Boskopuman 28:20-26

²⁰Fu dat'ede mi aksi fu miti nanga unu èn fu taki nanga unu. Bika den bui mi fu di mi abi a srefi howpu leki a pipel fu Israel.”

²¹Dan den taigi en taki: “Den brada fu Yudea no seni no wan brifi abra yu kon gi wi. No wan sma tyari wan boskopu kon dya fu yu èn no wan sma kon taki takru fu yu.

²²Ma un ben sa wani sabi san yu e bribi, bika ala presi sma e taki takru fu a grupu disi.”

²³Dan den meki mofo fu miti wan tra dei. A dei dati moro sma ete kon na en oso. Dan Paulus taki nanga den fu mamanten te leki mofoneti fu a fasi fa Gado wani tiri libisma. A du muiti fu sori den kmopo fu a wèt fu Moses nanga den buku fu den profeiti, tak' san a taki fu Yesus tru.

²⁴Sonwan fu den bribi san Paulus taki, ma trawan fu den no ben wani bribi.

²⁵Di den no ben man feni densrefi, den opo gwe. Ma fosi den gwe Paulus taigi den taki: “A Santa Yeye ben abi leti di A meki a profeiti Yesaya taigi den afo fu unu taki:

²⁶Go na a pipel disi èn taigi den taki: Yere un o yere, ma un no o ferstan noti, èn luku un o luku, ma un no o si noti.