1 BƐKPÀÀTÌBƐ̀ 22:13-43

¹³Mɛm̀mɛ bɛ̀ tɔ̃ nwè kòo bo yúní Misee kòo kɔtɛ kóò nɑ̀kɛ́ kɛ dɔ̀: Ti Yiɛ̀ nKuyie mpɑ̃ɑ̃nɑ́ɑǹtì nɑ́ɑm̀bɛ̀ bɛmɔu bɛ̀ wɛ̃ ndinùù ndi kɛ nɑ́ɑ́ ntìmɑtì mɑ́ɑ̀ okpɑ̀ɑ̀tì, ɑ tũnnɛ bɛ kpɛti kóò nɑ̀kɛ́ weè yóó nɑmɛ̀.

¹⁴Kɛ̀ Misee ò tɛ̃̀ńnɛ́ kɛ dɔ̀: Ti Yiɛ̀ nKuyie mbomu, kɛ̀ kù n nɑ̀kɛ́ tì n yóó ti mbɛ́i!

¹⁵Ò tùɔ̀kɛ dìì mɔ̀nnì okpɑ̀ɑ̀tì borɛ̀ kòo ò bekɛ kɛ dɔ̀: Misee, ń kɔtɛ kɛ́do Dɑmɔti ɛì dìì bo Kɑdɑɑdi tempɛ̃ mmudoòɑ̀, yɑ́ɑ̀ n yóu? Kòo dɔ̀: Kɔtɛ ɑ yóó bɛ̀ nɑmu, ti Yiɛ̀ nKuyie nyóó bɛ̀ ɑ̃nnɛ́mu ɑ nɔu miɛkɛ.

¹⁶Kòo kpɑ̀ɑ̀tìi ò nɑ̀kɛ́ kɛ dɔ̀: Nɛ̀ yíe ndɔkɛ ndɑ bɑ́ɑ́mmɛ̀ kɛ tú ɑ́ n nɑ́kɛ́ timɔ́mmɔnti ti Yiɛ̀ nKuyie ndɑ nɑ̀kɛ́ tì.

¹⁷Dɛ mɔ̀nnì ndi Misee bɛ́immɛ̀ kɛ dɔ̀: N yɑ̀mu Isidɑyɛɛribɛ bɛmɔu cìɛ́tɛ́mɛ̀ yɛtɑ̃rɛ̀ ĩ́nkɛ̀ kɛ dònnɛ̀ tipìètì tìì kpɑ ocɛ̃nti. Kɛ̀ ti Yiɛ̀ nKuyie mbɛ́i nkɛ dɔ̀ bɛ̀ tɛ̃́nkɛ í mɔkɛ wèè bɛ̀ ni, bɑ́ wè wèe kò nho cĩ́ɛ̃̀tɛ̀ nɛ̀ kunɑɑtí.

¹⁸Kɛ̀ Isidɑyɛɛribɛ kóo kpɑ̀ɑ̀tìi nɑ́kɛ́ Sosɑfɑti kɛ dɔ̀: N do í dɑ nɑ̀kɛ́ kɛ̀ n dɔ̀ ò ɔ̃ɔ̃ í nni mpɑ̃ɑ̃́ tìmɑtì kɛ̀ tì ntú tisɑ̀ɑ̀tì n kpɛ́ínɑ́ɑ̀? Ò ɔ̃ n nɑ́kɛ́ tì timɔu bɑɑ ɔ̃ ntú tiyɛiti nti.

¹⁹Kɛ̀ Misee sɔɔtɛ́ o nɑ́ɑǹtì kɛ́bɛ́i nkɛ dɔ̀: Okpɑ̀ɑ̀tì kéntɛ́ kɛ́keè ti Yiɛ̀ nKuyie ntu mù: N yɑ̀mu ti Yiɛ̀ nKuyie nkɛ̀ kù kɑ̀ri ku kpɑ̀ɑ̀tìkɑ̀rì kɛ̀ kɛĩ́nkɛ̀ kó bɛkperíbɛ̀ còḿmú, biɛ nho bɑkù yoú bɛtɔbɛ̀ kucɑ̃̀nku.

²⁰Kɛ̀ ti Yiɛ̀ nKuyie ndɔ̀: We mbo kɔtɛ kɛ́soutɛ́ Akɑbu kòo kɔtɛ kɛ́do Dɑmɔti ɛì dìì bo Kɑdɑɑdi tempɛ̃ nkɛ̀ bɛ̀ɛ ò nɑ? Kɛ̀ yie ndɔ̀ muu nkòo tɔù dɔ̀ mutɛ̃mù.

²¹Dɛ mɔ̀nnì kɛ̀ bɛ̀ɛ kperíbɛ̀ kóò mɔù còḿmú ti Yiɛ̀ nKuyie nyììkɛ̀ kɛ́bɛ́i nkɛ dɔ̀: Mí m bo kɔtɛ kóò soutɛ́. Kɛ̀ ti Yiɛ̀ nKuyie nhò bekɛ kɛ dɔ̀: A yóó yĩ́mɛ?

²²Kòò dɔ̀: M bo nɑɑ́ mmɛyɑ́ɑ̀bìsíyɛ̀mmɛ̀ kɛ́tɑ ɑ pɑ̃ɑ̃nɑ́ɑǹtì nɑ́ɑm̀bɛ̀ bɛmɔu nɔ miɛkɛ. Kɛ̀ ti Yiɛ̀ nKuyie ndɔ̀: A yóó nɑmu, kɔtɛ kóò soutɛ́, kɔtɛ kɛ́dɔɔ̀ mɛmmɛ.

²³Ti Yiɛ̀ nKuyie nkuù ɑ̃nnɛ́ mɛyɑ́ɑ̀bìsíyɛ̀mmɛ̀ ku pɑ̃ɑ̃nɑ́ɑǹtì nɑ́ɑm̀bɛ̀ nɔ̀ miɛkɛ bɛ̀ɛ̀ bo ɑ borɛ̀, kù tũ ndɔ́ kɛ dɑ dɔɔ̀ mɛyɛi mmɛ̀.

²⁴Dɛ mɔ̀nnì kɛ̀ Kenɑɑnɑ birɛ Sedesiɑ tɔ́ɔ́nko Misee borɛ̀ kóò bèntɛ kɛ dɔ̀: Ɔ̃nkɛ bíɛ́kɛ̀ nkɛ̀ ti Yiɛ̀ nKuyie nkó muyɑɑ́ nyɛ̀mɛ̀ m borɛ̀ kɛ dɑ bɛ́innɛ̀?

²⁵Kɛ̀ Misee dɔ̀: A yóó dɛ̀ yɑ̀mu ɑ bo ntɑti dìì yiè sicɛ̃́ĩ kɛ sɔɔti kɛ wɑnti ɑ bo sɔri dɛ̀.

²⁶Kɛ̀ Isidɑyɛɛribɛ kóo kpɑ̀ɑ̀tì dɔ̀: Pĩ́nnɛ̀ Misee, kɛ́duɔ́ nhAmɔɔ wèè do tú dɛ kó dihɛì kóò kùmɑ̀ndɑ́ɑ̀ nɛ̀ okpɑ̀ɑ̀tì kóo dɑpɑ̀ɑ̀ nSoɑsi,

²⁷kɛ́ bɛ̀ nɑ̀kɛ́ kɛ dɔ̀: Okpɑ̀ɑ̀tì tu di kpetínnɛ́ dɛ kóo nìtì kɛ́ nhò duɔ̀ mpɛ̃́ɛ̃̀ sɑ́m̀pɔ́ nɛ̀ mɛniɛ nkɛ́mbɑɑnɛ̀ ò bo wɛ̃tɛnnímɛ̀ nɛ̀ kukɔ̃ǹnɑɑtí.

²⁸Kɛ̀ Misee dɔ̀: Kɑ̀ɑ wɛ̃̀tɛnní kukɔ̃ǹnɑɑtí nɛ̀ míì kó dinùù dɔkɛ, ti Yiɛ̀ nKuyie mbɛ́immɛ̀ kɛ́deè kɛ dɔ̀: Díndi bɛnìtìbɛ̀ dimɔu kéntɛ́nɛ̀ n tú mù.

²⁹Mɛm̀mɛ Isidɑyɛɛribɛ kóo kpɑ̀ɑ̀tì nɛ̀ Sudɑɑ kɔbɛ kou kɛ̀ bɛ̀ɛ kɔtɛ kɛ́do Dɑmɔti ɛì Kɑdɑɑdi tempɛ̃ mmiɛkɛ mudoò.

³⁰Kɛ̀ Isidɑyɛɛribɛ kóo kpɑ̀ɑ̀tìi nɑ́kɛ́ Sosɑfɑti kɛ dɔ̀: N yóó ceetɛ m mɑ́ɑ̀ ndi kɛ́tɑ mudoò miɛkɛ, kɛ̀ fɔ̃́ nní nhɑ̃ ɑ kpɑ̀ɑ̀tìyɑ̀ɑ̀tì. Mɛm̀mɛ Isidɑyɛɛribɛ kóo kpɑ̀ɑ̀tì cèètɛmɛ̀ omɑ́ɑ̀ kɛ́tɑ mudoò miɛkɛ.

³¹Dɛ̀ do sɔ̃́ nSidii kóo kpɑ̀ɑ̀tì nɑ̀kɛ́mu o kó bɛhɑ̃ɑ̃pɔ̀mbɛ̀ bɛ̀ɛ̀ ni bɛ̀ɛ̀ dekɛ o kpɑrìnɑɑsɛ̃ĩ́ kɛ yĩ bɛ̀ bɑ́ nwɑnti bɛhɑ̃ɑ̃pɔ̀mbɛ̀ sɑ́m̀pɔ́bɛ̀ yoo iwɛ̃ĩ yɛmbɛ̀, bɛ̀ nwɑnti Isidɑyɛɛribɛ kóo kpɑ̀ɑ̀tì mɑ́ɑ̀ ndi.

³²Bɛ̀ɛ̀ ni sikpɑ̀rìnɑɑsɛ̃ĩ́ kó bɛdèèbɛ̀ kɛ̀ bɛ̀ɛ yɑ̀ Sosɑfɑti kɛ́nyɛ̃́ kɛ tú Isidɑyɛɛribɛ kóo kpɑ̀ɑ̀tì nwe, kɛ́kétóo o bíɛ́kɛ̀, kòo kuɔ́nnɛ̀ ti Yiɛ̀ nKuyie kɛ̀ kùu ò teennɛ̀.

³³Bɛ̀ɛ̀ ni sikpɑ̀rìnɑɑsɛ̃ĩ́ kó bɛdèèbɛ̀ kɛ̀ bɛ̀ɛ bɑntɛ́ kɛ dò nyIsidɑyɛɛribɛ kóo kpɑ̀ɑ̀tì dɔkɛ kóò yóu kɛ́pɛ̃ɛ̃tɛ́.

³⁴Kòo nìtì mɔù ntɔ mutɑ̃mmù kɛ́tɑ̃ũ cɛ̃́nkoo kɛ́mɑ́ɑ́nɛ̀ Isidɑyɛɛribɛ kóo kpɑ̀ɑ̀tì, kɛ̀ kupie ntɑ dicĩ̀ncĩ̀nkɔ̃̀nnì mɑ̀nku dì tuutɛ́nɛ̀ dɛ̀ ibɑɑtí. Kòo nɑ́kɛ́ wèè piú o kpɑ̀rìsɑ̃ntɛ̀ kɛ dɔ̀: Tũntɛ tɛsɑ̃ntɛ̀ kɛ̀ tí yɛ fɛkpɑ̀rìnɑfɛ miɛkɛ, bɛ̀ n kɔ̀ùtɛmu.

³⁵Kɛ̀ mudoò bintɛ́ dɛ yiè kòo kpɑ̀ɑ̀tì mbo o sɑ̃ntɛ̀ miɛkɛ kɛ̀ bɛ̀ ò pĩ nkɛ́cómmúnɛ̀ kɛ wetí Sidii kó bɛhɑ̃ɑ̃pɔ̀mbɛ̀. Kɛ̀ mɛyĩ̀ĩ̀ nyìɛ̀. Kɛ̀ dɛ̀ nyóó yĩ́ kuyuoku kòo kú.

³⁶Diyiè tɑti dìì mɔ̀nnì kɛ̀ bɛ̀ɛ pĩɛ̃kɛ́ dihɑ̃ɑ̃pɔ̀nkɑrì kɛ dɔ̀: Bɑ́ wè wèe kò nho ciɛ, o ɛì,

³⁷okpɑ̀ɑ̀tì kumu. Mɛm̀mɛ kɛ̀ bɛ̀ɛ ò kɔ̀tɛnɛ̀ Sɑmmɑrii kɛ́kũnnɛ́,

³⁸kɛ́kɔtɛnɛ̀ o kpɑ̀rìsɑ̃ntɛ̀ kubinkɛnkɛnkù mɑkù Sɑmmɑrii ɛì mɛniɛ nsũ dɛ̀ kɛ tɛ̀ ɔ̀ú, kɛ̀ simɔɔ́ diɛ́ dɛ kó mɛyĩ̀ĩ̀ nkɛ̀ bɛnitipòbɛ̀ bɛ̀ɛ̀ dɔuti dɔutinɛ̀ bɛnitidɑɑbɛ̀ kɛ̀ bɛ̀ɛ wuɔ, kɛ́ndònnɛ̀ ti Yiɛ̀ nKuyie ndo ti bɛ́immɛ̀.

³⁹Akɑbu borimɛ tɛ̃mɛ̀ ò dɔ̀ɔ̀ mɛ̀ɛ̀ kó dimɑ̀ɑ̀, ò do mɑɑ́ tɛ̀ɛ̀ cĩ́ɛ̃̀tɛ̀ kɛ́ tɛ̀ dɑ̀ri yɛpɑ́pɑ́nìì nnɛ̀ yɛhɛkɛ̀ ò mɑɑ́ yɛ̀ɛ̀ kó dimɑ̀ɑ̀, dɛ̀ wɑ̃̀rimu Isidɑyɛɛribɛ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ.

⁴⁰Akɑbu do ku kòo birɛ Aɑsiɑ weè sɔɔtɛ́ o kpɑ̀tì.

⁴¹Asɑɑ birɛ Sosɑfɑti do nɑɑ́ nSudɑɑ kɔbɛ kóo kpɑ̀ɑ̀tì Akɑbu Isidɑyɛɛribɛ kóo kpɑ̀ɑ̀tì kpɑ̀tì benni nɑɑnnì miɛkɛ nkɛ.

⁴²Sosɑfɑti do mɔkɛ yɛbie nsipísìtɑ̃ɑ̃ti nɛ̀ yɛ̀nùmmù ndi kɛ́di tikpɑ̀tì, kɛ́mbo Sedisɑdɛmmu kɛ dɔ̀ yɛbie nsipísìdɛ́ nɛ̀ yɛ̀nùmmù. Sidii kóo sɑpɑ̀ɑ̀ Asubɑ weè do ò pɛitɛ́.

⁴³Kòo tũnnɛ ò cicɛ Asɑɑ kó mɛborimɛ weti weti kɛ́ndɔɔri ti Yiɛ̀ nKuyie ndɔ́ dɛ̀.