1Iei alon ewe Samol mi Lapalap, “Ifan ewe toropwen mwüfesen üa pöütala inemi ren? Üa amömökemiila ngeni iö pokiten ai liwinimang ngeni? Nengeni, oua püsin amömökemiila pokiten ämi kewe tipis, nge pokiten ämi kewe pupungau inemi a mwü.
2Pwota esap wor eman a nom, lupwen üa feito? Pwota esap wor eman a päpälü, lupwen üa kökkö? Ifa usun, pei a mochomoch pwe üsap tongeni amanauakemi? Ifa usun, esap wor ai tufich pwe üpwe tongeni angasakemi? Üa apwasatä matau ren ai kapasen fön, üa pwal awili chanpupu ngeni fanüapö, pwe ikenen lon ra mäla o pwongau pokiten esap wor koluk.
3Ngang üa achunoi läng ren rochopwak pwe a usun chök pwölüla ren mangaku seni tuk, iei asisilen an letipeta.”
4Iwe, Kot ewe Samol mi Lapalap a atufichiei le kapas pwe üpwe silei met sokun kapas üpwe achipa ngeni chon riaföü. Iteiten lesosor a föngüniei, a suki selingei pwe üpwe tufichin aüseling usun eman chon kaiö a aüseling.
5Iwe, Kot ewe Samol mi Lapalap a suki selingei, nge üsap lükümach ngeni, üsap pwal sap seni.
6Üa mwüt ngeni chokewe mi mochen awataei pwe repwe wichi söküri, üa pwal asele ngeni sapei chokewe mi pösapeei. Üsap aopa won mesei seni chokewe mi turunufaseei o atufaei.
7Iwe, Kot ewe Samol mi Lapalap a alisiei, iei mine üsap itengau. Üa awowopöchökülei won mesei usun eföü fau, pun üa silei pwe üsap säw.
8Iwe, Kot a arap ngeniei o peniei. Iö epwe anini ngeniei? Aipwe chök üpälüfengen. Iö a mochen kapwüng ngeniei? Epwe chök feito rei.
9Nengeni, Kot ewe Samol mi Lapalap a alisiei. Iö epwe tongeni atipisiei? Iwe, ekewe chon atipisiei meinisin repwe rosola usun echö katup pwötür ra eni.
10Iö leimi a niueiti ewe Samol mi Lapalap o aleasochisi alon nöün we chon angang? Ätewe mi fetal lon rochopwak, nge esap küna och saram, epwe chök lükü ewe Samol mi Unusen Manaman o apilükülükü an we Kot.
11Nge ämi mi rawangauei chon arumi pwe repwe feiengau, oupwe püsin feiengau ren ämi rawangau. Iei usun mine ewe Samol mi Lapalap epwe föri ngenikemi. Epwe atolongakemi lon riaföü.
