1 ዮሃኒሳ ኪታ 3

1

2

3

4

5

¹ኑኒ ፆሳ ናናቱዋ ጌቴቲዴ ፄሴታና ማላ፥ ፆሳይ ኑና ኣይ ኬና ሲቄዴንቶኔ ቤዒቴ። ኑኒ ቱሙካ ኣ ናናቱዋ። ሃ ኣላሚ ፆሳ ኤሬና ዲራው፥ ኑናካ ኤሬና።

²ታ ሲቃቶ፥ ሃዒ ኑኒ ፆሳ ናናቱዋ፤ ኑኒ ኣያ ሃናኔንቶ ቢሮ ኤሬቲቤና፤ ሺን ኪሪስቶሲ ቆንጪያ ዎዴ፥ ኑኒ ኣ ማላታናዋ ኤሬቶ። ኣዪሲ ጎፔ፥ ኢ ቱሙ ኣ ጊዲያዋ ኑኒ ኩሜንꬃን ቤዓና።

³ቃሲ ኪሪስቶሳ ቤዓና ጊዴ ናሼቻን ናጊያ ኦኒኔ ኪሪስቶሲ ጌሻ ጊዴዳዋዳን፥ ባሬና ጌሼ።

⁴ናጋራ ኦꬂያ ኡባይ ፆሳ ሂጊያ ሜንꬄ፤ ኣዪሲ ጎፔ፥ ናጋራይ ፆሳ ሂጊያ ሜንꬁሳ።

⁵ኪሪስቶሲ ኣሳ ናጋራ ꬋዪሳናው ቆንጬዳዋ ሂንቴ ኤሪታ፤ ኣኒ ናጋራይ ባዋ።

⁶ኪሪስቶሳን ዴዒያ ኦኒኔ ናጋራ ኦꬂዴ ዴዔና፤ ቃሲ ናጋራ ኦꬂዴ ዴዒያ ኦኒኔ ኣ ቤዒቤና ዎይ ኤሪቤና።

⁷ታ ናቶ፥ ኦኒኔ ሂንቴና ባሌꬆፖ። ኪሪስቶሲ ፂሎ ጊዲያዋዳን፥ ፂሎባ ኦꬂያ ኡራይ ፂሉዋ።

⁸ፃላሂያ ካፑ ኮዪሩዋፔ ናጋራ ኦꬄዳ ዲራው፥ ናጋራ ኡባ ዎዴ ኦꬂያ ኡራይ ፃላሂያ ካፑዋሳ፤ ሄዋ ዲራው፥ ፆሳ ናዓይ ፃላሂያ ካፑዋ ኦሱዋ ꬋዪሳናው ቆንጬዳ።

⁹ፆሳ ናናቱዋ ጊዲያ ኡባይ ፆሳ ሜꬌታይ ኡንቱንቱን ዴዒያ ዲራው፥ ናጋራ ኡባ ዎዴ ኦꬂኪኖ፤ ቃሲ ፆሳይ ኡንቱንቱ ኣዉዋ ጊዲያ ዲራው፥ ናጋራ ኦꬃናው ዳንዳዪኪኖ።

¹⁰ፆሳ ናናቱዋ ጊዱዋኒኔ ፃላሂያ ካፑዋ ናናቱዋ ጊዶን ዴዒያ ዱማቴꬃይ ሃዋን ኤሬቴ፤ ፂሎባ ኦꬄናዋንቱኔ ዎይ ባሬ ኢሻ ሲቄናዋንቱ ኦኒኔ ፆሳ ናናቱዋ ጊዲኪኖ።

¹¹ኣዪሲ ጎፔ፥ ኮዪሩዋፔ ሂንቴ ሲሴዳ ኪታይ፥ «ኢቱ ኢቱዋና ሲቄታናው ቤሴ» ያጊያዋ።

¹²ኑኒ ቃዬላ ማላ ጊዳናው ቤሴና። ቃዬሊ ፃላሂያ ካፑዋሳ፤ ሄዋ ጊዶ ዲራው፥ ባሬ ኢሻ ዎꬌዳ። ኢ ባሬ ኢሻ ኣዪሲ ዎꬌዴ? ኢ ኦꬄዳ ኦሱ ኢታ ጊዲና፥ ኣ ኢሻይ ኦꬄዳ ኦሱ ሎዓ ጊዴዳ ዲራው ዎꬌዳ።

¹³ታናዳን ፆሳ ካሊያዋንቶ፥ ሃ ሳዓ ኣሳይ ሂንቴና ኢፆፔ፥ ኦራꬃባ ጎፒቴ።

¹⁴ኑኒ ኣማኒያዋንታ ሲቂያ ዲራው፥ ሃዪቁዋፔ ዴዖ ፒኔዳዋ ኤሬቶ፤ ኣማኒያዋንታ ሲቄና ኡራይ ኦኒኔ ሃዪቁዋ ጊዶን ዴዔ።

¹⁵ኣማኒያዋንታ ኢፂያ ኦኒኔ ሼምፑዋ ዎꬌዳዋ፤ ቃሲ ሼምፑዋ ዎꬌዳዋን ሜꬊና ዴዑ ባዪናዋ ሂንቴ ኤሪታ።

¹⁶ኪሪስቶሲ ባሬ ሼምፑዋ ኑ ዲራው ኣꬂዴ ኢሜዳዋን ሲቁ ኣዬንቶ ኑኒ ኤሬዶ፤ ኑኒካ ኣማኒያዋንቱ ዲራው፥ ኑ ሼምፑዋ ኣꬂዴ ኢማናው ቤሴ።

¹⁷ሺን ዱሬ ኣሳይ ኦኒኔ ባሬ ኢሻይ ሜቶቲያዋ ቤዒዴ፥ ኣው ቃሬቴናን ኢፆፔ፥ ባሬ ዎዛናን ፆሳ ሲቃይ ጋናው ዋኒ ዳንዳዪ?

¹⁸ታ ናቶ፥ ኑኒ ኦሱዋኒኔ ቱማቴꬃን ሲቄቶይቴፔ ኣቲን፥ ጮ ሃሳያን ዎይ ቦላ ዶናን ሲቄታናው ቤሴና።

¹⁹ኑኒ ቱሙዋ ባጋን ዴዒያዋ ሄዋን ኤራና፤ ቃሲ ኑ ዎዛናይ ኑ ቦላ ፒርዲያ ዎዴ ኡባን፥ ፆሳ ሲንꬃን ቱማቴꬃ ኑና ሄዋን ኤሪሴ። ኣዪሲ ጎፔ፥ ፆሳይ ኑ ዎዛናፔ ዎልቃማ፤ ቃሲ ኢ ኡባባ ኤሬ።

²¹ታ ሲቃቶ፥ ኑ ዎዛናይ ኑ ቦላ ፒርዴናዋ ጊዶፔ፥ ኑኒ ፆሳ ሲንꬃን ያዮኮ።

²²ኑኒ ኣ ኣዛዙዋ ናጊያ ዲራዉኔ ኣ ናሼቺያባ ኦꬂያ ዲራው፥ ዎሲያ ኡባባ ኣፔ ኣኬቶ።

²³ፆሳ ኣዛዙ ሃዋ፡ ኪሪስቶሲ ኑና ኣዛዜዳዋዳንካ፥ ፆሳ ናዓ ዬሱሲ ኪሪስቶሳ ሱንꬃን ኑኒ ኣማናናዳኒኔ ኢቱ ኢቱዋና ሲቄታናዳን ፆሳይ ኑና ኣዛዜዳ።

²⁴ፆሳ ኣዛዙዋ ናጊያ ኦኒኔ ፆሳ ጊዶን ዴዔ፤ ፆሳይካ ኣ ጊዶን ዴዔ፤ ፆሳይ ኑሲ ኢሜዳ ኣ ኣያና ባጋና ኢ ኑ ጊዶን ዴዒያዋ ኑኒ ኤሬቶ።