عِسِرَيِلَ مَنفّيٍ ١ 22:13-43

¹³شّيرَ نَشَن سِفَ مِكٍ شِلِدٍ، نَ نَشَ عَ قَلَ عَ بّ، «عِ بَرَ عَ تٌ، نَمِحْنمّ بِرِن بَرَ لَن عٍ شَ قٍ قَنيِ قَلَ مَنفّ بّ. عِ قَن شَ كَتَ، وٌ شُي شَ لُ كٍرٍن، عِ شَ قٍ قَنيِ قَلَ مَنفّ بّ.»

¹⁴مِكٍ نَشَ عَ قَلَ، «عَلَتَلَ حِحّ نَ عَ رَ. ﭑ مَرِفِ عَلَتَلَ نَ نَشَن يٌ مَسٍن، ﭑ نَ نَن قَلَمَ.»

¹⁵عَ تٌ مَنفّ يِرٍ لِ، مَنفّ نَشَ عَ قَلَ عَ بّ، «مِكٍ، عَ لَنمَ كَ عَ مُ لَنمَ مُشُ شَ سِفَ فٍرٍ سٌدٍ رَ مٌتِ فَلَدِ بْشِ مَ؟» مِكٍ نَشَ عَ يَابِ، «وٌ تٍ، وٌ شُننَكٍلِ نَن سْتْمَ. عَلَتَلَ قَمَ نّ عٍ سَدٍ وٌ سَفٌي.»

¹⁶كْنْ مَنفّ نَشَ عَ قَلَ عَ بّ، «ﭑ حَن بَرَ عَ قَلَ عِ بّ سَنيَ وُيَشِ، عِ شَ عِ كَلِ نْندِ يَتِ نَن قَلَدٍ ﭑ بّ عَلَتَلَ شِلِ رَ.»

¹⁷مِكٍ نَشَ عَ يَابِ، «ﭑ بَرَ عِسِرَيِلَ بِرِن تٌ، عٍ يٍنسٍنشِ فٍيَيٍ قَرِ، عَلْ شُرُ سٍ رَبّحِنشِيٍ. عَلَتَلَ شَ مَسٍنيِ نَن يَ؛ مَرِفِ مُ نَ يِ حَمَ بّ. كَنكَن شَ فبِلٍن عَ شْنيِ بْحّسَ كُي.»

¹⁸عِسِرَيِلَ مَنفّ نَشَ عَ قَلَ يٍهٌسَقَتِ بّ، «ﭑ مُ عَ قَلَ شّ عِ بّ، عَ مُ نْمَ قٍ قَنيِ مَسٍندٍ ﭑ مَ قٍ رَ، قٌ قٍ حَاشِ تُن؟»

¹⁹نَ تّمُي مِكٍ نَشَ عَ قَلَ عٍ بّ، «يَكْسِ، وٌ وٌ تُلِ مَتِ عَلَتَلَ شَ مَسٍنيِ رَ. ﭑ بَرَ عَلَتَلَ تٌ عَ شَ كِبَنيِ كُي، عَ شَ مَلٍكّ فَلِ نُ تِشِ عَ يِرٍقَنيِ مَ نُن عَ كْولَ مَ.

²⁰عَلَتَلَ نَشَ عَ قَلَ، ‹ندٍ وَ مَ سِفَقٍ شَشِلِ كٌبِ رَ سٌدٍ عِسِرَيِلَ مَنفّ عَكَبُ شُنيِ، عَ شَ سَ رَ مٌتِ فٍرٍ فَلَدِ بْشِ مَ عَلَكٌ عَ شَ قَشَ؟› ندٍ نَشَ عَ يَابِ شَشِلِ ندٍ رَ، ندٍ قَن نَشَ عَ يَابِ شَشِلِ فبّتّ رَ.

²¹نَ كُي حِننّ ندٍ نَشَ مِنِ، عَ تِ عَلَتَلَ يَ عِ، عَ عَ قَلَ، ‹ﭑ تَن نْمَ نّ عَ رَ.› عَلَتَلَ نَشَ عَ مَشْرِن، ‹عِ نْمَ دِ؟›

²²عَ نَشَ عَ يَابِ، ‹ﭑ سِفَمَ نّ، ﭑ قَ وُلٍ قَلَ مَنفّ بّ عَ شَ نَمِحْنمّيٍ سَابُي رَ.› عَلَتَلَ نَشَ عَ قَلَ عَ بّ، ‹عِ قَمَ نّ عَ نْدٍ، نَ سْونّيَمَ نّ. سِفَ، عِ شَ سَ نَ رَبَ.›

²³يَكْسِ، عَلَتَلَ بَرَ وُلٍ سَ عِ شَ نَمِحْنمّيٍ دّ عِ. عَلَ بَرَ نَتّ حَاشِ تٌنفٌ عِ شَ قٍ رَ.»

²⁴نَ تّمُي، كٍنَانَ شَ دِ سٍدٍكِيَ نَشَ عَ مَسٌ، عَ مِكٍ دّ رَفَرِن، عَ قَ عَ قَلَ، «عَلَتَلَ شَشِلِ مِنِشِ كِرَ مُندُن نَ ﭑ مَ ﭑ شَ وْيّن عِ بّ؟»

²⁵مِكٍ نَشَ عَ يَابِ، «عِ قَمَ نَ تٌدٍ، عِ عِ فِمَ عِ نْشُندٍ قٍندٍ تّمُي نَشّ.»

²⁶عِسِرَيِلَ مَنفّ نَشَ عَ قَلَ، «وٌ مِكٍ شَنِن تَا مَنفّ عَمٌن نُن مَنفّ شَ دِ يٌوَ سِ شْن مَ.

²⁷وٌ شَ عَ قَلَ عٍ بّ، ‹مَنفّ نَشّ، عَ وٌ شَ يِ شّمّ سَ فٍيلِ كُي، عَ وٌ نَشَ دٌنسٍ سٌ عَ يِ رَ، قٌ تَامِ شَرٍ نُن يٍ، هَن ﭑ سَ قَمَ تّمُي نَشّ شُننَكٍلِ كُي.›»

²⁸مِكٍ نَشَ عَ يَابِ، «شَ عِ سَ فبِلٍن شُننَكٍلِ كُي، ﭑ مَ مَسٍنيِ مُ كٍلِشِ عَلَتَلَ مَ.» عَ مَن نَشَ عَ قَلَ حَمَ يَ شْرِ، «حَمَ بِرِن، وٌ شَ وٌ تُلِ مَتِ ﭑ مَ مَسٍنيِ رَ عَ قَنيِ رَ!»

²⁹عِسِرَيِلَ مَنفّ نُن يُدَيَ مَنفّ يٍهٌسَقَتِ نَشَ تٍ رَ مٌتِ فَلَدِ بْشِ مَ.

³⁰عِسِرَيِلَ مَنفّ نَشَ عَ قَلَ يٍهٌسَقَتِ بّ، «عِ شَ سٌ فٍرٍ كُي مَنفّ دٌنمَ رَفٌرٌشِ عِ مَ.» عِسِرَيِلَ مَنفّ تَن نَشَ مَنفّ دُفِ بَ عَ مَ، عَ سْورِ دٌنمَ فبَنسَن نَفٌرٌ عَ مَ، عَ سِفَ فٍرٍ سٌدٍ.

³¹عَرَ مِ مَنفّ نُ بَرَ عَ قَلَ عَ شَ سْورِ تٌنفٌ سَشَن نُن قِرِنيِ بّ، نَشٍيٍ قِندِشِ سْورِ رَفِسٍ شَ سْورِيٍ يَرٍرَتِيٍ رَ، «وٌ شَ كَتّ بِرِن نَبَ وٌ شَ عِسِرَيِلَ مَنفّ فبَنسَن نَن قٍن، وٌ عَ قَشَ.»

³²سْورِ رَفِسٍ شَ سْورِيٍ يَرٍرَتِيٍ تٌ يٍهٌسَقَتِ تٌ، عٍ نَشَ عَ مَحْشُن تّمُندٍ عِسِرَيِلَ مَنفّ نَن عَ رَ. عٍ نَشَ عٍ شُن تِ عَ رَ، عٍ شَ سَ عَ فٍرٍ. يٍهٌسَقَتِ نَشَ عَ مَلِمَيٍ شِلِ.

³³سْورِ رَفِسٍ شَ سْورِيٍ يَرٍرَتِيٍ نَشَ عَ كٌلٌن عِسِرَيِلَ مَنفّ شَ مُ عَ رَ، عٍ قَ فبِلٍن عَ قْشْ رَ.

³⁴نَ تّمُي سْورِ ندٍ نَشَ شَلِ وٌلِ نَ كِ تُن. تَنبّ نَشَ سَ عِسِرَيِلَ مَنفّ سْشْ عَ كَنكٍ مَكَنتَسٍ لٍنبٍيٍ تَفِ. مَنفّ نَشَ عَ قَلَ عَ شَ سْورِ رَفِسٍ رَفِمَ بّ، «فِسٍ مَقِندِ، عِ شَ ﭑ نَمِنِ فٍرٍ قَرِ مَ، بَرِ مَ ﭑ بَرَ مَشْنْ.»

³⁵فٍرٍ نَشَ شْرْشْ نَ لْشْي كِ قَنيِ رَ. مَنفّ نُ تِشِ عَ شَ سْورِ رَفِسٍ كُي، عَ يَ رَقِندِشِ عَرَ مِكَيٍ مَ. عَ نَشَ قَشَ نَ نُنمَرٍ رَ، عَ وُلِ فبٍفبٍ نُ نَ عَ شَ سْورِ رَفِسٍ كُي.

³⁶سٌفٍ فٌرٌ تّمُي، يَامَرِ نَشَ قِ، «بِرِن شَ فبِلٍن عٍ شْنيِ، بِرِن شَ سِفَ عٍ شَ بْشِ مَ.»

³⁷مَنفّ قَشَ نَ كِ نّ، عَ نَشَ رَفَتَ سَمَرِ تَا كُي.

³⁸عٍ تٌ مَنفّ شَ سْورِ رَفِسٍ كُي عِشَ سَمَرِ يٍ يِرٍ، بَرٍيٍ نَشَ عَكَبُ وُلِ مَكْن، لَنفٌي فِنّيٍ قَن نَشَ عٍ مَشَ نَا، عَلْ عَلَتَلَ عَ مَسٍن كِ نَشّ.

³⁹عَكَبُ شَ تَرُشُي دْنشْي، نُن عَ قٍ نَشَن بِرِن نَبَ، نُن عَ بَنشِ تِشِ كِ نَشّ سِلِ حِنيِيٍ رَ، نُن عَ تَا نَشٍيٍ تِ، نَ بِرِن سّبّشِ عِسِرَيِلَ مَنفّيٍ شَ تَرُشُي كُي.

⁴⁰عَكَبُ نَشَ رَفَتَ عَ بٍنبَيٍ قّ مَ. عَ شَ دِ عَشَسِيَ نَشَ قِندِ مَنفّ رَ عَ حْشْي رَ.

⁴¹عَسَ شَ دِ يٍهٌسَقَتِ قِندِ يُدَيَ مَنفّ رَ، عِسِرَيِلَ مَنفّ عَكَبُ شَ مَنفّيَ حّ نَانِ ندٍ نّ.

⁴²حّ تٌنفٌ سَشَن نُن سُولِ نُ نَ يٍهٌسَقَتِ بّ، عَ تٌ نُ قِندِ مَ مَنفّ رَ دَرِ سَلَمُ. عَ نفَ نُ نَ سِلِ شَ دِ عَسُبَ نَن نَ.

⁴³يٍهٌسَقَتِ نَشَ حّرّ عَ بَبَ عَسَ شَ كِرَ شْن مَ، عَ مُ عَ مَكُيَ عَلَتَلَ شَ كِرَ رَ.