1Morarame kaneru mũkuru enease. Pape apuhtopõpyry etapuruhmakase ynororo, apitorymano. Mame isene exikety omiry etase toiro, asakoropane aehtoh omiry. Konomeru sã aomiry nexiase. Ynara nase ya, —Osehko xiaro, nase.
2Mame osenuhmase. Moroto kawaru enease karimutumano. Epo ytokety typyreke nexiase. Eya parimã tokarose roropa uuru risemy orẽpyrahxo exiketyme aexiryke. Mame toytose ynororo kawaru po, imehnõ poremãkapose.
3Morarame pape apuhtopõpyry akorõ etapuruhmakase kaneru mũkuru. Mame isene exikety akorõ ynara nase ya, —Osehko xiaro, nase ya.
4Imepỹ kawaru nutũtase, kamiraramano. Mame mokyro kawaru pó ytokety tyjamihtanohpose, oxiehno seropõkõ ritohme, atatapoitohme, osenahkatohme, enara. Mame tapema konõto tokarose eya.
5Morarame pape apuhtopõpyry akorõ ropa etapuruhmakane oseruaono kaneru mũkuru. Mame imepỹ tõturuse ropa oturupynỹpo mokaroro asakoropane exiketomo. Ynara nase ya, —Osehko xiaro osenuhmase, nase ya. Mame enease. Moroto kawaru nexiase, xinukutumano. Mokyro po ytokety omoxinety kuhtoh nae nexiase tomahpo.
6Mame omi etase ropa. Mokaro asakoropane isene exiketõ wino moro omi totase ya. Ynara nase, —Tiriiku toiro kirume ahtao, epehpyry toiro ẽmepyry erohtamitume mana. Oxinase epehpyry oseruao riturume ahtao, toiro ẽmepyry erohtamitume mana. Yrome oriu epehpyry onytyorõmara mana, uwa eukuru epehpyry roropa onytyorõmara mana.
7Morarame pape apuhtopõpyry asakoropane exikety etapuruhmakane kaneru mũkuru. Mame isene exiketõ asakoropane exiketõ omiry etane etyhpyrymã omiry, —Osehko xiaro, kynako ynororo ya.
8Mame osenuhmane. Moroto kawaru kynexine, kapaumano. Mokyro po ytokety nexiase esety Orihtopo. Mokyro tokahmase imepyny a, esety Aorihtyã esary. Mame taropose toto seropõkõ etapatohme emero pyra. Asakoropane ahtao toiro totapasẽme toehse eya xine, tãtatapoirykõ ke te, tomirykõ ke te, tyrohsẽ ke te, esekatohtonõ ke, enara.
9Morarame pape apuhtopõpyry omame exikety totapuruhmakase kaneru mũkuru a. Mame osenuhmase moroto okyno zahkatoh zopikoxi. Ritonõpo poetory ekepyã zuzenu enease. Ritonõpo omiry poko imehnõ amoreparyke tyya xine totapase toto, yronymyryme Ritonõpo omipona toexirykõke roropa imehnõ tuarõtanohpory poko tyya xine.
10Opore ynara nase toto, —Yna esẽme mase. Orẽpyrahxo exiketyme mase. Kure mase ipunaka. Zae roropa mase. Otãto ise ro nonopõkõ apiakatohme oya nae toto wãnohtohme, yna mỹpotohme oya? nase toto.
11Mokaro zupõme karimutumã tokarose eya xine. Ynara tykase tozuhse toto, —Apoaporo, eraximatoko aporo ãkorõkõ oehtãne. Asã xine imehnõ Jezu poetory tõ etapãko roropa mã toto asã xine ro, tykase.
12Mame pape apuhtopõpyry 6mã totapuruhmakase kaneru mũkuru a. Nono kywyhkywyh tykase itamurume. Xixi tyarumãse roropa, kamisa xinukutumã samo topuxiximã samo. Nuno kamirarame toehse, munu samo.
13Xirikuato tõ tohpahse kapu ae nono pona, itu epery ohpapyry samo jamihme tyryrykane ahtao.
14Mame osenepyra toehse kapu, pape amemyry samo. Ypy tõ tysyryhmase esae xine, ahmõta tõ roropa esae xine tysyryhmase.
15Mame seropõkõ tuisary tõ toepase toto otonẽtohme, pata tõ esẽ tõ roropa, soutatu tõ esã roropa, tymõkomoke exiketomo, orẽpyra exiketomo, emero porehme toepase toto, tosẽke exiketomo, tosẽke pyra exiketõ roropa. Tõtonẽtohkõme toepase toto eutary aka, topu zopikoxi roropa ypy tõ po.
16Kui tykase toto. Tykohtase toto ypy tõ netaryme topu tõ netaryme roropa, —Epukako yna pona yna zonẽtohme, yna onenepyra Ritonõpo ehtohme, tapõ pona iporotyhpyry yna onenepyra aehtohme, yna zehno pyra kaneru mũkuru ehtohme roropa.
17Yna zehno toto ehtoh toehse exiryke poremãnõko rokẽ ynanase, ãko toh kynexine.
