1Tama Mosesgo po geninama weyu, te po wali, “Tialima, augwaligo te bidi mego sogoli dinama, ma augwaligo agai gasa sese togwai bidi yai baso da, aga te Godigo we bidi hani tomoba pelamuo, augwali deliba sisinama, Godibolo lotu po wabo sogo.”
2“Tialima, bidi mego te we me dali penani sę elama, tama wai ame naibaso da, teda te wai te Genuai Bidigo we bidi hani tomoba me aselamuo. Tama agai wai hani me, augwali nosali te Genuai Bidigo we bidi tomoba aselamuo, te wąį hani nosali ame neyu, neyu idu gelama, tama hani sibi nogo siba usu nenama, tama te nosali ame nabo bage augwali te Genuai Bidigo we bidi hani tomoba asobo te usu dao, te nosali mu,” wali.
3“Te Amon hani me Moap hani me, augwali te Genuai Bidigo we bidi hani tomoba aselamuo, augwaligo hani wąį nosali ame neyu, neyu idu gelama, tama hani sibi te nogo siba usu nubosi da, nosali mu, teda augwali te Genuai Bidigo we bidi hani tomoba asomainao.
4Te tama tiabo page da e tama dao. Da te Isip tagalama asali sogo, augwaligo da nai mawai menio, te wę me da me mawai menio. Tama augwaligo Balam abelama, da Godigo dolomainu yao wabo po omainogo abelai dao. Balam da, te Beorgo ogwa dao, te hanu Petor, te Mesopotemia bulu bidi dao.
5Tiali goli, Genuai Bidi dago God aga te Balamgo po odobeo, menio. Agai te da dolomainogo wali dwai po dabe, te po te wiegi yai po naga iliyu yai dao, te da tau sabo po nigiliyu yai dao. Magi baso menio. God agai da godolo mu ebaso.
6Tama tialima, dagego tigidali sogo te we bidi augwali dali abagi dao weyu, dwagi yai bidabo bomai po augwali dali dąų wagimio.
7Tama te Idom me Isip dabe meba dage dali bidaibao. Tialima, dagego te Idom dabe dali dwai homu me elamo dao. Magi baso meni, augwali te duga deli kaneme dao. Tama me ma, dagego te Isip dabe dali me dwai homu me elamuo, magi baso meni, polobadu dage augwaligo bulude te bulu meni yai bage tiwai tede bidai dao.
8Augwaligo hani wąįgo waidu gagalasa, augwali te Genuai Bidigo we bidi hani tomoba asobo te usu yaibao,” Mosesgo te po wali.
9Tama Mosesgo po geninama weyu, te po wali, “Te dage hwįainogo pabo sogo da, tama dagego ami bidi dabe te pesage nigali tede bidibaso me, teda augwali te Godigo gedude dwai nai dabede wi homu yao.
10E tama tiwai yao. Tiali te bidi me hulide piai madi agai naide aga gasadu wę olo dali pedalai baso da, teda aga te bidibo pesage taga pelama, bulu badu bidigi pomainao.
11Tama aga pio wę bugagia paulama, tama pio giliga iba dega sainogo ebode aga te bidibo pesageba ma asomainao,” wali.
12“Te ami bidi dabego poi tabo pesage me di tabo pesage bidibo pesage bulu badu deli madi naga elalumainao.
13Tama te ami bidi dabego te ni dage me deli augwaligo sabiliyu emainao. Tama augwali di tainogo da, augwaligo te ni dagego tǫ dogolama, di telama, tama ma halumainao.
14Genuai Bidi dago God tigidali sogo dage dali te kem nigilama bidibo pesagede bidaibao. Te dagego te boi bidi aiyaba elalumainogo tau siyu bidaibao. Tama tiyu, dage bidibo pesage agai gedude wiegi yai mu elalumainao, te tigidali sogo. Dagego Godigo gedude meda yai sę me deli elamo dao. Tiyu, Genuai Bidigo dageba tudi ola maiabuo,” wali.
15Tama Mosesgo po geninama weyu, te po wali, “Tialima, te olo sę bidi me deli aga te dage Israel dabego tǫ bulu badu bidiyu, tama aga tonalubo bidide wi pelama, tama aga dageba aselama, aga tau somainogo hanalu wagasobaso da, teda dagego aga ma tagala paligio.
16Tialima aga dagego hanu me deliba bidigi painogo ebaso da, te usu dao, aga bidigi pomainao. Tama dagego agaba dwai sę me elamo dao.”
17“Dage Israel dabe, dage te Israel hani isąwai we bidi dabego tibo godigo lotu bede penani we penani bidi gagalamo dao.
18Me, te penani sę elama sai mone te Godigo lotu beba sela aselamo dao. Te habu mu dao. Dagego agabolo dąų wali po me deli usu nainogo eyu, te Genuai Bidi dago God agai beba seselamo dao. Agai te niwai we ma bidigo te tobage kolesaga ebode agai dwai homu mu ebo dao,” te po wali.
19“Tialima, dagego duga abagigo dagego mone negeli sainogo elama da, teda dagego te monede ugwadu gasa mone me daganama selamo dao. Tialima, augwaligo tubo naide negeli sobaso, me o gasa meba nai dabede negeli sobaso da, teda dagego te negeli yali nai wei ponama, gasa ugwadu me dagana ma mao po olamo dao.
20Tialima, dagego gasa hani mego dageba negeli somainu yai da, te Israel hani isąwai bage, teda dagego augwalide te ugwadu daganabo mone sagameo. Tiali goli, duga abagi solo mu da, te Israel hani bagede, me tilamo. Menio. Dagego te bomai po wali pelama, tama Genuai Bidi, dago God, agai dagego te ebo sę dabe sese tama wiegi yai mu ilaibao, te dage megi te bidigi painogo ebo te tǫde tama tiaibao.”
21“Tialima, dagego Genuai Bidi dago God agabolo po me deli dąų olama wai baso da, teda dagego te po polo usu nao. Teda Godigo dagego dąų wali te po gegeda pogobeo, tama dagego te dąų wali te po usu nisąma ebaso da, teda Godigo gedude sęgę saibao.
22Me ma, dagego Genuai Bidiba po me dąų wasiąma yali da, teda dagego sęgę me sogobeo.
23Tiali goli, dagego duga digi duga homugo Genuai Bidiba po me dąų walai baso da, teda dagego te dąų wali te po wali pelama, tama mu tama yao,” wali.
24“Tama dagego duga abagi dedego wain gidu nogegi soayu da, teda duga homugo te wain du meba selama tuiąo. Tiali goli, dagego te du hauwa wade bulama, sela pelamo dao.
25Ma, dage duga abagigo wit gidu nogegi peyu da, teda wit ge dagego nogogo gugudu piagameo, tama dagego tuiagameo. Tiali goli, dagego te wit hauwa sarip hwągo togolamo dao,” Mosesgo te po wai.
