1Dutun he kezukileman, kenà ebpekelipezeng si Hadì Ahasuerus, umbe insuǥù din he uwita ziyà te kandin wey vesaha sikan is libru he midsuratan te kaaǥi te kedhadì din wey ginhedian din.
2Ne nevasa zutun te libru is mehitenged te kedsumbung ni Mordecai te planu eni Bigtana wey ni Teresh he kedhimatey ki Hadì Ahasuerus. Heini si Bigtana wey si Teresh menge sineriǥan sikandan te hadì te kebantey zuen te ǥemawan te ruǥu zin.
3Ne mid-insà is hadì te, “Hengkey is imbales ki Mordecai tenged kayi te meupiya he mibeelan din kayi te kedì?” Ne midtavak kes menge upisyal zin te, “Wazà, Mahal he Hadì.”
4Ne zutun he timpu iyan daan kebpekeuma ni Haman diyà te lama te turuǥan, su edhengyuan din kes hadì he ebitayen si Mordecai ziyà te impeveelan din he vitayà para ki Mordecai. Ne mid-insà kes hadì te, “Hentei heeyan is edhithitindeg keniyan te lama?”
5Midtavak sikan is menge suluǥuen te, “Si Haman.” Ne migkaǥi haazà is hadì te, “Ipeseled niw sikandin dini.”
6Ne hein nekeseled en si Haman, mid-insaan sikandin dutun te hadì te, “Hengkey is dait he ebeelan ku ziyà te etew he nekepenunuat kedì te kebeǥayi ku kandin te zengeg?” Kunaan ni Haman ke sikandin is egkeǥiyen duen te hadì,
7umbe midtavak sikandin te, “Iyan meupiya he ebeelan nu ziyà te kandin is:
8Ipevistiyi nu sikandin te visti nu he neǥamit nu en, wey ipeuntud nu sikandin te kudà he neuntuzan nu en, ne haazà is kudà ne zuen tuus nu te hadì diyà te ulu zin.
9Ne iyan ipesun-ud nu kandin dutun te visti is sevaha zuen te lavew he menge upisyal nu, ne haazà sikandin, iyan daan egiya zutun te etew he ebeǥayan nu te zengeg su nekepenunuat kenikew he ed-untud te kudà he ed-elibet dutun te inged. Ne zuen daan ibpepempemensag te, ‘Iyan heini ed-ul-ulahan diyà te etew he ebeǥayan te hadì te zengeg su nekepenunuat kandin.’ ”
10Nekeuyun dutun haazà is hadì ne ke sikandin diyà te ki Haman te, “Iyan ku sikew ibpevaal keniyan te nekaǥi nu, ne gègaani nu veyai sikan is bisti he ibivisti ku wey sikan is kudè ku ne sumalà is nekaǥi nu ne iyan ul-ulaha nu ziyà te Judio he si Mordecai he ebpimpinuu ziyà te pultahan kayi te turuǥan. Ne purungi nu tumana sikan is nekaǥi nu.”
11Umbe migkuwa ni Haman sikan is bisti wey kudà ne midsun-uzan din si Mordecai ne impeuntud din duen te kudà ne in-elibet din diyà te inged duma is layun din kebensag te, “Iyan heini ed-ul-ulahan diyà te etew he ebeǥayan te hadì te zengeg su nekepenunuat kandin.”
12Ne hein nepasad haazà midlikù si Mordecai ziyà te pultahan te turuǥan. Ne si Haman, migaanggaan med-ulì is midtembunan din is ulu zin tenged te utew zin kegkeeled.
13Midtudtul zin diyà te esawa zin he si Zeresh wey zuen te menge emiǥu zin sikan is langun he veǥu pa he nehitavù kandin. Ne migkaǥi ziyà te kandin is menge sumesambag din wey esawa zin te, “Egkenaneynaney ke en egkezaag ni Mordecai. Kenè nu sikandin egkezaag su Judio sikandin. Ne siguradu iyan ka egkezaag.”
14Ne zutun te kemulu pa sikandan ebpelelelaǥà, nekeuma is menge sineriǥan duen te hadì, ne migègaanan dan dumaha si Haman diyà te in-andam ni Ester he idlavung.
