Aposolo Jaŋere Binaŋ 28:20-26

²⁰Eme no irec hâcne honec‐ŋoparâ ŋoŋehec muc manac enaŋte hefârec‐ŋopape fisimbieŋ. No ine Israe ŋic woworic‐nâŋec ewec ere erâ kâpâcwâru ŋic epo jukopac ʒi.”

²¹Iŋuc muhuc jazame mumbiŋ, “Ocna Judaŋic mâreŋfuŋ‐nâŋecko jueŋgopieŋ jaŋe gore dâŋ mi qâreŋke‐nârembiŋ me ŋicjeŋic moc mi sorepie ware gore bahacdâŋ mume manambeŋ.

²²Irec dâŋ bajuekic i go gahac mutec mananaŋte muŋgopeneŋ. Â opâ ruakicne jaŋere ʒiŋuc manaeŋgopeneŋ: Mâreŋ sâc ŋiczi mu supaic ejareeŋgopieŋ.”

²³Iŋuc murâ ʒâfo babac embiŋ. Eme i maickeme Judaŋic bocjahazi Paulore ficko tumaŋnembiŋ. Eme Anuture uucmaŋte dâŋ binaŋ uupicte fuŋkerâ jazahuc juhame hae ŋafewec, ehuc Mosere sâcmutâc dâŋqâhâcko â porofete jaŋerao biŋedâŋ qâreŋkekicne fokac i Jesurao fâri fideteŋ ewec, irec fuŋne muhuc maŋuruc qajarewec.

²⁴Ejareme ŋic gâcne jaŋe dâŋticne âgo bambiŋ â gâcnezi ine qaisockembiŋ.

²⁵Ehuc mu qaqatarac epie Paulozi dâŋ mocjaha ʒiŋuc jazawec: “Tiri Mârozi porofete Jesaja ecneme mimiŋnefâc‐ŋeŋic sowine dâŋ kecʒiŋuc jazawec:

²⁶‘Go rarâ ŋicguru keci ʒiŋuc jazac: Hazeczi mamana i mananiŋmu, maŋzi mamana tara ine mi eniŋmu. Ʒâŋezi fifi finiŋmu, wiac hohone tara ine mi eniŋmu.