Aisea 55

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Ewe Samol mi Lapalap a apasa, “Ou etto, ämi meinisin mi kaka, oupwe feito o ün seni ewe koluk. Ämi mi wöüngauen moni, oupwe feito o angei enemi. Oupwe feito o angei ünümemi wain me milik, nge ousap möni.

²Pwota oua mochen püngütiu moni fän iten mettoch ousap tongeni mongö? Pwota oua angang weires fän iten mine ousap möt ren? Oupwe fokun aüselingaei o föri mine üa ürenikemi. Iwe, epwe wor enemi mongö mi annö, oupwe pwal pwapwaiti uän ewe fanü mi fokun chomong.

³Oupwe aü selingemi o feito rei. Oupwe rongorong pwe ngünümi epwe manau. Iwe, ngang üpwe föri eu pwon esemüch ngenikemi o apwönüetä ai ümöümöch me tong usun üa fen pwon ngeni Tafit.

⁴Nengeni, üa awisa pwe epwe souemwen me samolun mwü kana, epwe pwärätä ngeni aramasen fanüfan ai manaman.

⁵Iwe, kopwe köri chon ekewe mwü kosamwo sileer me mwan, nge chon ekewe mwü resamwo sileek repwe müttir feito reöm pokiten ngang ewe Samol mi Lapalap om we Kot, Ewe mi Pin lon Israel, pun ngang üa alingok.”

⁶Oupwe kütta ewe Samol mi Lapalap lupwen fansoun oua tongeni küna, oupwe köri, lupwen a arap.

⁷Chon föföringau repwe likitala ar föför, nge chon pwüngingau kana repwe siwili ar ekiek. Repwe liwiniti ewe Samol mi Lapalap pwe epwe tongeäsiniir. Repwe kuliti ach Kot, pun a müttir le amusala tipis.

⁸Iwe, iei alon ewe Samol mi Lapalap, “Ai ekiek resap wewe ngeni ämi ekiek kana, nge ämi al resap wewe ngeni ai al kana.

⁹Pun usun läng a tekia seni fanüfan, iei usun ai al ra tekia seni ämi al kana, nge ai ekiek seni ämi ekiek kana.

¹⁰Iwe, usun rän me snow ra püngütiu me läng, nge resap liwintä, pwe repwe mwo achönü pwül o aräsi fanü o apwükü irä, epwe pwal wor fotän chon fofot me enen chon mongö,

¹¹iei usun ai kapas esap liwinto rei fän pön, pwe epwe afisätä mine üa tipeni o apwönüetä mine üa akünöü ngeni.

¹²Iwe, oupwe towu seni Papilon fän pwapwa o feila fän kinamwe. Chukutekia me chukutekison repwe chietä köl me mwemi, nge irän lemäl meinisin repwe alopolop.

¹³Iwe, irä saipires repwe märitä lon lenien iräfölüföl, nge mwoosor repwe mär lon lenien lantana. Ei epwe eu asisil esap mola tori feilfeilachök, nge ngang ewe Samol mi Lapalap üpwe iteföüla ren.”