen si Rayna Bashti mehitenged dutun te suǥù te hadì, ne wazà sikandin mebpezumazuma, umbe utew nepauk haazà is hadì.
13Ne ǥeina te iyan neleyaman he ed-ul-ulahan te hadì dutun he timpu is kebpekisambag diyà te menge uluwanen he sumesambag he nesayud te menge kesuǥuan wey menge vetasan te menge etew ziyà te Persia.
14Ne iyan heini menge ngazan dutun te menge memetau he sumesambag: si Carshena, si Shetar, si Admata, si Tarshish, si Meres, si Marsena, wey si Memucan. Heini sikandan is pitu he lavew he menge upisyal zutun te Media wey Persia. Emiǥu sikandan dutun te hadì wey lavew is ketengdanan dan dutun te ginhedian.
15Ne mid-insà diyà te kandan haazà is hadì te, “Sumalà is diyà te kesuǥuan, hengkey is kinahanglan he ed-ul-ulahan diyà te ki Rayna Bashti tenged te kenè din kebpezumdumahi te suǥù ku he impetudtul ku ziyà te kandin te menge sineriǥan ku?”
16Ne zutun te etuvangan te hadì wey te zuma he lavew he menge upisyal, midtavak si Memucan. Ke sikandin te, “Nekevaal te mezaat si Rayna Bashti, ne is mezaat he mid-ulaula zin, ne kenè ka iyan dà nerumbu zutun is hadì dey, kekenà, elin key nerumbu zutun is langun he lavew he menge upisyal wey langun he menge etew he ebpen-ubpà diyà te langun he prubinsya he neseled te ginhedian nu, telehuzen he Hadì Ahasuerus.
17Haazà is mid-ulaula zin, egkehimu he petug-iringan su emun egketuenan en haazà te langun he menge vahi, ne ebpuunan dan en is kenà kebpezumazuma te esawa zan su egkeisip dan man is, ‘Maan be si Rayna Bashti is midsuǥù te hadì he med-etuvang kandin ne wazà mebpezumazuma.’
18Siguradu he puun guntaan, ne egkezineg te menge vahi kayi te Persia wey Media he esawa te lavew he menge upisyal is mid-ulaula ni Rayna Bashti. Umbe, layun dà egkeula-ula is kenà kedtinehuzà te telteleesawa.
19“Umbe ke meupiya zà te ǥehinawa nu, Mahal he Hadì, beeli nu is suǥù he iyan is: Kenè en maan ebpekeetuvang kenikew si Rayna Bashti te minsan keenu, ne is kegkerayna zin, ibeǥey nu en te zuma he edhuna pa kandin he meupiya. Ne iragkes nu heini he suǥù duen te menge kesuǥuan kayi te ǥinhedian tew he Persia wey Media su para kenà heini mahalin.
20Ne heini he suǥù, emun egketuenan te langun he nesakup kayi te meluag he ginhedian nu, ne is langun he menge vahi, egketahud dan is menge esawa zan, deisey etawa zekelà is pid-etawan din.”
21Ne haazà is hadì, wey sikan is lavew he menge upisyal zin, ingkesuat dan haazà is sambag, umbe mid-ulaula zutun te hadì haazà is insambag kandin ni Memucan.
22Mibpesuratan din is langun he menge etew ziyà te minsan hendei he prubinsya he neseled te ginhedian din, ne iyan migamit is keugelingen dan he menge kineǥiyan. Ne is taǥù dutun te surat iyan is: kada maama iyan mebpengulu wey mebayàbayà te pemilya zin.
