Dↄaanaↄ 5:10-30

Click on verse(s) to share them!

¹⁰Á gbɛ̃́ pↄ́ á di zàa'ĩn pua kpɛↄ á gbɛ̃́ pↄ́ á zↄ̃lɛ tɛfɛniwapiↄ ń á gbɛ̃́ pↄ́ á bɛ kɛ̀sɛↄ, à a yã'o.

¹¹Gbɛ̃́ pↄ́ kãaaa ítↄkĩiↄ zↄa dↄ, aa Dii maakɛaↄ dàu lɛ́ siunɛ́, Isailiↄ kíaↄ zĩblè, ↄ̃ Dii gbɛ̃́ↄ sù ń wɛ̃́lɛↄ guu.

¹²Fɛlɛ Debolaa! Fɛlɛ! Fɛlɛ lɛsi! Fɛlɛ! Abinↄaũ nɛ́ Balaku, fɛlɛ dↄaa n zĩ̀zↄↄnɛ.

¹³Ɔ̃ gbɛ̃́ pↄ́ gↄ̃̀ↄ bↄ̀ mↄ̀ kíaↄ kĩ́i, Dii gbɛ̃́ↄ mↄ̀ ma kĩ́i ń nɛgↄ̃naↄ.

¹⁴Ɛflaiũ bui pↄ́ aa Amalɛki buiↄ fùↄ ń Bɛ̃yãmɛɛ buieↄ tɛnzi. Makii buieↄ dɛ dↄaanaↄ ũ, Zabulↄni buieↄ gopana kũa.

¹⁵Isakaa bui kíaↄ kú ń Debolaao, Isakaa buiↄ kú ń Balakuo, aa sìaànↄ gusalalau. Lubɛni bui gãliↄ seakɛ̀.

¹⁶Àkɛa a gↄ̃ kĩnaↄ saɛ, álɛ kulɛpɛa sãↄnɛ mai? Lubɛni bui gãliↄ seakɛ̀ maamaaɛ.

¹⁷Galada bùsudeↄ gↄ̃̀ Yuudɛ̃ baale. Àkɛa Dã buiↄ zɛ̀ ń ń gó'ilɛnaↄi? Asɛɛ buiↄ zↄ̃lɛ ísialɛ, aa gↄ̃̀ ń godↄkĩiↄ.

¹⁸Zabulↄni buiↄ fɛ̃na wò, aa a kpɛ́ vũ̀aa, Nɛfatali buiↄ kɛ̀ gulɛsĩↄu màa lↄ.

¹⁹Kanaa bùsu kíaↄ mↄ̀, aa zĩkà Taanaki Mɛgido swa saɛ, kási aai àizɛɛ sɛ́lɛ tàòo.

²⁰Za musu saanaↄ zĩkà, aa bↄ̀ ń zɛ́u, aa zĩkà ń Siselao.

²¹Kisↄ̃ swa zipi tàńnↄ. Má gɛ́ aɛ, mí gɛ́ ń gbãao.

²²Sↄ̃́ gbãaↄ lɛ́ bàalɛ, an kɛ̀sɛ kↄ̃fĩ dↄ.

²³Dii Malaika mɛ̀: À Mɛlozu ká, à lɛkɛ Mɛlozudeↄnɛ maamaa, asa aai mↄ dↄ̀ Diilɛo, aai dↄ Dii nɛgↄ̃naↄlɛo.

²⁴Nↄɛ báaaden Ɛbɛɛ na Yaeli ũ, Keni bui nↄɛpi báaa vĩ zwã̀akpɛdeↄ guu.

²⁵Sisela í gbɛ̀awà, ↄ̃ à vĩ kpàwà, à vĩfãai kpàwà ta ↄde guu.

²⁶À ↄbↄ̀ zwã̀akpɛ kálo sɛ̀, à masana kũ̀ ń a ↄplaao, ↄ̃ à Sisela lɛ̀ò à aà mi wì, à aà swãgɛ̃zĩ fↄ̃̀ à aà tↄ̀lↄzↄ̃̀.

²⁷Sisela gofanlɛ à lɛ̀lɛ aà gbá saɛ, ↄ̃ à gↄ̃̀ wúlɛa we. À gofanlɛ à lɛ̀lɛ aà gbá saɛ, gu pↄ́ à gofanlɛ à lɛ̀lɛu, we à gàu.

²⁸Sisela da wɛkpàlɛ fɛnɛntiu, à wiilɛ̀ fɛnɛnti mↄↄ fòou à mɛ̀: Bↄ́yãi aà sↄ̃́go kpɛ́ e tiai? Àkɛa aà gbɛ̃́ↄ sↄ̃́goↄ kↄ̃fĩ dↄo ni?

²⁹Aà nↄɛ zĩkɛna ↄ̃nↄnaↄ lɛ́ oɛ̀, ↄ̃ a tɛ́ ń lɛgbɛi láasai à mɛ̀:

³⁰Aalɛ pↄ́ↄ naaaɛ, aalɛ kpaalɛkↄ̃ɛɛ, baade ń a wɛ̃́ndiao mɛ̀ndodo ge plapla. Aalɛ zwã̀a wɛdeↄ naaa Siselaɛɛ, zwã̀a wɛde wɛ̃̀sãdeↄnɛ, pↄlↄgãu pↄ́ wà ba kɛ̃̀wàↄɛ.