1मिनु मोरदेकैमी मेको लोव़ नेल्ल तुइश्शा, आ वा खाक्तु। मिनु अरन्डी फेक्शा, पुलु मोंइसीशा, ठेयब सेंदामी रोंका पना पन सहरम हिरसाक्व।
2मिनु मोपा दरवार ङा ठेयब लाप्चो आ ङोंइती जाक्त। तन्न अरन्डी फेक्शो सुइ मुर दरवार ङा ठेयब लाप्चो रे ओव़चा मताइबाक्तेक्म।
3पिप आ सोइश्शो मेको लोव़ नेंशा, रागी नेल्ल ङा यहूदी माइजा बाक्शा, ङाक्शा, रोंका पाम्तेक्म। मिनु मेको आन दाते ङा शुश मुर अरन्डी फेक्शा, पुलु तारी निस्साक्म।
4मिनु पिपीम एस्तर आ गेय पाइबपुकी जाक्शा, एस्तर कली मेको लोव़ शोव़तेक्म। पिपीममी मेको नेंशा, शुश सुर्ता पाप्तु। मिनु “अरन्डी प्रुइश्शा वा फेक्सीन” दे मोरदेकै कली वा सोइक्ताक्व। तन्न मोरदेकैमी मेको वा ताक्ने मबिस्से।
5मोपतीके एस्तरमी पिप आ वोइश्शो आ गेय पाइब हथाक कली ब्रेश्शा “मोरदेकै कली मार श्येत दुम्मे? मिनु मेको श्येत दोपा दुम्मे?” दे हिल्लो पथ सोइक्ताक्व।
6मिनु हथाक पिप आ दरवार ङा ठेयब लाप्चो आ ङोंइती ठेयब लाङगामी मोरदेकै कली ग्रुम्थ लत।
7मिनु मोरदेकैमी आंम कली मार दुम्मे, मेको नेल्ल हथाक कली देंत। मिनु हामानमी यहूदी नेल्ल आन कली साइक्चा, दे पिप आ क्येट वोइक्तीकेमी दोशो क्येट वोइक्चा, दे लोव़ पवा, मेको यो हथाक कली शेंताक्व। एस्तर ३:९
8मिनु मोरदेकैमी सुसामी यहूदी आन कली साइक्चा, दे पिप आ लोव़ ब्रेक्शो ब्रेक्स यो एस्तर कली कोंइशा, तुइक्पाइक्चा, दे हथाक कली गेप्तु। मिनु मेकोमी हथाक कली “आंम मुरुम शिशी तामेक्ल, दे पिप कली नमो सिमो पचा कली एस्तर पिप आ बाक्तीकेमी लचा माल्ब देनीन” देंत।
9मिनु हथाक एस्तर आ बाक्तीकेम लशा, मोरदेकै आ देंशो नेल्ल देंत।
10मिनु एस्तरमी हथाक कली मोरदेकै आ बाक्तीकेमी सोइश्शा,
11“पिप आ गेय पाइब नु रागी ङा मुर नेल्ल पिपमी मब्रेत्थु, वोंइश मुर नु मीश मुर सुइ पिप आ ङोंइती लाम्तेक्म हना, साइक्चा पुंइसीनीम। मेको ऐन कानुनम ब्रेक्शो बाक्ब। तन्न पिपमी आ राज दन्ड मेको मुर गे दिंशा कोंइताक्व हना ला, मेको मुर ब्रोंइचा ताइब। मिनु गो ३० नाक्त सम्म मब्रेस्सीशो बाक्नुङ” दे देंचा कली सोइक्ताक्व। एस्तर ५:२; एस्तर ८:४
12मिनु मोपा हथाकमी मोरदेकै कली एस्तर आ सोइश्शो लोव़ नेल्ल शोव़तु।
13मिनु मोरदेकैमी हथाक कली पिपीम कली “गे पिप आ दरवारम बाक्ते हना यो, यहूदी नेल्ल आन दातेमी गे ला ‘साइक्चा मपुंइसीनुङ’ दे ममिम्तो।
14मो देंशो दुम्मेनु, गे सिक्सी पा बाक्तीनी हना, यहूदी आन कली वारच पा प्रोंइचा कली अर्को मुर रे यो जाक्ब। तन्न गे नु इं आफ आ खिं ङा मुरपुकी चहिं खतम दुम्चा माल्नीम। गे यहूदी आन कली प्रोंइचा कली पिपीम दुम्शो बाक्नेवे, कों?” दे एस्तर कली माइक्चा, दे हथाक कली सोइक्ताक्व। उत्पत्ती ४५:७
15मिनु एस्तरमी मोरदेकै कली
16“सुसा सहरमी लशा, यहूदी नेल्ल आन कली आं पर्बम माइजा बाक्चा कली पुक्कीन। नाक्त सां नु नाक्दो सां सम्म मारेइ मजने, मारेइ मतूङीन। मिनु गो नु आं गेय पाइबपुकी यो गे खोदेंशो पा माइजा बाक्नीकी। मिनु में नोले ऐन कानुनमी मगेशो बाक्त हना यो, गो पिप आ बाक्तीकेम लाइनुङ। गो खतम दुम्ती हना, यो दुम्ङल” दे लोव़ सोइक्ताक्व।
17मिनु मोरदेकै लशा, एस्तर आ देंशो खोदेंशो पाप्तु।
