Tjakultjurinkunytja 28:20-26

²⁰Nganaṉa Yitjurilaku walytja ngaṉṯitja tjuṯa paṯara nyinapayi mayutju Kurayitjaku. Katutjalu yirriṯi palunya watjaṉu wantirriyalkitjangku. Wangka palunya ngayulu kulira nyinangutjangka, tjiinangkaṉiya tayimapiṉu. Tjiinatjarraṉa kutu nyinanyi. Mayutju Kurayitjaku nganaṉa paṯara nyinapayi. Wangka yalatjiwana ngayulu nyurrangarrinya tjakultjunkukitjangku watjaṉu, nyurrangarri ngalyankula ngayula tjungurrinytjaku.”

²¹Mayutju paluru tjana watjaṉu, “Tjuutiyanya ngurrara tjuṯangku wiya piipa yini nyuntunyatjarra wakara ngalya wantirriyaṉu. Palunya ngurrara tjuṯangku wiya ngalyankula nganaṉanya tjakultjunu wangka nyuntunyatjarra. Wiya paluru tjana ngalyankula nyuntunya panypurangkupayi, wiya.

²²Tjakulpalatju kuliṉu yalatji, ‘Ngurra tjuṯawanakunyu Yiitjuku walytja tjuṯa tjungurringanyingka yaṉangu tjuṯangku tjananya panypurangkula yunytjuwiya nyinapayi.’ Nganaṉatju yunytjurringanyi nyuntupa wangka Yiitjunyatjarra kulintjaku. Yaalytjingara nganaṉa piyuku nyuntulawana tjungurriku?, nyuntupa wangka palya kulilkitja.”

²³Puulalu paluru tjanaṯarra watjaṉu tjiṉṯu kutjupangka piyuku tjungurringkunytjaku. Tjiṉṯu palula paluru tjana Puulaku waaḻangka tjungurringu, wangka palumpa kulilkitja. Aaḻi tjananya Puulalu nyinarra nintira mungarrtjirringu. Nintiṉu tjananya yalatji Katutjalu panya yaṉangu tjuṯa ngulytjura yaṉṯayaṉṯalpayi. Piyuku tjananya tjakultjunu, “Yiitjunya yilta Kurayitjanya nyinanyi, Katutjalu yirriṯi watjara wantirriyaṉutja. Muutjalu Katutjaku wangka watjalpayi tjuṯangkuṯarra watjaṉu Yiitjunya ngalyankunytjaku.” Yalatji tjananya rawangku Puulalu nintiṉangi wangka Yiitjunyatjarra, tjana kulira palumpa walytjarrinytjaku.

²⁴Tjuwu tjuṯaku mayutju tjaampalangkuya Puulaku wangka kuliṉu, “Yilta, Yiitjunya Katutjalu yirriṯi watjara wantirriyaṉutja nyinanyi.” Kutjupa tjuṯangku wiya yalatji kulilpayi.

²⁵Yalatjiya wangkarra waṉirra tjana yankukitja ngarangi. Puulalu tjananya yara yalatji watjaṉu, “Katutjaku kurrunpangku wati Yaatjayanya wangka tjukarurru watjaṉu nganampa walytja yurruntitja tjuṯangka yankula tjakultjunkunytjaku. Yaatjayalu tjananya yalatji tjakultjunu,

²⁶‘Katutjaku kurrunpangkuṉi watjaṉu. Yaṉangu tjuṯangka yankula yalatji tjananya watjala! Yilta nyurrangarri ngayuku wangka puṯu kulilku.