JUECES 5:10-30

¹⁰Nochi tiisraelitame ma tijhueyichihuaca TOTECO. Nochi tlen ricos huan tlen tlejcoj ipan burrojme chipahuaque, huan tlen mosehuíaj campa tlatzotzoltic ma paquica. Huan nojquiya ma huicaca nochi tlen teicneltzitzi huan monequi nejnemise. Nochi ma tihuicaca ica tlascamatili.

¹¹Inijuanti tlen quimatij tlatehuíaj sampa mosentilíaj campa ameli ininhuaya tlen quinamacaj ininborregojhua. Nopona nopa soldados tlen tlatlantoque tepohuilíaj quejatza nelía hueyi tlen TOTECO quinchihuili, yonque san teicneltzitzi. TOTECO quichijqui para tiisraelitame ma tlahuel titlatlanica. Huan huajca ama nochi tiisraelitame, tojuanti tlen tiitlacajhua TOTECO, sampa timosehuíaj campa puerta huan tiitztoque ica yejyectzi.

¹²Xiisa Débora. Xiisa huan xihuica se huicatl. Huan ta Barac, tiicone Abinoam, ximotlalana. Xiquinhuica nopa tlacame tlen tiquinitzquitoc ipan tlatehuijcayotl. Ma mitztequipanotij.

¹³Temoque nopa israelita tlacame tlen motemacayayaj. Yajque motehuitoj ininhuaya inincualancaitacahua. Nopa tlacame tlen iaxcahua TOTECO motecpanque huan yajque, yonque ax nesiyaya intla huelis tlatlanise.

¹⁴Hualajque israelita tlacame tlen tlali Efraín campa nopa amalecitame achtohui itztoyaj. Huan quintoquilijtiyajque isoldados tlen nopa hueyi familia Benjamín. Nopa tlanahuatijca israelitame hualajque tlen itlal Maquir. Tlacame tlen nopa hueyi familia Zabulón hualtemoque.

¹⁵Nojquiya nopa tequitini huan soldados tlen nopa hueyi familia Isacar temoque hasta nopa tlamayamitl ihuaya Débora. Huan iteipa ixhuihua Isacar quipalehuijque Débora huan Barac quipalehui nojquiya. Quena, moisihuiltijque para tlapalehuise. Pero iixhuihua Rubén ax yajque.

¹⁶¿Para tlen mocajque ininchaj iixhuihua Rubén campa tzactoque ininborregojhua? ¿Huelis san quintlacaquiliyayaj nopa tlamocuitlahuiani quema quinnotzayayaj inintlapiyalhua ica tlapitztli? Iixhuihua Rubén ax pajca itztoque para ax yajque.

¹⁷Iixhuihua Galaad mocajque ne seyoc inaliyo Jordán huan iixhuihua Dan mocajque campa nopa barcos. Iixhuihua Aser mocajque iteno hueyi atl huan ax mijcuenijque campa itztoyaj. San mosiyajcahuayayaj.

¹⁸Pero iixhuihua Zabulón ihuaya Neftalí, inijuanti, quena. Yajque tlatehuitoj huan ax quichihuilijque cuenta intla miquisquíaj.

¹⁹Huajca nopa tlanahuatiani tlen cananeos hualajque tlatehuicoj nechca altepetl Taanac, campa pehua nopa atl tlen altepetl Meguido, pero ax tleno quitlanque. Ax quihuicaque niyon se tomi.

²⁰TOTECO huan nochi sitlalime ipan elhuicactli techpalehuijque para tijtlanise Sísara.

²¹Elqui queja nopa atlajtli Cisón tlejcoc miyac huan nochi quinhuicac. Quena, quinhuahuatatzqui nochi ininmijcatzitzi. (Ma quipiya fuerza noyolo para nijtlamiltis ni nohuica.)

²²Huajca caquistic nopa cahuayo tecactli pampa motlalojtiyajque. Yonque tlahuel motemacayayaj nopa soldados ipan inincahuayos, quistejque ica majmajtli.

²³Ielhuicac ejca TOTECO quiijto: ‘Xiquintelchihua tlen ehuaj Meroz.’ Ma itztoca senquistoc tlatelchihualme tlen nopona itztoque, pampa ax hualajque quipalehuicoj TOTECO para quintehuise icualancaitacahua tlen nelía elque tejtetique.

²⁴Pero niquijtohua tlahuel xijtiochihua nopa sihuatl Jael, isihua Heber, nopa quenita. Más ma quitiochihua Jael que nochi sihuame tlen mocahuaj ipan yoyon caltini.

²⁵Sísara quitlajtlani atl huan Jael quimacac lechi. Ipan se taza tlen yejyectzi, quimacac crema.

²⁶Ica se ima quicuic nopa cuaestaca huan ica inejmatl quicuic se martillo tlen ica quimaquili Sísara ipan itzonteco. Quicuacoyoni huan panoc ipan itzonteco nopa cuaestaca.

²⁷Huan nopona campa huetztoya, mijqui. Quena, iicxitla Jael huetztoya huan nopona mijqui.

²⁸Inana Sísara mocuesohuayaya, huan tlachiyayaya ipan ventana para quiitas intla huala. Moilhuiyaya: ¿Para tlen ax huala Sísara ica icarro? ¿Para tlen icarro huejcahua, huan ax caquisti para huala ica cahuayo tecactli?

²⁹Huan inana moilhuiyaya para melahuac tlen isihua tlatequipanojcahua tlen más tlalnamiquij quiilhuiyayaj. Inijuanti quiilhuiyayaj:

³⁰‘Huelis miyac tlamantli mocuilijque quema tlatlanque, huan ama nochi moajachihuíaj. Huelis sesen soldado quitocaros se o ome ichpocame huan Sísara quitocaros nopa yoyomitl tlen más yejyectzi ica miyac colores. Huelis nechhualiquilis miyac tlamantli tlen yejyectzi tlajtzontli. Huan tlen más yejyectzi tlaijilpili mocahuas para moquechcostis iquechtla ya.’