Text copied!
CopyCompare
Kâte Bible - Johane I

Johane I 2

Help us?
Click on verse(s) to share them!
1Naru motecfâc‐nane, ŋoŋe sâqocne banʒipiŋte dâŋ i qâreŋke‐ŋarekopac. Â moc e sâqocne baocmu, ine Mamactao sacfozic‐nâŋec Jesu Kristo e tiŋne runezi jukac, irec manasuzejec.
2Eki hâcne sâqocne‐nâŋecte kiwiric rowec, erâ nâŋâcne sawa mâcne, mâreŋ sâc ŋic jaŋere mâmâc rowec.
3Anutu mana maŋ eeŋgopeneŋ, ine sâcmutâc dâŋticne mana rereŋ epene fuŋne jaŋgeŋkeme mananaŋmu.
4Â ŋic moc e sâcmutâc dâŋticne mana rereŋ mi ehuc muocmu, “No Anutu mana maŋ eekopac”, ere burecŋic muzo, ŋic iŋucnere maŋko dâŋ fâri qizecne mi fokac.
5Moc e ine Anuture dâŋ mana rereŋ eocmu, e jâmbomac Anutu maŋjauŋ fârine ecneocmu. Iŋuc ehuc ine Anuturao qohotaeŋgopeneŋ irec fuŋne taniŋkeme mananaŋmu.
6Moc e Anuturao qohotahuc jukopac muocmu, e Jesu juwec irec sâcko jaha juzejec.
7Jorocfâc‐nane, no sâcmutâc dâŋ ɋâricne moc mi qâreŋke‐ŋarekopac, i raŋɋane, fuŋnaonec mana wefuhuc jueŋgopieŋ i hâcne. Dâŋ qazu‐ŋarekicne irec hâcne sâcmutâc dâŋ raŋɋane mukopac.
8Erâ dâŋ qâreŋkekopac i sâcmutâc dâŋ ɋâricne wâc ekac, i Jesurao â ŋoŋerao mâmâc fârine ekac. Ine fuŋne ʒiŋucte: Dapâc raruŋkehame tatamac fârinezi fua tâcnehuc fokac.
9Eme ŋic moc e âgo‐ticne qaisockeekaczi “no tatamacko jukopac”muocmu, ere dapâcko juweczi jukac muzo.
10Â moc e âgo‐ticne maŋzi jauŋkeocmu, e ine tatamacko sâcne juraocmu, ehuc sâqocne bâbâiŋ moc mi bâfuaocmu.
11Â moc e âgo‐ticne qaisockeocmu, e ine dapâcko juocmu â dapâcte hatao raocmu, e dapâcko ʒâŋe fime qiŋquŋkeme wemocko hata‐ticne hone taraocmu.
12Naru motec ŋoŋe Jesu ʒâŋe‐ticnere erâ sâqocne bâtâmire‐ŋarekicnere dâŋ qâreŋke‐ŋarekopac.
13Mamac ŋoŋe juwarehuc juwec sanaŋ e mana maŋ embiŋte dâŋ qâreŋke‐ŋarekopac. Ŋicmotec ŋoŋe sâqocne rune sanaŋkecnembiŋte dâŋ qâreŋke‐ŋarekopac. Naru motec ŋoŋe Mamac mana maŋ embiŋte dâŋ qâreŋke‐ŋarekopac.
14Mamac ŋoŋe juwarehuc juwec sanaŋ e mana maŋ embiŋte dâŋ qâreŋke‐ŋarekopac. Ŋicmotec ŋoŋe sasanaŋ‐ŋeŋic fokac â Anuture dâŋzi maŋŋeŋicko fokac â sâqocne rune sanaŋkecnembiŋte dâŋ qâreŋke‐ŋarekopac.
15Maŋŋeŋic mâreŋko me mâreŋte wiacko mi râepie fozejec. Moc e maŋticne mâreŋko râeme foocmu, e wemocko Mamac maŋjauŋ ecneocmu.
16Manaŋgopieŋ, mâreŋkopec wiac sasawa: Sahaczi sasec, ʒâŋezi sasec â maŋzi fefe wiac, i Mamactaonec mâcne, i mâreŋkonec.
17Eme mâreŋ e sasec wiac‐ticnehec siroweocmu, Anuture micdâŋ mana rereŋ eocmu e ine juhuc juocmu sanaŋ.
18Naru motecfâc‐nane, dameŋ bembeŋke‐jâmbâŋkekac; eme ŋoŋe Kristore râsi qizec fuaocte mukicne i manaŋgopieŋ; eme ʒi biac râsifâcne bocjaha fuambiŋ juraŋgopieŋ; irec hâcne dameŋ bembeŋke‐jâmbâŋkekac i manaŋgopeneŋ.

19Jaŋe fufua i nâŋâcne ŋondeŋkonec fuambiŋ, â âgo fârifâc‐nâŋec juju ine mi jumbiŋ. Jaŋe âgo fârifâc‐nâŋec jurâ muzac mi behec‐nâponʒapiŋ. Behec‐nâpombiŋ i fuŋne ʒiŋuc taniŋkeocte embiŋ: Nâŋâcnehec jueŋgopieŋ jaŋe âgo fârifâc‐nâŋec sasawa aricne.
20Ŋoŋe ine Tiri runezi Mâro rua‐ŋarewecte mamanahec sasawa juŋgopieŋ.
21Ŋoŋe dâŋ fâri qizecne kâuc baeŋgopieŋ muhuc papia mi qâreŋke‐ŋarekopac. Aricne, ŋoŋe dâŋfâri manaeŋgopieŋte qâreŋke‐ŋarekopac. Erâ wâc ʒiŋucte: Burec sasawa i ere maŋnaonec mi fuaekac.
22Burecŋic i more muzo? Jesu e Kristo aricne, ŋic moczi iŋuc mume ere burecŋic muzo. Mamac â Ŋokâ mic bacjofaocmu, ŋic ere muzo, e Kristore râsi qizec.
23Moc e Ŋokâ mickeocmu, e Mamac mâmâc qikiŋneocmu, â moc e Ŋokâ muɋaɋackeocmu, e Mamac mâmâc sakareocmu.
24Fuŋnaonecteaŋ mitidâŋ mana warehuc jumbiŋ i hâcne maŋke junʒepieŋ. Mitidâŋ i maŋke jupie Ŋokâ â Mamac jahe iŋuc jaha maŋŋopahuc junicmu.
25Wiac i Jesuzi biŋe qanârewec, juju sanaŋ hâcne.
26Maŋ bâsifuc eŋareeŋgopieŋ jaŋere dâŋ iŋuc qâreŋke‐ŋarekopac.
27Ŋoŋere ine ʒiŋuc mukopac, Mâro rua‐ŋarewec i ŋoŋerao foocmu, irec wemocte ŋic moczi mu qazuc eŋareocmu, i aricne. Mâro ruambiŋ eki dâŋ sasawa ŋaza qazuc eekac. Eme dâŋ i burec mâcne, i jâmbomac. Eme qazu‐ŋarewec iŋuc maŋnao junʒepieŋ.
28Naru motecfâc‐nane, ŋoŋe Kristo maŋnao junʒepieŋ. Eme juku fua tâcneme qacfiric domanʒepeneŋ, ehuc fifisi‐ticnao mimiʒu qâʒuʒu ehuc wise ŋeŋe uruŋ mi enʒepeneŋ.
29Anutu e tiŋne juekac, ŋoŋe iŋuc manaeŋgopieŋko ine ŋic moc tiŋnea jume honerâ munʒepieŋ, Anuturaonec fuawec.