1 Jan 2

1

2

3

4

5

¹Unu weh da mi dyaa pikni dehn, Ah di rait dehnya ting dehn tu unu fi mek unu noh goh hed di sin ahn sin. Bot if enibadi doo sin, wee ga Jeezas Krais, weh da di Raichos Wan, fi taak op tu Gaad di Faada fi wi.

²Ahn Jeezas Krais da di Wan weh sakrifais ihself fi tek weh fi wee sin dehn, ahn noh oanli fi wee sin dehn, bot di sin dehn a evribadi eena di hoal werl.

³Now di way how wi ku shoar dat wi noa hihn, da if wi obay di komanment dehn weh ih gi wi.

⁴Enibadi weh seh, “Ai noa Jeezas,” ahn noh du weh ih seh, dehn di tel lai ahn di chroot noh deh eena dehn.

⁵Bot enibadi weh du weh hihn seh, shoa seh dat dehn haat ful op a di lov a Gaad fi chroo. Dis da how wi ku shoar dat wi da wan wid hihn:

⁶If enibadi seh, “Ai di liv az wan wid Gaad,” den dehn shuda di liv jos laik how Jeezas mi liv.

⁷Mi dyaa fren dehn, Ah noh di rait wahn komanment tu unu weh nyoo, bot da wahn oal wan weh unu mi yehr fahn di biginin. Dis oal komanment da di sayhn mesij weh unu mi don yehr.

⁸Stilyet, da wahn nyoo komanment weh Ah di rait tu unu, kaa di chroot a it deh eena Jeezas ahn ih deh eena unu tu. Di daaknis di goh ahn di chroo lait don di shain.

⁹Enibadi weh seh, “Ai di liv eena di lait,” ahn stil hayt dehn brada er dehn sista, dehn stil di liv eena daaknis.

¹⁰Ahn enibadi weh lov dehn brada er dehn sista, di liv eena di lait, ahn dehn noh wahn mek nobadi goh aschray.

¹¹Bot enibadi weh hayt wahn nada bileeva stil di liv eena daaknis. Dehn di waak rong eena di daaknis ahn dehn noh noa wich way fi goh kaa dehn blain sayka di daaknis weh dehn di liv eena.

¹²Unu weh da mi dyaa pikni dehn, Ah di rait dis tu unu kaa Gaad fagiv unu sin dehn sayka Jeezas.

¹³Unu faadaz, Ah di rait tu unu kaa unu noa Krais, di Wan weh deh fahn di biginin. Unu yong peepl, Ah di rait tu unu kaa unu don win oava di eevl wan.

¹⁴Unu pikni, Ah di rait tu unu kaa unu noa di Faada. Ah di rait tu unu faadaz kaa unu noa di Wan weh deh fahn di biginin. Ah di rait tu unu yong peepl kaa unu schrang; di Werd a Gaad liv eena unu, ahn unu win oava di eevl wan.

¹⁵Unu noh fi lov di werl, needa di ting dehn weh eena di werl. If unu lov di werl, den di Faada lov noh deh eena unu.

¹⁶Kaa aal weh deh eena di werl da aal di pleja weh di badi di los aafa, ahn aal di ting dehn weh peepl si ahn waahn, ahn aala di ting dehn weh mek wi haat geh prowd. Dehn ting deh noh kohn fahn Gaad, bot fahn di werl.

¹⁷Ahn di werl, ahn evriting eena it weh peepl waahn, di disapyaa, bot dehn wan weh du weh Gaad seh wahn liv fareva.

¹⁸Unu weh da mi dyaa pikni dehn, di en deh ya. Az unu don yehr, di Enimi a Krais di kohn, ahn lata Krais enimi don deh ya aredi. Dat da how wi noa seh dat di en deh kloas.

¹⁹Dehn wan weh da Krais enimi dehn gaahn fahn monks wi kaa dehn da neva wan a wee. If dehn da-mi wan a wee, dehn mi wahn stay wid wi. Bot kaa dehn gaahn fahn monks wi, dat shoa dat dehn da neva wan a wee.

²⁰Bot Gaad don poar owt ih Hoali Spirit pahn unu, ahn now unu noa di chroot.

²¹Ah noh di rait tu unu kaa unu noh noa di chroot, bot kaa unu noa it, ahn no lai noh kom owta di chroot.

²²Da hoo di lai? Da dehn wan weh seh dat Jeezas da noh di Krais. Da dehn da di Enimi a Krais, kaa dehn noh bileev eena di Faada ahn di Son.

²³Dehn wan weh noh bileev eena di Faada noh ga di Son needa. Bot dehn wan weh seh wid dehn mowt dat dehn bileev eena di Son ga di Faada tu.

²⁴Mek weh unu yehr fahn di biginin aalwayz liv eena unu. If unu mek weh unu yehr fahn di biginin aalwayz stay eena unu haat, den unu wahn aalwayz bee wan wid di Son ahn wid di Faada.

²⁵Ahn di Son ihself mi pramis wi laif weh wahn neva en.

²⁶Now Ah di rait dehn ting ya tu unu bowt dehn wan weh wuda waahn fool unu op.

²⁷Az fi unu, Gaad don poar owt ih Hoali Spirit pahn unu, soh unu noh haftu ga nobadi di teech unu di chroot. Kaa evriting weh di Spirit teech unu da chroo; da noh lai. Soh unu mos kantinyu fi bee wan wid Krais jos laik how di Spirit teech unu.

²⁸Ahn now, unu weh da mi pikni dehn, kantinyu fi bee wan wid Krais, soh dat wen ih kohn bak, unu wahn ga korij fi fays ahn, ahn unu noh wahn haftu feel shaym ahn haid fahn ahn pahn da Day.

²⁹Unu noa dat Krais aalwayz du weh rait, soh evribadi weh du weh rait da wan a Gaad pikni dehn.