1 ዮሃኒሳ ኪታ 2

1

2

3

4

5

¹ታ ናቶ፥ ናጋራ ሂንቴ ኦꬄናዳን፥ ታኒ ሃዋ ሂንቴንቶ ፃፋይ፤ ሺን ኦኒኔ ናጋራ ኦꬆፔ፥ ኣዉዋ ማታን ኑሲ ጋናቲያ ዬሱሲ ኪሪስቶሲ፥ ፂሉ፥ ዴዔ።

²ቃሲ ኑኒ ኑ ናጋራ ኣቶ ጌቴቱሳ ኪሪስቶሳ ባጋና ዴሜቶ፤ ኪሪስቶሲ ያርሼቴዳዌ ኣሳ ኡባ ናጋራ ዲጋናሳፔ ኣቲን፥ ኑ ናጋራ ፃላላ ዲጋናሳ ጊዴና።

³ኑኒ ፆሳ ኣዛዙዋ ናጎፔ፥ ቱሙ ኣ ኤሪያዋ ሄዋን ሻካናው ዳንዳዬቶ።

⁴ኢቲ ኡራይ፥ «ታኒ ኣ ኤራይ» ጊዴ፥ ቃሲ ኣ ኣዛዙዋ ናጌናን ኣጎፔ፥ ሄ ኡራይ ዎርዱዋ፤ ቱማቴꬃይካ ኣኒ ባዋ።

⁵ሺን ኣ ቃላው ኣዛዜቲያ ኦና ጊዶፔኔ፥ ሄ ኡራይ ፆሳ ሲቂያዌ ቱሙ ፖሌቴዳ። ኑኒ ፆሳን ዴዒያዋ ሃዌ ኑና ኤሪሴ። ሄዌካ፥

⁶«ታኒ፥ ፆሳን ዴዓይ» ጊያ ኦኒኔ ኪሪስቶሲ ዴዔዳዋዳን ዴዓናው ቤሴ።

⁷ታ ሲቃቶ፥ ታኒ ሂንቴንቶ ኮዪሩዋፔ ዴዒያ ኤጫ ኣዛዙዋ ፃፋይፔ ኣቲን፥ ኦራꬃ ኣዛዙዋ ፃፊኬ፤ ሄ ኤጫ ኣዛዙ ሂንቴ ሲሴዳ ቃላ።

⁸ጊዶፔካ፥ ታኒ ሂንቴንቶ ላዔንꬁዋ ኦራꬃ ኣዛዙዋ ፃፋይ፤ ሄ ኣዛዙዋ ቱማቴꬃይካ ኪሪስቶሳኒኔ ሂንቴናን ቤቴ። ኣዪሲ ጎፔ፥ ꬉማይ ꬋዬ፤ ቱሙ ፖዑ ሃዒ ፖዔ።

⁹ፖዑዋን ዴዓይ ጊዴ፥ ባሬ ኢሻ ኢፂያ ኦኒኔ ሃኖ ጋካናሲካ ꬉማኒ ዴዔ።

¹⁰ባሬ ኢሻ ሲቂያ ኦኒኔ ፖዑዋን ዴዔ፤ ሄ ኡራን ሃራ ኡራ ꬉቢያባይ ኣያይኔ ባዋ።

¹¹ሺን ባሬ ኢሻ ኢፂያ ኦኒኔ ꬉማኒ ዴዔ፤ ꬉማኒ ሃሜቴ። ꬉማይ ኣ ኣይፊያ ቆቂሲ ዎꬄዳ ዲራው፥ ሃቃ ቢንቶኔ ኤሬና።

¹²ታ ናቶ፥ ፆሳይ ኪሪስቶሳ ሱንꬃ ዲራው፥ ሂንቴ ናጋራ ኣቶ ያጌዳ ዲራው፥ ታኒ ሂንቴንቶ ፃፋይ።

¹³ኣዎቶ፥ ኮዪሩዋፔ ዴዒያዋ ሂንቴ ኤሬዳ ዲራው፥ ሂንቴንቶ ፃፋይ። ያላጋቶ፥ ፃላሂያ ካፑዋ ሂንቴ ፆኔዳ ዲራው፥ ሂንቴንቶ ፃፋይ። ጉꬃ ናቶ፥ ፆሳ ኣዉዋ ሂንቴ ኤሬዳ ዲራው፥ ሂንቴንቶ ፃፋይ።

¹⁴ኣዎቶ፥ ኮዪሩዋፔ ዴዒያዋ ሂንቴ ኤሬዳ ዲራው፥ ሂንቴንቶ ፃፋይ። ያላጋቶ፥ ሂንቴ ሚኖ ጊዲያ ዲራዉኔ ፆሳ ቃላይ ሂንቴናን ዴዒያ ዲራው፥ ቃሲ ፃላሂያ ካፑዋ ሂንቴ ፆኔዳ ዲራው፥ ሂንቴንቶ ፃፋይ።

¹⁵ሃ ኣላሚያ ዎይ ኣላሚያን ዴዒያ ኣያኔ ሲቆፒቴ። ሂንቴ ሃ ኣላሚያ ሲቆፔ፥ ፆሳ ሲቁ ሂንቴናን ባዋ።

¹⁶ኣዪሲ ጎፔ፥ ሃ ኣላሚያን ዴዒያ ኡባባይ፥ ሄዌካ፡ ኣሳቴꬃ ኣሙ፥ ኣዪፊያን ፄሊዴ ካጄሊያዌኔ ባሬ ዴዒያዋን ጬቄቲያዌ ሃ ኣላሚያፔ ዬዳዋፔ ኣቲን፥ ፆሳፔ ዪቤና።

¹⁷ሃ ኣላሚኔ ሃ ኣላሚያን ኣሳይ ኣሞቲያ ኡባባይ ኣꬋና። ሺን ፆሳይ ጌዳዋ ኦꬂያ ኡራይ ሜꬊናው ዴዓና።

¹⁸ታ ናቶ፥ ዎዲያ ዉርሴꬃይ ማታቴዳ፤ ኪሪስቶሳ ኤቄቲያዌ ሲንꬃፔ ያናዋ ሂንቴ ሲሴዳዋዳን፥ ሃራይ ኣቶ ሃዒካ ኣ ኤቄቲያዋንቱ ጮራቱ ዴንዴዲኖ። ሄዋ ዲራው፥ ዎዲያ ዉርሴꬃይ ማታቴዳዋ ኑኒ ሄዋን ኤሬቶ።

¹⁹ሃ ኤቄቲያዋንቱ ኑ ባጋ ጊዴና ዲራው፥ ኑ ጊዶፔ ኬሴዲኖ፤ ኣዪሲ ጎፔ፥ ኡንቱንቱ ኑ ባጋ ጊዲያባ ጊዲንቶኔ፥ ኑ ጊዶን ዴዓና፤ ሺን ኡንቱንቱፔ ኦኒኔ ኑ ባጋ ጊዴናዌ ኤሬታና ማላ፥ ኑ ጊዶፔ ኬሴዲኖ።

²⁰ሺን ኪሪስቶሲ ሂንቴ ቦላ ጌሻ ኣያና ጉሴዳ፤ ቃሲ ሂንቴ ኡባይ ቱሙዋ ኤሪታ።

²¹ቱሙዋ ሂንቴ ኤሪያ ዲራዉኔ ቃሲ ቱሙዋን ዎርዱ ኣያይኔ ባዪናዋ ሂንቴ ኤሪያ ዲራው፥ ታኒ ሂንቴንቶ ፃፋይፔ ኣቲን፥ ቱሙዋ ሂንቴ ኤሬና ዲራው ፃፊኬ።

²²ዬሱሲ ኦኬቴዳ ኪሪስቶሳ ጊዲያዋ ኤሪኬ ጊያ ኡራፔ ኣቲን፥ ዎርዱ ኦኔ? ሄዌ ፆሳ ኣዉዋኔ ናዓ ኤሪኬ ጊያዌ ኪሪስቶሳ ኤቄቲያዋ።

²³ፆሳ ናዓ ኤሪኬ ጊያ ኦናኔ ፆሳ ኣዉካ ኤሬና፤ ፆሳ ናዓ ኤራይ ጊያ ኦናኔ ቃሲ ፆሳ ኣዉካ ኤሬ።

²⁴ሄዋ ዲራው፥ ኮዪሩዋፔ ሂንቴ ሲሴዳዋ ሂንቴ ዎዛናን ሚኒሲዴ ናጊቴ። ኮዪሩዋፔ ሲሴዳዋ ሂንቴ ናጎፔ፥ ሂንቴንቶ ቃሲ ፆሳ ናዓናኔ ፆሳ ኣዉዋና ኢቲፔቴꬃይ ዴዓና።

²⁵ቃሲ ኪሪስቶሲ ባሬ ሁጴው ኑሲ ኢማና ጌዳዌ ሜꬊና ዴዑዋ።

²⁶ታኒ ሃዋ ሂንቴንቶ ሄ ሂንቴና ባሌꬂያ ኣሳቱዋ ዲራው ፃፋዲ።

²⁷ሺን ኪሪስቶሲ ሂንቴ ቦላ ባሬ ጌሻ ኣያና ጉሴዳ። ጌሻ ኣያናይ ሂንቴናን ዴዒያ ዲራው፥ ኦኒኔ ሂንቴና ታማሪሳና ኮሼና፤ ኣዪሲ ጎፔ፥ ኣ ጌሻ ኣያናይ ሂንቴና ኡባባ ታማሪሴ። ኢ ታማሪሲያዌ ቱሙዋፔ ኣቲን ዎርዱዋ ጊዴና። ሄዋ ዲራው ኣያና ጌሻ ቲሚርቴው ኣዛዜቲዴ፥ ኪሪስቶሳና ኢቲፔቴꬃን ዴዒቴ።

²⁸ታ ናቶ፥ ቃሲ ኢ ቆንጪያ ዎዴ፥ ኑኒ ያሺ ባዪናዋንታ ጊዳናዳኒኔ፥ ኣ ዩሳ ጋላሲ ኣ ሲንꬃን ኑኒ ዬላቴናዳን፥ ኣናና ኢቲፔቴꬃን ዴዒቴ።

²⁹ኪሪስቶሲ ፂሎ ጊዲያዋ ሂንቴ ኤሮፔ፥ ፂሎባ ኦꬂያ ኡባይ ፆሳ ናዓ ጊዲያዋ ኤራናው ቤሴ።