Jueces 5:10-30

¹⁰”Bemar moli-uayasuid-ome-sipugwadgi nanamaladi, e-birgi mor-nuegangi be sigmaladi, be nue dulemar-namaked itomar. Degine, bemar nagab-nanamalad, be nue dulemar-namaked itomarmo.

¹¹Dulemar molimar-dii-gobnonidaed-nagaba namakbukwadi, Bab-Dummad-e-igar-innikigwadba-ibmar-imakedgi namakmalad. Degi, Israel-sorda-bila-onomalad-igar-innikigwadba-ibmar-imakedgi namakmalad. ”Geb Bab-Jehová-e-dulamar, neggwebur-yawagakse nadmalad, sogdemalad:

¹²‘Débora, namake, namake, namaklegedgi be namake. Abinoam-machi-Barac, ogusa, dule-gasmalad be sede.’

¹³”Dule-besmaladi, dule-nuga-nikamaladba nonimalad. Bab-Jehová-e-sorda-bila-onomaladi, dule-gandikmaladba anse nonimalad.

¹⁴Efraín-sordamar-Amalec-dulemargi-danikid nonimalad, a-sorbali, Benjamín-sordamar danigusmogad. Maquir-wagan-sorda-dummagan nonimalad, Zabulón-neg-akar dule-idumalad-gangued-nikamalad nonimarmogad.

¹⁵Isacar-e-dummagan, Déboraʼba nadmarmogad. Baracʼba, Isacar-e-sordagan nadmarmogad, bila-onogedgi Baracʼba nebase duurmakdemalad. Rubén-e-sordamardi, mer-naega yamo arbaed-dummad onosmalad.

¹⁶¿Ibiga bemar sibad-wawaad-edarbemalad-e-goled-itogega, sibad-wawaad-e-galugi be besmala? Ar Rubén-e-sordamar nue-dobe itosmalad.

¹⁷”Galaad-e-sordagandi, Jordán-diwar-obakar besmalad. Dan-e-sordagandi, ur-dummagan-walik besmalad, Aser-e-sordagandi, demar-gaka-naba besmalad, sukunyaba e-urmar-edarbemamai gusmalad.

¹⁸Zabulón-e-sordamala, bila-onogedgi burgwed-naga gusmalad. Neftalí-e-sordamala, bila-onogedgi burgwed-naga gusmarmogad.

¹⁹”Canaán-dulemar-e-reymar Taanac-neggweburse nonimalad, Meguido-dian-asabin bila-onosmalad. Degi-inigwele, manimala, degi, ibmar-nuegana gwen sessurmalad.

²⁰Nibaneg-akale, niisgwamar ulusad. Niisgwamar e-nanaid-akale, Sísaraʼgi gwichigusad.

²¹Canaán-sordamar, Cisón-diwar obelolesmalad. Cisón-diwarde, gusgu dikasurgus-maid. Ani an Débora-gued, ¡Gandikidgi an naoed!

²²”Sísara-e-molimar binnasuli abarmakmamaidba e-nagmar binnasuli-gornadapi gusad.

²³Bab-Jehová-e-baliwitur weyob sogded: ‘Meroz-dulemar be sabsur-ukabsasun. We-dulemar gwen Bab-Jehová-sordamar-bendakapsurmalad, degi, dule-gandikmaladgi gwen bendakapsurmarbalid.’

²⁴”Israel-dulemar-omegan-abargi, Heber-e-ome-Jaelʼgi nued binsalesun, omegan-dordonegyaba-bukwamaladba bur bule egi nued binsalesun. Heberʼde Ceneo-duled.

²⁵Sísara, Jaelʼse dii-egichis gusad, Jaelʼdi moli-nunisgi ogobsad, dule-nuga-nikamaladbi-gobed-noggi moli-nunis-ollikwagwadgi ogobsad.

²⁶Jael e-argan-sapiledsik dordoneg-abingaed-suar susgusad, e-argan-nuedsik mardo-dummad susgusad. Geb a-ibmargi Sísara-sarsosad, e-nono daasa imaksad. Dordoneg-suargi uaya-matarba Sísara-bioksad, daksik-noedse imaksad.

²⁷Jael-asabin Sísara sinnii napagi-melleded, napagi meremai gusad, napagi-meremai burgwisad.

²⁸”Sísara-e-nan, yawagak-bipigwad-dale-daledba atakalid, e-machi-yoggud-dakedbali sabsur sogded: ‘¿Ibiga an-machi-e-ur-napagined yoggumai? ¿Ibiga e-ur-napaginmalad-goled itolesuli?’

²⁹Omegan-binsaed-ibegan-e-walik-gudimalad ega sunmaksamalad. Geb e-nan omegan-sunmaksadba sogdemogad:

³⁰‘Ibmarmar-nued amismarsua, a-miminanairgebed: Sordamar-iliba, yagan-war-wargwen mimilenairgebed, igi, war-warbodibe. Sísaraʼgardi, mor-nuegan-akar-akar-dakleged uklenairgebed. An-dukargi-nasikega mor-akar-akar-dubgi-sobarmalad, mor-yeerdakleged-bela-dubgi-sobarmalad uklenairgebed.’