Hechos 28:20-26

²⁰Heˉja̱ˉ baˊ naˉ maˉtëëhnꜙ hnähꜘ mahꜗ läꜙkyu̱u̱nꜙ hnähꜘ hiꜙ mahꜗ jwë̱ë̱hnꜚ hnähꜘ haˉ läꜙ laꜗ juuˈ kinꜙ. Kihꜗ oˉjø̱hꜙ dsëˉ heˉ maˉchaˉ jnänˋ dsaˉ Israel heˉja̱ˉ baˊ naˉ chehnꜗ naˊllenˋ caden˜ laˉ.

²¹Heˉja̱ˉ gaꜙjähꜘ dsaˉka̱a̱hˊ heꜘ: —Niꜙ ko̱o̱ˉ jeˉ kihꜗ hi̱ˉ cha̱a̱ˉ judea saꜙ maˉhe̱e̱hˊ jnäähꜗ heˉ jmeeh˜ juuˈ haˉ läꜙ dsaˉngëëhꜘ hneˉ. Hiꜙ niꜙ ja̱a̱ˉ ø̱ø̱hꜗ jneˊ hi̱ˉ cha̱a̱ˉ jeeˊ ooꜙ saꜙ maˉja˜ hi̱ˉ hnɨɨ˜ kyahꜗ niꜙ heˉ hlëëyhꜙ wɨɨꜘ kyahꜗ.

²²Pero hnøøˉ jnäähˈ jwahˈ haˉ läꜙ laꜗ juuˈ kyahꜗ, jëëhꜘ läꜙka̱a̱ˉ baˊ maˉnʉʉˊ jnäähꜗ hlëëhꜙ dsaˉ wɨɨꜘ kihꜗ hi̱ˉ maˉta̱a̱hˋ jwëꜘ hmëëꜘ naˉ.

²³Heˉja̱ˉ gaꜙta̱a̱hˋ dsaˉ heꜘ juuˈ kweeˉ ko̱o̱ˉ jmɨɨˊ heˉ yaˉnääyꜘ yaˉllayˉ juuˈ kaˉlähꜘ kya̱a̱hˊ Paaˊ. Maˊ gaꜙllooꜗ jmɨɨˊ ja̱ˉ, yaꜙnääꜗ jwë̱ë̱ꜘ dsaˉ jeeˊ maˊ gyaˈ Paaˊ. Tiih˜ goˉte˜ gaꜙløøꜗ Paaˊ hlëëhꜙ, läꜙji̱i̱hˈ gaꜙnʉʉˉ, gaꜙhlëëyhꜘ haˉ läꜙ jä̱ä̱ꜙ Dio dsaˉ läꜙhihꜙ kihꜗ. Gaꜙhnooyhˉ haˉ läꜙ jeeˊ he̱e̱hꜙ dsaˉ kihꜗ Jesús. Gaꜙhlëëyhꜘ kihꜗ Jesús läꜙko̱hꜘ jähꜘ ley kihꜗ Moisé hiꜙ läꜙko̱hꜘ gaꜙjähꜘ hi̱ˉ gaꜙngëëꜗ juuˈ kihꜗ Dio.

²⁴Ko̱ˉlla̱a̱ˊ gaꜙhe̱e̱hˉ heˉ gaꜙjähꜘ Paaˊ hiꜙ ko̱ˉlla̱a̱ˊ saꜙ gaꜙläꜙhe̱e̱ꜘ.

²⁵Saꜙ gaꜙhɨɨꜘ ko̱o̱ˉ juuˈ kiyhꜗ jeeˊ läꜙjë̱ë̱yꜙ. Heˉja̱ˉ gaꜙhlë̱ë̱hꜗ Paaˊ dsaˉ heꜘ ja̱ˉgaˊ hwë̱ë̱yꜙ jeeˊ ja̱ˉ, gaꜙsɨɨyhꜙ: —Lluꜗ goˉte˜ gaꜙhlëëhꜘ Jmɨˉlleꜘ Naˉjngɨɨˈ läꜙ maˊ gaꜙmiꜙjnääyˉ juuˈ laˉ kihꜗ Isaía hi̱ˉ gaꜙngëëꜗ juuˈ kihꜗ Dio kihꜗ dsaˉ maˉgyu̱hˉ jnänˋ. Gaꜙjäyhꜘ:

²⁶Gwaˉ jeeˊ jwɨɨˉ ooꜙ, goˉchiihˊ dsaˉ ooꜙ: Maꜙkeꜙ nuuhˉ hnähꜘ, saꜙ läꜙngëëhꜘ hnähꜘ, maꜙkeꜙ jëëhꜘ hnähꜘ saꜙ läꜙjnäꜘ kyahꜗ hnähꜘ.