1Kwajikovə mɨnə kafak, yakamrai nəgkiarien e kɨmi əmiə mamni-əhu əmiə mə takhapəh nɨsorien təvhagə has. Mərɨg tukmə kasor təvhagə hah, yermamə kɨrik kapətawə tukrəgkiar atuə kɨn kapətawə kɨmi Kughen. Yermamə e In e Yesu Kristo, yemə atuatuk.
2Yesu e, Kughen rɨmɨvəhsi-pən narpɨnien kape təvhagə has kapətawə kɨmin, nɨtawɨn rɨmnaiyu. Nɨtawɨn rɨmnaiyu, pəh nien mə kapətawə pɨsɨn əmə, mərɨg kape narmamə m-fam ye tokrei tanə.
3Mərɨg tukmə kɨtawə kasəri-pən nəgkiarien kape Kughen, ramhajoun mə kɨtawə kharkun huvə mə kwənhauə mɨnharkun Kughen.
4Tukmə yermamə rɨmə rɨrkun Kughen mərɨg rapəh nəri-pən-huvəyen nəgkiarien kafan, in rameikuə əmə; nəfrakɨsien rɨrkək iran.
5Mərɨg yermamə yame rəri-pən huvə nəgkiarien kafan, norkeikeiyen kape Kughen ramkuə əfrakɨs kɨn norkeikeiyen yerkin. Yermamə yame ramni mə in ravəh Yesu yerkin, tukraməkeikei məri-pən swatuk kɨrikianə əmə yame Yesu rɨmnəri-pən. Norien a tukramhajoun mə kɨtawə kamhavəh Yesu yerkitawə.
7Yo mɨnə tɨksɨn, pəh nien nəgkiarien vi kɨrik yame yakamrai kɨmi əmiə mə taksəri-pən; mərɨg nəgkiarien akwas kɨrik yame nakwəsərɨg-ta kupən. Nəgkiarien akwas e nəgkiarien yame nakwənharkun-ta.
8Mərɨg, nəfrakɨs, ramor mə nəgkiarien vi kɨrik tuk əmiə. Kɨni, nɨmraghien kape Yesu mɨne kapəmiə kawor əpu kaməm mə nəgkiarien e rəfrakɨs, meinai taktəkun ai, nəpɨgnapien rɨnamrɨkək, kɨni nɨkhakien əfrakɨs rɨnakhak-pə.
9Kɨni yeməhuak kɨrik yame ramni mə in ramərer ye nɨkhakien, mərɨg raməməkɨn nəməhuak mɨnə tɨksɨn, yermamə en ramarə hanə ye nəpɨgnapien.
10Mərɨg yeməhuak yame rorkeikei nəməhuak mɨnə, in ramarə ye nɨkhakien. Kɨni nar kɨrik to rapəh norien rɨmɨr.
11Mərɨg tukmə raməməkɨn in kɨrik, ramarə hanə ye nəpɨgnapien, rɨmuvrɨg əpɨs in, raməriwək əmə ye nəpɨgnəpien.
12Kwajikovə mɨnə kafak, yakamrai nəkwəkwə e raurə kɨmi əmiə, Meinai Kughen rɨnəspir-ta təvhagə has kapəmiə kɨn norien yame Yesu rɨmnor.
13Tatə mɨnə, yakamrai nəkwəkwə e raurə kɨmi əmiə, meinai kɨmiə nakwənharkun-ta In yame rɨmnəkupən mamarə kwasɨg ikɨn Kughen ror narɨmnar. Nɨtamaruə, yakamrai nəkwəkwə e raurə kɨmi əmiə, meinai nakwəsəpita yemə has ai Setan.
14Kwajikovə mɨnə, yakamrai nəkwəkwə e raurə kɨmi əmiə, meinai nakwənharkun-ta Rɨmtawə Kughen. Tatə mɨnə, yakamrai nəkwəkwə e raurə kɨmi əmiə, meinai kɨmiə nakwənharkun-ta In yame rɨmnəkupən mamarə kwasɨg ikɨn Kughen ror narɨmnar. Nɨtamaruə, yakamrai nəkwəkwə e raurə kɨmi əmiə, meinai nakwənhaskai, nəgkiarien kape Kughen raməmɨr irəmiə, kɨni nakwəsəpita yemə has ai Setan.
15Takhapəh nɨsorkeikei-pɨk-ien norien kape tokrei tanə mɨne narɨmnar fam kape tokrei tanə. Yermamə yame rorkeikei pɨk narɨmnar kape tokrei tanə, norkeikeiyen kape Rɨmtawə Kughen rɨrkək yerkin.
16Meinai norien m-fam kape tokrei tanə khapəh nhasɨ-pənien ye Rɨmtawə Kughen, mərɨg kape tokrei tanə əmə. Norien m-fam kape tokrei tanə, irisɨr e: Rɨki jir raməkrəh, kamanipɨn tuk narɨmnar kape nɨprai jir əmə, kɨvəhsi-haktə jir tuk nautə mɨne norien kafan.
17Mərɨg tokrei tanə e tɨkrɨpirkək, mɨne narɨmnar m-fam yame ramswin iran mavi nərɨgien. Mərɨg narmamə yamə mɨne kasor nəkwai Kughen, tuksarə kape rerɨn.
18Kwajikovə mɨnə kafak, kɨtawə kwənhauə ye Nɨpɨg Kwasɨg. Nakwəsərɨg mə tɨkmɨr kɨrik kape Kristo tukruə. Kɨni taktəkun ai, tɨkmɨr mɨnə khapsaah kape Kristo kwənhauə ta. Kwənhauə, kɨtawə kharkun mə kwənhauə ta ye Nɨpɨg Kwasɨg.
19Iriə kwəsəpəh kapətawə niməhuak mɨnə, meinai iriə, pəh nien mə kɨtawə əgkəp mɨnə tɨksɨn əfrakɨs a. Rɨpi mə kɨtawə əfrakɨs əgkəp mɨnə tɨksɨn a, to kɨpihapəh nɨsəpəhyen ətawə. Mərɨg iriə kɨmɨsap-ta irətawə, ramhajoun mə iriə pəh nien mə kɨtawə mɨnə tɨksɨn.
20Mərɨg kɨmiə, Kristo, Yemə Imərhakə, rɨnəvrai-pre-ta Nanmɨn Rhakə kɨmi əmiə mor kɨmiə nakharkun nəfrakɨsien.
21Yakamrai nəkwəkwə e kɨmiə əmiə, pəh nien mə nakseinein nəfrakɨsien, mərɨg kɨmiə nakwənharkun ta nəfrakɨsien, kɨni mɨnharkun mə nəfrakɨsien rɨpəh nɨkuəyen kɨn neikuəyen.
22?Pa e in yeikuə kɨrik? Yermamə yame ramni mə Yesu pəh nien mə Kristo yame Kughen rɨmɨrpen. Yermamə e in e, in tɨkmɨr kape Kristo. In rukreikɨn-pən nɨmeitaan kɨmi Rɨmtawə Kughen mɨne Tɨni, Yesu.
23Yermamə yame rukreikɨn-pən nɨmeitaan kɨmi Tɨni, Yesu, reinein nofugɨnien ye Rɨmtawə Kughen. Mərɨg yermamə yame ramni nəfrakɨsien ye Tɨni Yesu, rofugɨn ye Rɨmtawə Kughen.
24Rɨkimiə tukraməsɨk mɨpəh nɨsəru-kɨnien nəgkiarien yame nakwəsərɨg-ta kupən. Nəgkiarien a raməmɨr hanə irəmiə, mor əmiə naksofugɨn ye Rɨmtawə Kughen mɨne Tɨni, Yesu.
25Kɨni nar a in a, nɨmraghien rerɨn, Kughen ruɨni-ta mə tukrɨvəhsi-pə kɨmi ətawə.
26Yakamrai nəgkiarien mɨnə e kɨmi əmiə mamni-ərhav narmamə yamə mɨne kasarkut tuk nɨvi-tayen əmiə.
27Mərɨg kɨmiə, Kristo rɨnəvrai-pre-ta Nanmɨn Rhakə kɨmi əmiə, raməmɨr təvɨr hanə irəmiə. ?Ror pən, pa mɨn rɨrkun nhajounien nar vi kɨrik kɨmi əmiə? Yermamə rɨrkək. Nanmɨn Rhakə, yame Kristo rɨnəvrai-pre-ta kɨmi əmiə ramhajoun narɨmnar fam kɨmi əmiə. Nhajounien a raməfrakɨs, mɨpəh neikuəyen nɨpɨg kɨrik. Nanmɨn Rhakə ramhajoun əmiə mə takasofugɨn ye Kristo mamharpɨn.
28Kɨni taktəkun ai, kwajikovə mɨnə kafak, takasofugɨn-pən ye Kristo pəh nɨpɨg tukruə, məm kɨtawə khapəh nhagɨnien, mhapəh nɨsaurɨsien tuk nɨsərerien ye nɨmrɨn.
29Tukmə nakharkun mə Yesu In ratuatuk, takharkun mə narmamə m-fam yamə mɨne kasor norien atuatuk, iriə a kwajikovə mɨnə kape Kughen.
