Gabunga 5:10-30

¹⁰Hagalangahia go goodou ala e llele i hongo nia ‘donkey’ kene, e noho i hongo nia lohongo hongo hoodo, mo goodou ala e taele i hongo nia ala.

¹¹Goodou hagalongo! Nia lee daangada dogologo e hagalongoaa mai i nia monowai e haga hagaamu nia maaloo Dimaadua, nia maaloo digau Israel! Gei nia daangada Dimaadua e lloo iha i nadau waahale.

¹²Dagi gi mua, Deborah, dagi gi mua! Dagi gi mua, huwa taahili! Dagi gi mua! Hanadu gi mua, Barak, tama daane a Abinoam, dagia au gau galabudi gi daha!

¹³Ge digau manawa dahi ga loo iha gi nadau dagi, nia daangada Dimaadua ga loomoi gi Mee, gu togomaalia e heebagi.

¹⁴Digaula ne loomoi i Ephraim gaa hula gi lodo di gowaa mehanga gonduu, i muli di madawaawa Benjamin mo ana daangada. Nia dagi dauwa aamua ne loo iha i Machir, nia dagi lligi ne loo iha i Zebulun.

¹⁵Nia dagi o Issachar ne loomoi dalia Deborah. Gei ogo Issachar gu hanimoi mo Barak, gei digaula ne daudali a mee gi lodo di gowaa mehanga gonduu. Gei di madawaawa Reuben la guu wwae, digaula gu deemee di maanadu be ginaadou e lloomoi be deeai.

¹⁶Digaula ne noho dalia nia siibi eiaha? Ne noho belee hagalongolongo gi digau hagaloohi siibi ala e gahigahi nia hagabuulinga manu? Uaa, di madawaawa Reuben la guu wwae, digaula gu deemee di maanadu be ginaadou e lloomoi be deeai.

¹⁷Di madawaawa Gad la guu noho i bahi i dua Jordan, gei di madawaawa Dan la nogo noho hua igolo i baahi nia wagabaalii. Di madawaawa Asher la nogo noho i baahi gi tongotai, digaula e noho i taalinga tongotai.

¹⁸Gei nia daangada o Zebulun mo Naphtali gu de hagahuodia nadau mouli gi lodo tauwa.

¹⁹Nia king ne loomoi ga heebagi, nia king o Canaan gu heebagi i Taanach, hoohoo gi tama monowai o Megiddo, gei digaula digi kae nadau silber.

²⁰Nia heduu gu heebagi mai i di langi. Mai i nadau maanege i di gili di langi, digaula ne heebagi gi Sisera.

²¹Di labagee i lodo di monowai Kishon la guu mmoli digaula gi daha, di monowai Kishon dela e mmidi i di waalooloo. Au e haele, e haele gi mua maaloo!

²²Gei ogo nia hoodo e llele adu, e dagadagahi nia gelegele gi nadau wae.

²³Tangada di langi o Dimaadua ga helekai, “Hagahalauwa ina di waahale go Meroz, haga halauwa ina digau ala e noho i golo, idimaa, digaula hagalee ne loomoi belee hagamaamaa Dimaadua, digaula hagalee ne loomoi be digau dauwa e hai teebagi a maa.”

²⁴Di ahina dela koia e kaedahi e maluagina huoloo la go Jael, di lodo o Heber tangada o Kenite, go di ahina dela e kaedahi e maluagina i nia ahina ala e noho i lodo nia hale laa.

²⁵Sisera ne dangi gi mee i nia wai, gei mee gaa wanga nia milugu. Mee ne gaamai ana milugu gi mee i lodo di boolo madamada.

²⁶Mee ne dahi aga dana dama laagau e gaa bungubungu i lodo dono lima, mo di haamaa i lodo di lima dela i golo, gaa tugi di laagau gi lodo di libogo o maa. Mee ne daalo di libogo o maa gi bongoo.

²⁷Sisera ga hagabiga ia gi hongo ono duli, gaa hinga gi lala gi baahi nia wae o Jael. Gi baahi nia wae o maa dela ne haga biga iei mee gi ono duli, gaa hinga gi lala. Mee ne hinga gi hongo di gelegele, guu made.

²⁸Tinana o Sisera gaa mmada gi daha laa lodo di bontai dulii, mee gaa mmada laa tua tama bontai, gaa dangi gi nua, “Di waga hongo henua o maa e aha dela e duainau dono hanimoi? Nia hoodo a maa e buna di loomoi i di aha?”

²⁹Nia hoo kabemee o maa ga hagi anga gi mee, gei mee ga tataanga helekai ang gi deia boloo,

³⁰“Digaula holongo e duwweduwwe nadau mee ne kumi, di ahina e dahi be dogolua ang gi tangada dauwa e dahi, nia gahu madamada ang gi Sisera, nia mee guu hai ginai nia duaina ang gi di uwa di lodo di king.”