1Iwe, Sarkon ewe kingen Asiria a tinala nöün meilapen sounfiu pwe epwe maun ngeni Astot. Iwe a liapeni.
2Lon ena fansoun ewe Samol mi Lapalap a üreni Aisea nöün Amos we, “Kopwe pwilitawu ufom a för seni tuk, pwal ipwom sus.” Iwe, Aisea a föri mine Kot a üreni, a fetal lein aramas fän an selela pwe esap üföüf owokot, esap pwal ipweip sus.
3Mürin, ewe Samol mi Lapalap a apasa, “Nei chon angang Aisea a fetal lein aramas fän an selela lon ükükün ülüngat ier, pwe eu asisil fän iten mine epwe fis ngeni Isip me Itiopia.
4Ina usun ewe kingen Asiria epwe emwenala ekewe chon oola seni Isip me Itiopia lon eu fanü mi toau, seni semirit tori chinlap. Iwe, esap wor ipwer sus, repwe feila fän selela, pwe esap pwölüla kuwokuwer. Ei lapalap epwe atoto säw won chon Isip.
5Iwe, chokewe mi anomu ar apilükülük won Itiopia o aingaing won Isip repwe lichipüng o apilükingau.
6Lon ena fansoun chokewe mi nonom arosetin ewe fanü Filistia repwe apasa, ‘Nengeni mine a fis ngeni chokewe sa anomu ach apilükülük wor, sa pwal süla rer pwe repwe alisikich o angasakich seni ewe kingen Asiria. Ifa usun ach sipwe tongeni sü seni ei feiengau?’”
