20Cascʌdʌ gʌnvaí aanʌ sivi dai gʌnnʌida iñagai dai gʌnaatagida iñagai. Aanʌ anvaavoitudai gʌnʌpan duucai ʌʌmadu vʌʌsi gʌraaduñi judidíu isʌʌqui abiaadʌrʌ Diuusi pocaiti sai ootosa agai ʌmo cʌʌgacʌrʌ vuviadami dai vaavoitudai aanʌ vʌʌsi isDiuusi duduaacalda agai coidadʌ cascʌdʌ vuli aanʌ idi cadeenacʌdʌ ―astʌtʌdai Paavora.
21Tai ʌgai potʌtʌdai: ―Tami maididivai tomali ʌmo oojai Judeeaiñdʌrʌ isgʌaagadagi aapi, tomali ʌmaadutai gʌraaduñi judidíu ismaacʌdʌ daivʌi mʌʌcadʌrʌ maitʌraagidiña tomali ʌmo istumaasi soimaasi aapi gʌvui.
22Cʌʌ maatʌ aatʌmʌ istomasiaacoga ñiooquidiña oodami idi utuducʌdʌ vaavoidaragai cascʌdʌ ʌmo imidagai gʌcaʌca ʌrʌlidi aatʌmʌ pʌsiʌʌlidi aapi ―astʌtʌdai ʌjudidíu.
23Dai poduucai tudu bai dui istuigaco gʌnʌmpaidagi. Dai aidʌsi aayi istuigaco bai dui ʌgai tai gʌnʌmpagi mui oodami ami siaaco gʌuuliñacatadai ʌPaavora. Tai ʌgai ñiooqui quiamoco abiaadʌrʌ urunoco uucami. Dai aagidi isducatai Diuusi soicʌi oodami sai cʌʌgacʌrʌ oidacana Paavora aagidi ismaacʌdʌ ooja Moseesacaru ʌʌmadu aa Diuusi ñiñiooquituldiadamigadʌ dai gomaasicʌdʌ ipʌliditadai isvaavoituldagi isSuusi ʌrcʌʌgacʌrʌ vuviadami.
24Dai ʌʌmoco vaavoitu ismaacʌdʌ aagidi ʌPaavora dai aa gia maivaavoitu.
25Dai maiʌmo tʌgitoidagai viaacatadai dai iimimi. Taidʌ ʌPaavora potʌtʌdai: ―Aliʌsi ʌrvaavoi ismaacʌdʌ aagidi Diuusi ñiooquituldiadamigadʌ Isaía gʌrʌʌqui aaduñicaru. Ʌgai aagidiña istumaasi Diuusi Ibʌadʌ aagidiña ismaacʌdʌ pocaiti:
26Imʌdañi aapi dai potʌʌda ʌoodami: Caʌcamu aapimʌ dai maimaatʌ caʌcamu. Nʌijadamu aapimʌ dai maimaatʌ nʌijadamu ducami iscuupicagi gʌnvuupuji.
HECHOS 28
HECHOS 28:20-26