1Nambanya wane paluma, nyakamame koo napyepape lao nambame pii dake pepa pyao peekelyo. Endakali mendeme koo pilyamo kandao dokopa, naimanya akali epe tolatae Jisasa Kataisame baa nisoo baanya Takange doko pii lamaiyoo katenge.
2Naimanya koo pingi dupanya yanu pyao baame baa tange kundi joo maiya. Naimanya koo pingi dupanya iki daa, yuunya endakali pitakanya koo dupanya apata kundi maiyaka.
3Naimame baanya mana setapae dupa watao minatamano kandao doko, baa lao masetae kalyamano lao masetama.
4Endakali mendeme Gote lao masoo kalyona latala baanya mana setapae dupa watao minala naelyamo doko-kisa Gotenya kiningi pii doko nasilyamopa baame sambo lao katenge.
5Endakali mendeme Gotenya pii minilyamo doko-kisa kiningi Gotenya auu kaenge doko etete sulu soo silyamo. Dopa pipumu dokome naima baa-pipa pakatae kalyamano lao masilyamano.
6Namba Gotepa pakatae kalyona lelyamo endakali dokome Jisasa payamoli pyoaka payapenge.
7Mona setenge paluma, mana setapae nambame nyakamanya pepa pyao peekelyo doko enenge mende, daa. Mana setapae wambatae kandasoo nyakama-kisa siamo dokoaka pyekelyo. Mana setapae wambatae doko pii wamba nyakamame sepeamino dokoaka.
8Dopaka doko, iminjetae doko pupumopa tii pipae angi doko tii pyoo tee pyatelyamo dokonya nambame mana setapae doko nyakama kandao enenge joo langilyo. Kataisapi nyakamapinya paenge dokome mana setapae enenge lelyo doko kiningi panenge.
9Endakali mendeme “Namba tii pipae dokonya kalyona” latala endakali yango imbu kayamailyamo doko iminjetae dokonya mee kalyamo.
10Endakali mendeme endakali yango auu kaelyamo doko tii pipae ongonya katawaka kalyamo. Baa lombapae sepenge tenge mende napalelyamo.
11Endakali mendeme endakali yango imbu kayamailyamo doko baa iminjetaenya katao payapala lenge iminjipumu dokome anja pelyope lao masala naelyamo.
12Wane paluma, Goteme Jisasa lao masetala nyakamanya koo dupa kunanya nepatelyamo tenge ongonya nambame pii datupa nyakamanya pepa pyekelyo.
13Akali lyanga paluma, baa tee piamo ongopa katea kalyamo doko lao nyakamame masetae kalyamino tenge ongonya nambame nyakamanya pepa pyekelyo. Akali angi paluma, nyakamame akali koo doko ita minateamino tenge ongonya nambame nyakamanya pepa pyekelyo.
14Wane paluma, nyakamame Takange doko lao masetae kalyamino tenge ongonya nambame nyakamanya pepa pyekelyo. Akali lyanga paluma, baa tee piamo ongopa katea kalyamo doko lao nyakamame masetae kalyamino tenge dokonya nambame nyakamanya pepa pyekelyo. Akali angi paluma, nyakama pupu lao kalyamino dokonyapi, Gotenya pii doko nyakama-kisa salakao silyamo dokonyapi, nyakamame akali koo doko ita minateamino dokonyapi tenge dutupanya nambame nyakamanya pepa pyekelyo.
15Nyakamame isa yuu koo dake tamopi isa yuu koo dakenya singi dupa tamopi dupa auu nakayalapape. Isa yuu dake auu kaelyamo endakali dokome Takange doko auu nakaenge.
16Yuunya endakali dupanya mana dupa pitaka naimame masilyamano. Yongeme nyoani kayapala mona sakatengepi, lengeme kandatala nyipu laka lao masingipi alyasale kalyo lao masoo luingipi mana dopale dupa Takange-kisa katao naepenge. Daa, mana dupa yuu dakenya pyakalyingi.
17Isa yuu dakepa dokonya nyipu laka lao masingi dokopa dolapo lapota aluaka pingi. Dopaka doko, Goteme masilyamoli pingi endakali doko etete katawaka katata.
18Wane paluma, yuu gii etete etao doko indupa lamo. Nyakamame Kataisanya yandapipi doko ipatana lapae wamba sepeami. Indupa Kataisanya yandapipi longo paka ipatelyamino dokonya naimame yuu gii etete etao doko indupa lamona lao masilyamano.
19Dutupa naima-pipa awapa katao peaminoaka doko, naimanya joo nakateami. Naimanya joo kateamili kandao doko, naima-pipa awapa mee kateamali. Dopaka doko, naimanya joo nakateamino doko panasalanya naima yakinatala pateami.
20Akali etete epe dokome Oli Sipitisa doko nyakama mee ditapumopa nyakama pitakame masoo kalyamino.
21Nambame nyakama kiningi pii doko masala naelyaminona lao pepa pyao peakala naelyo. Daa, nambame nyakama kiningi pii masoo kalyamino dokopa, pii dokome sambo pii mende manja naenge dokopa tenge dolaponya pepa pyao peekelyo.
22Sambo lenge akali doko api kalyape? Jisasa baa Kataisa daana lao kalyamo akali dokome sambo lao kalyamo. Takange dokopa Ikiningi dokopa maita mailyamo endakali doko baa Kataisanya yandapipi jilyamo.
23Ikiningi doko maita maingi endakali doko pitaka Takange doko-pipa wakale katenge. Ikiningi doko lao panasilyamo endakali doko Takange doko-pipa pakatae katenge.
24Nyakamame pii kandasoo siamino doko minawaka kalyepape. Pii doko minawaka katatamino kandao doko, Takange dokopa Ikiningi dokopa dolapo-pipa nyakama pakatae katatami.
25Kataisame naima mende ditona leamo doko lete etete katenge doko ditopa lao lea.
26Nyakama minakasoo makande pilyamino dokonya nambame pii dupa pepa pyekelyo.
27Jisasame Oli Sipitisa nyakama diamo doko nyakama-pipa pakatae katenge. Dopana nyakama mendeme mana langipenge joo nakalyamino. Jisasame Oli Sipitisa diamo dokome dupa pitakanya nyakama mana langingi dupa sambo daa, kiningi. Sipitisa dokome nyakama mana langiamoli pyoo nyakama Jisasapa pakatae kalyepape.
28Wane paluma, indupa nyakama baapa pakatae katapenge. Dopa pitaminopa tenda baa panao dee ipatamo gii dokopa naima baanya enombasa pakapi elyapi mende nakayatama.
29Nyakamame Jisasa baa etete tolataena lao masetamino kandao doko, mana tolao miningi endakali doko pitaka Gotenya mandipaena lao masalapapeaka.
