1 ዮሃኒሳ ኪታ 4

1

2

3

4

5

¹ታ ሲቆቶ፥ ፆሳ ኣያናይ ታናን ዴዔ ጊያ ኡባ ኣማኖፒቴ፤ ሺን ኡንቱንቱን ዴዒያ ኣያናይ ፆሳፔዬ ዎይ ጊዴኔንቶ ፓጪቴ። ኣዪሲ ጎፔ፥ ጮራ ዎርዶ ናባቱ ኡባሳ ቤዲኖ።

²ፆሳ ኣያና ጊዲያዋ ሂንቴ ሃዋን ኤራና፤ «ዬሱሲ ኪሪስቶሲ ኣሳ ጊዲዴ ዬዳዋ ኣማናይ» ጊያ ኦናኒኔ ዴዒያ ኣያናይ ኡባይ ፆሳፔ ዬ።

³ቃሲ ኪሪስቶሲ ኣሳ ጊዲዴ ዬዳዋ ኣማናይ ጌናዋ ኣያናይ ኡባይ ፆሳፔ ዪቤና፤ ኣኒ ኪሪስቶሳ ኤቄቲያ ኣያናይ ዴዔ። ሂንቴ ሄዌ ያናዋ ካሴ ሲሴዲታ፤ ኢ ሃራይ ኣቶ ሃዒካ ሃ ኣላሚያን ዴዔ።

⁴ታ ናቶ፥ ሂንቴ ፆሳዋንታ፤ ሂንቴ ጊዶን ዴዒያ ጌሻ ኣያናይ ሃ ኣላሚያን ዴዒያ ኣያናፔ ዳሮ ዎልቃሚያ ዲራው፥ ዎርዶ ናባቱዋ ሂንቴ ፆኔዲታ።

⁵ኡንቱንቱ ሃ ኣላሚያ ኣሳ ጊዲያ ዲራው፥ ሃ ኣላሚያባ ሃሳዪኖ፤ ሃ ኣላሚያ ኣሳይካ ኡንቱንቱ ሃሳያ ሲሴ።

⁶ኑኒ ፆሳዋንታ፤ ፆሳ ኤሪያ ኦኒኔ ኑኒ ጊያዋ ሲሴ። ፆሳ ኤሬና ኦኒኔ ኑኒ ጊያዋ ሲሴና። ኑኒ ቱሙ ኣያናኔ ዎርዶ ኣያና ሄዋን ሻኬቶ።

⁷ታ ሲቃቶ፥ ሲቁ ፆሳፔ ዪያ ዲራው፥ ኣኔ ኢቱ ኢቱዋና ሲቄቶይቴ። ሲቄቲያ ኦኒኔ ፆሳ ናና፤ ፆሳካ ኤሪኖ።

⁸ፆሳ ኤሻይ ሲቆ ጊዲያ ዲራው፥ ሲቄና ኡራይ ኦኒኔ ፆሳ ኤሬና።

⁹ፆሳይ ኑና ባሬ ሲቁዋ ሃዋን ቤሴዳ፤ ኑኒ ኣ ባጋና ዴዑዋ ዴማና ማላ፥ ባሬ ኢቲ ናዓ ሃ ኣላሚያ ኪቴዳ።

¹⁰ሲቁዋ ጊያዌ ሃዋ፤ ፆሳይ ኑና ሲቂዴ፥ ኑኒ ኑ ናጋራፔ ማሮቴꬃ ዴሜዳ ባሬ ናዓ ኑሲ ኪቴዳፔ ኣቲን፥ ኑኒ ኣ ሲቄዳዋና ጊዴና።

¹¹ታ ሲቆቶ፥ ፆሳይ ኑና ሃዋዳን ሲቄዳዋ ጊዶፔ፥ ኑኒካ ኢቱ ኢቱዋና ሲቄታናው ቤሴ።

¹²ፆሳ ኦኒኔ ሙሌካ ቤዒቤና፤ ኑኒ ኢቱ ኢቱዋና ሲቄቶፔ፥ ፆሳይ ኑ ጊዶን ዴዔ፤ ኣ ሲቁካ ኑ ጊዶን ፖሌቴዳ።

¹³ፆሳይ ባሬ ኣያና ኑሲ ኢሜዳ ዲራው፥ ኑኒ ፆሳ ጊዶን ዴዒያዋኔ ኢካ ኑ ጊዶን ዴዒያዋ ኤሬቶ።

¹⁴ፆሳ ኣዉ ባሬ ናዓ ሃ ኣላሚያ ኣሺያዋ ጊዳናው ኪቴዳዋ ኑኒ ቤዒዴ ማርካቴቶ።

¹⁵ዬሱሲ ፆሳ ናዓ ጊዲያዋ ማርካቲያ ኦ ጊዱዋኒኔ ፆሳይ ዴዔ፤ ኢካ ፆሳ ጊዶን ዴዔ።

¹⁶ፆሳይ ኑና ሲቂያዋ ኑኒ ኑ ሁጴው ኤሬቶኔ ኣማኔቶ። ፆሳይ ሲቁዋ። ሲቁዋን ዴዒያ ኦኒኔ ፆሳ ጊዶን ዴዔ፤ ፆሳይካ ኣ ጊዶን ዴዔ።

¹⁷ኑ ዴዑ ሃ ኣላሚያን ኪሪስቶሲ ዴዔዳዋ ማላ ጊዲያ ዲራው፥ ፒርዳ ጋላሲ ኑኒ ያዬና ማላ፥ ሲቁ ኑ ጊዶን ፖሌቴዳ።

¹⁸ሲቁዋን ያሺ ባዋ፤ ጋሱካ ቱሙ ሲቁ ያሻ ኬሲ ኦሌ። ያሻይኔ ሙራይ ኢቲፔ ቢያ ዲራው፥ ያዪያ ኡራ ሲቁ ኩሜንꬃ ጊዴና።

¹⁹ፆሳይ ኮይሮ ኑና ሲቄዳ ዲራው፥ ኑኒ ኣ ሲቄዶ።

²⁰ኦኒኔ፥ «ታኒ ፆሳ ሲቃይ» ጊዴ ባሬ ኢሻ ኢፆፔ፥ ኢ ዎርዱዋ። ኣዪሲ ጎፔ፥ ቤዔዳ ባሬ ኢሻ ሲቄናዌ ቤዒቤና ፆሳ ሲቃናው ዋኒ ዳንዳዪ?

²¹ቃሲ ኪሪስቶሲ ኑሲ ኢሜዳ ኣዛዙ ሃዋ፤ ፆሳ ሲቂያ ኡራይ ባሬ ኢሻካ ሲቃናው ቤሴ።