1 BƐKPÀÀTÌBƐ̀ 8:23-65

²³Ti Yiɛ̀ nKuyie nyIsidɑyɛɛribɛ tũ nkù, otɔù mɔù í bo kɛ dɑ dònnɛ̀ bɑ́ kɛĩ́nkɛ̀ miɛkɛ bɑ́ kɛtenkɛ̀ ĩ́nkɛ̀. Fɔ̃́ nwèè pĩ mmɛtɑummɛ̀ ɑ dɔ̀ɔ̀nɛ̀mɛ̀ ɑ tɔ̃mbɛ̀ kɛ dɔɔri mɛsɑ̀ɑ̀ mbɛ̀ɛ̀ dɑ tũ nnɛ̀ bɛ yɛ̀mmɛ̀ mɛmɔu.

²⁴A dɔ̀ɔ̀mu ɑ kóo tɔ̃ntì n cicɛ Dɑfiti ɑ do ò nɑ̀kɛ́ tì. A ti ndɔ̀ɔ̀ yíe nnɛ̀ ɑ wɛ̃rímú.

²⁵Ti Yiɛ̀ nKuyie nyIsidɑyɛɛribɛ tũ nkù ɑ bɑ́ɑ́ yɛ̃̀ nhɑ do nɑ̀kɛ́ tì ɑ kóo tɔ̃ntì n cicɛ Dɑfiti kɛ dɔ̀: Kòo bí yie nkɛ tũ nhɑ kó kucɛ ò kù tũ̀ mmɛ̀ɛ̀ botí, iì yó nsɔkɛ́ o kpɑ̀tì kɛ́mbɑkɛ́ ɑ nìtìbɛ̀ Isidɑyɛɛribɛ.

²⁶Ti Yiɛ̀ nKuyie nyIsidɑyɛɛribɛ tũ nkù, dɔɔ̀ di mmɔ̀nnì ɑ do nɑ̀kɛ́ tì ɑ kóo tɔ̃ntì n cicɛ Dɑfiti.

²⁷Kɛ̀ Sɑdomɔɔ sɔɔtɛ́ kɛ́bɛ́i nkɛ dɔ̀: Ti Yiɛ̀ nKuyie mmɛ̀nkɛ bo nɑ kɛ́mbonɛ̀ bɛnìtìbɛ̀ kɛtenkɑ̀ɑ̀? Kɛĩ́nkɛ̀ kiɛ dɛu kɛ í nɑ kɛ tɔ ti Yiɛ̀ nKuyie nkɛ̀ m mɛ̀ mmɑɑ́ tɛ̀ɛ̀ cĩ́ɛ̃̀tɛ̀ tɛɛ̀ bo nɑ kɛ́ kù tɔɑ̀?

²⁸Ti Yiɛ̀ nKuyie nkéntɛ́ kɛ́keè mí nhɑ kóo tɔ̃ntì n dɑ bɑ́ɑ́mmɛ̀ yíe!

²⁹A nɔ̀nfɛ̀ bɑ́ɑ́ ṹṹ nkɛyènkɛ̀ nɛ̀ kuyie ntɛ ncĩ́ɛ̃̀tɛ̀ ĩ́nkɛ̀, ɑ bɛ́i nkɛ tú ɑ yètìrì yó mbo tɛ̀ɛ̀ miɛkɛ. Kéntɛ́ ɑ kóo tɔ̃ntì yóó dɑ bɑ́ntɛ̀ ìì bɑ́ɑmmìi tɛ miɛkɛ.

³⁰Ti Yiɛ̀ nKuyie, n kéntɛ́ mí nnɛ̀ ɑ nìtìbɛ̀ Isidɑyɛɛribɛ, kɛ̀ ti dɑ bɑ̀ńtɛ̀ tɛ ncĩ́ɛ̃̀tɛ̀ miɛkɛ, ɑ́ mboní kɛĩ́nkɛ̀ kɛ́keè kɛ́ ti cĩ́ɛ̃́.

³¹Kòo nìtì cɑ̀ɑ̀rɛ̀ otɔù, kɛ̀ dɛ yiɛ̀ nyĩ wèe pɑrìkɛ̀, kòò kɔ̀tɛní ɑ cĩ́ɛ̃̀tɛ̀ kɛ pɑ̀rìkɛ̀ ɑ wũɔ̃tɔ̀nnì ììkɛ̀,

³²ti Yiɛ̀ nKuyie nhɑ́ mboní kɛĩ́nkɛ̀ kɛ́keè, kɛ́ bɛ̀ pùtɛ́, kɛ́kpetínnɛ́ osĩ̀nwè kɛ́dɛɛtɛ́ wèè nɑɑti.

³³Kɑ̀ɑ nìtìbɛ̀ Isidɑyɛɛribɛ dɑ yetɛ́nɛ̀, kɛ̀ bɛ dootitɔbɛ̀ bɛ̀ nɑ, kɛ̀ bɛ̀ wɛ̃̀ɛ̃̀tɛní ɑ cĩ́ɛ̃̀tɛ̀ bíɛ́kɛ̀ kɛ dɑ mɔɔ mɛcĩ́ɛ̃́mmɛ̀, kɛ dɑ sɑ̃ntɛ, kɛ dɑ bɑ̀ńtɛ̀.

³⁴Ti Yiɛ̀ nKuyie nhɑ́ mboní kɛĩ́nkɛ̀ kɛ́keè kɛ́cĩ́ɛ̃́ nhɑ nìtìbɛ̀ Isidɑyɛɛribɛ, kɛ́wɛ̃tɛ kɛ́ bɛ̀ kpɛ̃nnɛ́ní dihɛì ɑ do duɔ́ ndì bɛ yɛmbɛ̀.

³⁵Kɛ̀ bɛ̀ mɛ mbo dɑ yetɛ́nɛ̀mu, kɑ̀ɑ kpetínnɛ́ iwɛtibori kɛ̀ fɛtɑɑfɛ̀ tɛ̃́nkɛ í nniu, kɛ̀ bɛ̀ bɑntɛ́ bɛ̀ yetɛ́mɛ̀ ɑ bɛ̀ potɛ́ mɛ̀ɛ̀ kpɛ́í, kɛ kɔ̀tɛní tɛ ncĩ́ɛ̃̀tɛ̀ miɛkɛ kɛ dɑ bɑ̀ńtɛ̀ kɛ dɑ sɑ̃ntɛ.

³⁶Ti Yiɛ̀ nKuyie nhɑ́ mboní kɛĩ́nkɛ̀, kɛ́cĩ́ɛ̃́ nhɑ kóo tɔ̃ntì nɛ̀ ɑ nìtìbɛ̀ Isidɑyɛɛribɛ, kɛ́ bɛ̀ bɛnkɛ kucɛ sɑ̀ɑ̀kù bɛ̀ dò nkɛ́tũnnɛ kù, kɛ́yɔɔrɛ mɛniɛ nkɛtenkɛ̀ ɑ duɔ́ nkɛ̀ ɑ kɔbɛ kɛ̀ bɛ̀ kɛ̀ te.

³⁷Kɛ̀ dikònnì diì mɛ ntɑnní dihɛì yoo mutenkṹṹ, kɛ̀ tidiitì tiì mɛ nfɑ̃ũ ndɛpɑɑ nyoo kɛ̀ fɛtùɔ̀rìfɛ̀ fɛɛ̀ mɛ ntì pĩ. Kɛ̀ yɛcɑ́dúɔ̀ nyɛɛ̀ mɛ ntɑnní yoo fɛcofɛ. Kɛ̀ Isidɑyɛɛribɛ dootitɔbɛ̀ bɛɛ̀ mɛ mbo bɛ̀ pi bɛ ɛì kɛ́ mbɛ̀ fɛ̃́ũnko. Kɛ̀ mɛyɛi mmɑmɛ̀ tɑnní yoo mumɔmmú bɑ́ mù.

³⁸Kɑ̀ɑ nìtìbɛ̀ Isidɑyɛɛribɛ yɛ̀mmɛ̀ cɑ̀ɑ̀rɛ̀ bɛ yɛi nkpɛ́í, kɛ̀ bɛ̀ wèe wɛ̃̀ɛ̃̀tɛní ɑ cĩ́ɛ̃̀tɛ̀ bíɛ́kɛ̀ kɛ dɑ bɑ̀ńtɛ̀, bɑ́ kòò dɑ mɔɔ mù, yoo ò dɑ bɑ̀ńtɛ̀ tìmɑtì kpɛ́í.

³⁹Ti Yiɛ̀ nKuyie nhɑ́ mboní kɛĩ́nkɛ̀ ɑ kɑrì, kɛ́keè, kɛ́cĩ́ɛ̃́, nkɛ́teennɛ̀, kɛ́dɔɔ̀ bɑ́ wè o borimɛ dòmmɛ̀, kɛ yɛ̃́ ɑ yɛ̃́mɛ̀mu o yɛ̀mmɛ̀. Fɔ̃́ɔ̃̀ mɑ́ɑ̀ yɛ̃́ bɛnìtìbɛ̀ bɛmɔu yɛ̀mmɛ̀.

⁴⁰Ǹdɔɔri mɛmmɛ kɛ̀ dɛ̀ɛ yie nkɛ̀ Isidɑyɛɛribɛ ndɑ dé bɛ fòmmu mumɔu, bɛ̀ yó nfòù mù dihɛì ɑ duɔ́ ndì bɛ yɛmbɛ̀ di miɛkɛ.

⁴¹Bɛnìtìbɛ̀ yóó keèmu ɑ yetidiɛrì nɛ̀ ɑ kpeńnìmɛ̀ kɛ pĩ́ mmutɔ̃mmú nɛ̀ muwɛ̃rímú. Bɑ́ opɔ̀ɔ̀ wèè í tú Isidɑyɛɛri, kòò ìtɛ́ní dɛdɛ́tirɛ̀ kɛ kɔ̀tɛní ɑ cĩ́ɛ̃̀tɛ̀ nɛ̀ ɑ yètìrì kpɛ́í nkɛ dɑ bɑ́ɑ́.

⁴³Ti Yiɛ̀ nKuyie nhɑ mboní kɛĩ́nkɛ̀ kɛ́keè kɛ́dɔɔ̀ o yɛ̃ mmù. Mɛm̀mɛ kutenkù kumɔu kɔbɛ bo bɑntɛ́mɛ̀, kɛ dɑ depɛ ɑ nìtìbɛ̀ Isidɑyɛɛribɛ dɑ dé mɛ̀ɛ̀ botí. Kɛ̀ bɛ̀ɛ bɑntɛ́ kɛ dò n dɑ mɑɑ́ tɛ̀ɛ̀ cĩ́ɛ̃̀tɛ̀ mɛ̀nkɛ tú ɑ kpɛtɛ.

⁴⁴Kɑ̀ɑ duɔ́ nkɑ̀ɑ kɔbɛ dokɛ́nɛ̀ bɛ dootitɔbɛ̀, kɛ̀ bɛ̀ bo ɑ bɛ tɔ̃ nkɛ̀ kɛ wɛ̃̀ɛ̃̀tɛní ɑ ɛì ɑ tɑ̃ɑ̃tɛ́ dì, n dɑ mɑɑ́ dì tɛcĩ́ɛ̃̀tɛ̀ di bíɛ́kɛ̀ kɛ dɑ bɑ̀ńtɛ̀,

⁴⁵Ti Yiɛ̀ nKuyie nhɑ́ mboní kɛĩ́nkɛ̀ kɛ́keè bɛ bɑ́ɑmmìi kɛ́ bɛ̀ teennɛ̀.

⁴⁶Kɛ̀ Isidɑyɛɛribɛ bɛɛ̀ mɛ ndɑ yetɛ́nɛ̀, kɛ yɛ̃́ òmɔù í bomɛ̀ wèè bo yĩ́ ò bɑ́ɑ́ yetɛ́. Kɛ̀ dɛ̀ dò mbɛ̀ dɑ yetɛ́nɛ̀, kɑ̀ɑ miɛkɛ bɛ̀ pɛikɛ, kɑ̀ɑ yóu kɛ̀ bɛ dootitɔbɛ̀ bɛ̀ pĩ̀ḿmú kɛ kònnɛ̀ dɛdɛ́tirɛ̀ yoo dɛ tɔ́ɔ́nnɛ̀, kɛ bɛ̀ dɔ̀ɔ̀ tidɑɑtì,

⁴⁷kɛ̀ bɛ̀ kɛ̀ bo kɛ totí bɛ yɛ̀mmɛ̀ kɛ dɑ bɑ́ntɛ̀ kɛ tú: Tíì do kpénkùnnɛ ti to, ti yetɛ́mu, ti cɑ̀ɑ̀rɛ̀mu.

⁴⁸Kɛ̀ bɛ̀ kɛ̀ bo kɛ dɑ mɔɔ mɛcĩ́ɛ̃́mmɛ̀ nɛ̀ bɛ yɛ̀mmɛ̀ mɛmɔu kɛ wɛ̃̀ɛ̃̀tɛní dihɛì ɑ duɔ́ ndì bɛ yɛmbɛ̀ di bíɛ́kɛ̀, ɑ tɑ̃ɑ̃tɛ́ dì, n dɑ mɑɑ́ dì tɛcĩ́ɛ̃̀tɛ̀, kɛ̀ bɛ̀ dɑ bɑ́ɑ́,

⁴⁹ti Yiɛ̀ nKuyie nhɑ mboní kɛĩ́nkɛ̀ kɛ́keè bɛ bɑ́ɑmmìi kɛ́ bɛ̀ teennɛ̀.

⁵⁰Á bɛ̀ cĩ̀ɛ̃́ mbɛ̀ dɑ yetɛ́nɛ̀mɛ̀, nɛ̀ bɛ yetɛmɛ̀ ɑ kpɛti, ɑ́ duɔ́ nkɛ̀ bɛ̀ dootitɔbɛ̀ɛ bɛ̀ kuɔ́ mmɛsémmɛ̀.

⁵¹Bɛ̀ tú ɑ kɔbɛ mbɛ, kɑ̀ɑ bɛ̀ te, kɛ bɛ̀ dènnɛ Esibiti mɛhɑ́ɑ́rìmɛ̀ miɛkɛ.

⁵²A nɔ̀nfɛ̀ bɑ́ɑ́ ítɛ́ mí nhɑ kóo tɔ̃ntì nɛ̀ ɑ nìtìbɛ̀ Isidɑyɛɛribɛ ti ĩ́nkɛ̀. Nyo ti bɑ́ɑmmìi, ti yóó nkuɔ̀ nkɛ dɑ bɑ́ɑ́ nyì.

⁵³Ti Yiɛ̀ nKuyie nfɔ̃́ɔ̃̀ ti tɑ̃ɑ̃tɛ́ ibotí tɛì miɛkɛ kɛ̀ ti bo ntú ɑ kɔbɛ, kɛ́ndònnɛ̀ ɑ do tì nɑ̀kɛ́mɛ̀ ɑ kóo tɔ̃ntì Mɔyiisi, ɑ dènnɛ dìì mɔ̀nnì ti yɛmbɛ̀ Esibiti.

⁵⁴Sɑdomɔɔ kuɔ́nnɛ̀ dìì mɔ̀nnì ti Yiɛ̀ nKuyie nkɛ kù sɑutɛnɛ̀, kɛ́deè kɛ́ítɛ́ ò do nínkú dɛ̀ diwũɔ̃tɔ̀nnì ììkɛ̀ kɛ yuo o nɔu kɛĩ́nkɛ̀ bíɛ́kɛ̀,

⁵⁵kɛ́cómmú kɛ́mɔɔ ti Yiɛ̀ nKuyie nkó mɛsɑ̀ɑ̀ nyIsidɑyɛɛribɛ bɛmɔu ĩ́nkɛ̀ kɛ dɔ̀:

⁵⁶N sɑ̃ntímu ti Yiɛ̀ nKuyie nkùù òmpùnnɛ ku nìtìbɛ̀ Isidɑyɛɛribɛ kɛ́ndònnɛ̀ kù do ti nɑ̀kɛ́mɛ̀ ku kóo tɔ̃ntì Mɔyiisi. Timɔu ti tì dɔ̀ɔ̀mu tìmɑtì í sùɔ́.

⁵⁷Ti Yiɛ̀ nKuyie nhɑ nti bonɛ̀ ɑ do bonɛ̀ mɛ̀ɛ̀ botí ti yɛmbɛ̀, ɑ bɑ́ɑ́ ti bɔntóo! A bɑ́ɑ́ ti yóu!

⁵⁸Yṹɔ̃́nní ti yɛ̀mmɛ̀ ɑ bíɛ́kɛ̀, kɛ̀ ti ndɔɔri ɑ dɔ́mɛ̀, kɛ́ntũ nhɑ kuɔ́ nɛ̀ ɑ tɑnnɔ̀ ɑ duɔ́ nyɛ̀ ti yɛmbɛ̀.

⁵⁹Ti Yiɛ̀ nKuyie nhɑ bɑ́ɑ́ yɛ̃̀ n dɑ bɑ́ɑ́ nyìì bɑ́ɑmmìi, yóu kɛ̀ ì mbo ɑ yɛ̀mmɛ̀ kɛyènkɛ̀ nɛ̀ kuyie, kɛ̀ dɛ̀ɛ yie nkɑ̀ɑ nteénnɛ̀ ɑ nìtìbɛ̀ Isidɑyɛɛribɛ nɛ̀ mí nhɑ kóo tɔ̃ntì yɛwe yɛmɔu.

⁶⁰Mɛm̀mɛ ibotí imɔu bo bɑntɛ́mɛ̀ kɛ dò nfɔ̃́ nti Yiɛ̀ nKuyie nfɔ̃́ɔ̃̀ tu Kuyie, kòò mɔù í bo kɛ dɑ dònnɛ̀.

⁶¹Díndi Isidɑyɛɛribɛ kɛ̀ di duɔ́ ndi yɛ̀mmɛ̀ mɛmɔu ti Yiɛ̀ nKuyie kɛ́nyíé nku kuɔ́ nɛ̀ ku tɑnnɔ̀, kɛ́ndònnɛ̀ dɛ̀ mɛ̀ ndòmmɛ̀ yíe.

⁶²Okpɑ̀ɑ̀tì Sɑdomɔɔ bɑ̀ńtɛ̀ mɛmmɛ ti Yiɛ̀ nKuyie nkɛ́deè, wenwe nɛ̀ Isidɑyɛɛribɛ bɛmɔu kɛ̀ bɛ̀ɛ fíé ti Yiɛ̀ nKuyie nyiwũɔ̃.

⁶³Bɛ̀ kpetírí dìì yiè ti Yiɛ̀ nKuyie ncĩ́ɛ̃̀tɛ̀ kɛ̀ Sɑdomɔɔ fíé ti Yiɛ̀ nKuyie nyiwũɔ̃ mɛtɑummɛ̀ kpɛyi. Yɛnɑɑdɑkɛ̀ sikɔupípísìdɛ́ nɛ̀ sikɔupísìdɛ́ (22000) ipe tɛkɔupíkɔ̀ùtɛ̀ nɛ̀ sikɔupípísìdɛ́ (120000).

⁶⁴Disɔɔwũɔ̃̀ kó diwũɔ̃tɔ̀nnì í nsɑ̀nnɛ̀, kɛ̀ Sɑdomɔɔ duɔ́ nkɛ̀ bɛ̀ɛ túótɛ́ ti Yiɛ̀ nKuyie ncĩ́ɛ̃̀tɛ̀ kó kudɑ̀nkù, kɛ́ dɛ ntùɔ nyiwũɔ̃ ìì dò nkɛ́tuɔ nnɛ̀ yɛpɑ̃rɛ̀ yɛ̀ɛ̀ tú tidiitì nɛ̀ bɛ̀ fìé ìì wũɔ̃ mɛtɑummɛ̀ kpɛyi kó mɛkùɔ̀ mmɛkùɔ̀ nkpɛrɛ.

⁶⁵Sɑdomɔɔ nɛ̀ Isidɑyɛɛribɛ bɛ̀ do tíkú ditĩ̀nnì diɛrì ndi, kɛ bɑɑ̀ ndɛ kó dibɑnni. Bɛnìtìbɛ̀ do ìtɛ́ní Debo-Amɑti nwe kɛ́ntɔ kɛ́tuɔkɛnɛ̀ Esibiti kó kukó nkɛ̀ bɛ̀ mbɑɑ̀ ndɛ kó dibɑnni kɛ dɔ̀ yɛwe yɛ̀yiekɛ̀.