Mumutara Ŋic 5:10-30

¹⁰“Becâsic qaŋqaŋko rac warec eeŋgopieŋ â fofo qoruc furi sâkoo ŋeeŋgopieŋ â hatao kikezi jueŋgopieŋ ŋoŋe irec biŋe musaweniŋ.

¹¹Opâ fifia tomao gae woŋgâŋ ehuc Wofuŋzi eebapa biaŋ Israe hae sâc bâfuakac irec biŋe murâ mu enʒepieŋ. Eme Wofuŋte ŋicfâc jaŋe haesac motâcko humbiŋ.

¹²“Ajoc, Debora, go faharec! Faharerâ gae moc hec! O Abinoamte ŋokâ Baraki, go faharerâ râsifâcge ʒikao rocjopakicne jaŋe kâpâcwâruo bacjopa rac.

¹³Iŋuc fuame Wofuŋte ŋicfâc fekicne uuc ʒanʒaŋne jaŋe tâpirihec râsi fisi‐jarembiŋ.

¹⁴Benjamiŋ ŋicfâc ŋoŋere râpeo Eferaim mâreŋkoneczi wahambiŋ. Jaŋe gâtâ‐jeŋic i Amaleke mâreŋko fokac. Makiri guruonec ine mumutâc ŋic jaŋe wahambiŋ. Ehame Sebuloŋ guruonec momori micne jaŋe wahambiŋ.

¹⁵Isasa guruonec fekicne jaŋe ine Deborahec fisimbiŋ. Eme Isasazi Baraki micne reŋkewec. Ehuc wâneŋko jume ju boc embiŋ. Ehame ŋifec Rubeŋte guruo ine maŋ ŋeŋemâc fuawec.

¹⁶Go wemocte lama sapa ŋondeŋko dameŋ ʒora lama guru jaŋere qeŋ qapie manacmurâ woŋec jumeŋ? Rubeŋ guru jaŋerao maŋ mâmâcne fuawec.

¹⁷Gileade e Jordaŋ ŋifecnao jusanaŋkewec. Â Daŋ guru jaŋe wemocte wokeo kiŋaŋ gie bambiŋ? Ase guru jaŋe hâwecmecko juhuc hâwec raʒikicnao ŋesanaŋkembiŋ.

¹⁸Sebuloŋ guru jaŋe ine juju‐jeŋicte manabâc mi embiŋ â Naftali jaŋe wâc tiki hae mâreŋ‐jeŋicko iŋuc jaha embiŋ.

¹⁹“Ŋicwofuŋ jaŋe fisirâ ʒika qambiŋ. Wahapie Kanaaŋ ŋicwofuŋ jaŋe wâc Tanaki haeo Megido opâ heririŋko ʒika qambiŋ. Erâ sifu râsifâc‐jeŋic jaŋere mateŋ moc mi rombiŋ.

²⁰Sambâŋkonec bâpiŋ jaŋe hata‐jeŋic sâc juhuc Siserahec qaqac embiŋ.

²¹Kisoŋ opâ ɋiɋicnea gasackehuc foekac izi râsi amec‐jopa rawec. O maŋnane, go tâpirihec erâ âtec‐jopac!

²²“Eme becâsic kike fânâŋ sâko fuakac, becâsic jaŋe wisehuc gasacke sâqoreŋgopieŋ.

²³“Wofuŋte aŋelo e ʒiŋuc mukac: ‘Meroʒi hae rune jaŋe Wofuŋzi Israe momorifâc‐jeŋic bafic‐jopahame mi fisimbiŋte, hae‐jeŋic i sâweckezo.’

²⁴“Keniŋic Hebere ere ŋonâŋ Jaele e ŋokac sasawa jaŋere femicne, ŋokac bozeo ŋec juc eeŋgopieŋ jaŋere ŋondeŋko e hâcne mumbiaŋkezo.

²⁵E Siserazi opâre numucneme susu râcnewec. Susu râqârekicne i ŋicbomboŋ râqâcko bafisicnewec.

²⁶Erâ meticnezi fâzâ rowec. Ehuc fâre‐ticnezi gieŋic jaŋere hama rorâ Sisera qanʒaŋnewec. E qizec‐ticne qanʒaŋnehuc naki‐ticne âke mârâŋkewec.

²⁷Eme kike fuŋnao waha qarâ hâmocne fowec.

²⁸“Eme Sisera neŋgoc‐ticne e qâqâtâc kataŋ aaŋ bakicne ira firâ râqârewec. Ehuc muwec: ‘Wemocte ʒika keretac‐ticnezi biac mi warekac? Â wemocte keretac fâfâre becâsic jaŋere kike fânâŋ dameŋ ʒoranehec ekac?’

²⁹Eme ŋokac maŋɋârâŋhec jaŋe irec fârine âzâcnembiŋ. Ehame e sifu dâŋticne i hâsi fâri jaha muhuc domawec.

³⁰‘Jaŋe ʒikare mateŋ i bâfuarâ rohuc bâtâc mi baŋgopieŋ me? Ŋic sâc ŋokac naru mocjaha me jajahec mecne? Siserare ŋaqi jâweczi rikekicne â mateŋ gâcne hawari biaŋ erâ upe‐nanere eri qoqonaŋ jajahec bafisi‐nareocmu mecne.’