Sounkopwung Kan 5:10-30

¹⁰Kumwail pil iang koasoia, kumwail me kin dake ahs pwetepwet kan, kumwail me kin ket pohn mehn dakadak kan, oh pil kumwail me kin weid nanial akan.

¹¹Kumwail rong! Ngilen aramas ngeder me peipeido sang limwahn pwarer kan, wasa re kapikapinga sapwellimen KAUN-O roson en powehdi, en mehn Israel kan roson en powehdi! 1 Eri sapwellimen KAUN-O aramas akan ahpw kapareisang nan ar kahnimw akan.

¹²Tiengla, Depora, tiengla! Tiengla! Tiakada apwoat koulen! Tieng mwowe! Kohkohwei, Parak, nein Apinoham, kohkohwei, kahluwawei noumwi me selidi kan!

¹³Me loalopwoat kan eri pwarpene rehn arail kaun akan; sapwellimen KAUN-O aramas akan pokonpene reh, onopadahng mahwen.

¹⁴Re mwekid sang Epraim mwekidlahng nan wahwo, mwurin kadaudok en Pensamin oh ienge aramas akan. Kaun lapalap en sounpei kan kohdihdo sang Makir, kaun tikitik kan sang Sepulon.

¹⁵Kaun akan en Isakar pil kohdo iangahki Depora; ei, Isakar oh Parak pil ketido, re ahpw idawehnla Parak nan wahwo. A Kadaudok en Reupen pwalpeseng; re peikasalki ma re pahn iang kohdo, de soh.

¹⁶Dahme re mihmihki rehn sihpw akan? Pwe re en rongorong ngilen silepe kan? Ei, kadaudok en Reupen pwalpeseng; re peikasalki me re pahn iang kohdo, de soh.

¹⁷Kadaudok en Kad mihmihte palimesehn Sordan, oh kadaudok en Dan mihmihte ni sohp akan. Kadaudok en Aser me mi limwahn oaroahr, re mihmihte wasao.

¹⁸A Sepulon oh Napdali, iei kadaudok riau wet me pangala ara mour nan mahwen.

¹⁹Nanmwmarki kan samwodohr oh mahwendahr nan Taanak, ni keilen piletik Mekiddo. Nanmwarkien Kenan kan mahwendahr, re ahpw sohte wahsang silper.

²⁰Usu kan pil mahwen sang pahnlahng; ni ar kotekoteseli pahnlahng, re pil mahweniong Sisera.

²¹Ahd kehlail en Kison kapeiraillahr, ahden pillapo me kin pwilipwil sohte kommoal. I pahn wenewei, wonewei mwowe ni kehlail!

²²Mie kumwukumwusek en ngilen nehn oahs akan pohn pwehl ni ar tangatang kohwei.

²³Tohnleng en KAUN-O ahpw mahsanih, “Sapwen Meros en riahla,” “Towe kan koaros en riahla. Re sohte kohdo sewese KAUN-O, nin duwen sounpei kei me pahn mahwenki ih.”

²⁴Sael me keieu pai nanpwungen lih akan, werek en Eper, mehn Ken— meid pai nanpwungen lih akan me kin kousoan nan impwal kan.

²⁵Sisera peki pihl reh, a e kihong milik, e wadohng milik nan dahl lingan ehu.

²⁶Sael koleki palimeingi kisin tuhke pwonopwon oh keng sang ni impwalo, a ni palimauni ama toutou ieu. E pasurdiong kisin tuhkeo nan moangen Sisera oh pwar moangeo, sang apali moange lel apali.

²⁷Ohlo eri pwupwudiong nan taht limwahn nehn Sael, pinipintatseli, e lao mehla. E pwupwudiong limwahn nehn liho nan tahto, e pwupwudiong nan pwehlo oh mehla.

²⁸Inen Sisera kilikilengla sang ni wenihmwtok, e kesikesihnen limwahn perehpen wenihmwtok oh mengimengloalki, “Dahme were werennansapwo nohn pwand en pwerdohki? Dahme nah oahs kan nohn pwandki?”

²⁹Me loalokong rehn eh lidu lih akan sapeng, oh pein ih ahpw iang medemedewe nan kapehde,

³⁰“Re mwein nenehk dipwisou lohdi kan, peinakapw emen de riemen ong sounpei men, likou lingan ong Sisera, elin tuhke kesempwal, mwaren lih nanmwarki?”