Яритилиш 14

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Шинарниң падишаһи Амрафәл, Әлласарниң падишаһи Ариоқ, Еламниң падишаһи Кедорлайомәр вә Гойимниң падишаһи Тидалниң күнлиридә шу вақиә болдики,

²улар бирлишип Содомниң падишаһи Бера, Гоморраниң падишаһи Бирша, Адмаһниң падишаһи Шинаб, Зәбоимниң падишаһи Шәмебәр вә Бела (йәни Зоар)ниң падишаһиға қарши һуҗумға атланди.

³Бу бәшиниң һәммиси келишип Сиддим вадисиға, йәни «Шор Деңизи» вадисиға жиғилди.

⁴Улар он икки жил Кедорлайомәргә беқинди болди, он үчинчи жилға кәлгәндә, Кедорлайомәргә қарши исян көтәрди.

⁵Он төртинчи жили Кедорлайомәр вә униңға иттипақдаш болған падишаһлар һәммиси жиғилип, Аштарот-Карнаим дегән йәрдә рәфайийларға, шундақла Һам дегән йәрдә зузийларға, Шавәһ-Кириатайимда Eмийларға һуҗум қилип уларни йәңди;

⁶андин улар Һорийларни уларниң Сеир теғида мәғлуп қилип, чөлниң йенидики Әл-Паранғичә сүрүп-тоқай қилди.

⁷Арқидинла, улар Ән-Мишпатқа (йәни Қадәшкә) йенип келип, Амаләкләрниң пүткүл жутини булаң-талаң қилди; Һазазон-Тамарда олтиришлиқ Aморийларниму һуҗум қилип мәғлуп қилди.

⁸Шуниң билән Содомниң падишаһи, Гоморраниң падишаһи, Адмаһниң падишаһи, Зәбоимниң падишаһи вә Беланиң (йәни Зоарниң) падишаһи чиқип, Сиддим вадисида уларға қарши җәң қилишқа сәп тизди;

⁹мошу бәшәйлән Еламниң падишаһи Кедорлайомәр, Гойимниң падишаһи Тидал, Шинарниң падишаһи Амрафәл, Әлласарниң падишаһи Ариоқ қатарлиқлар билән соқушти; йәни төрт падишаһ билән бәш падишаһ өз ара соқушти.

¹⁰Сиддим вадисидики һәммила йәрдә қаримай орәклири бар еди. Содом вә Гоморраниң падишаһлири қечип, орәкләргә чүшүп кәтти. Амма қалғанлар болса таққа қечип кәтти.

¹¹Ғалип кәлгән төрт падишаһ болса Содом билән Гоморраниң һәммә мал-мүлкини вә барлиқ озуқ-түлүгини елип кәтти.

¹²Улар йәнә Абрамниң җийәни Лутниму маллири билән қошуп елип кәтти; чүнки у Содомда олтирақлашқан еди.

¹³Һалбуки, қутулуп қалған бириси берип бу ишларни ибраний Абрамға ейтти. Шу чағда у Аморий Мамрәниң дубзарлиғиниң йенида туратти. Мамрә болса Әшкол вә Анәрниң акиси еди; бу үчәйлән Абрам билән иттипақдаш еди.  

¹⁴Абрам қериндишиниң әсир болуп қалғанлиғини аңлап, өз өйидә туғулған, алаһидә тәрбийиләнгән үч йүз он сәккиз адәмни башлап чиқип, төрт падишаһни қоғлап данғичә барди.

¹⁵Кечиси у адәмлирини гуруппиларға бөлүп, улар билән бирликтә һуҗум қилип уларни мәғлуп қилип, уларни Дәмәшиқниң шимал тәрипидики Һобаһ дегән җайғичә қоғлап берип,

¹⁶пүткүл олҗа алған мал-мүлүкни қайтурувалди; өз қериндиши Лутни, униң мал-мүлки вә хотун-қизлирини, шундақла барлиқ қалған адәмләрни яндуруп кәлди.

¹⁷Абрам Кедорлайомәр вә униң билән иттипақдаш падишаһларни мәғлуп қилип, қайтип кәлгәндә, Содомниң падишаһи Шавәһ вадиси (йәни Хан вадиси)ға униң алдиға чиқти.

¹⁸Салемниң падишаһи Мәлкизәдәкму нан билән шарап елип алдиға чиқти. У зат болса, Һәммидин Алий Тәңриниң каһини еди;  

¹⁹у Абрамни бәхит-бәрикәтләп: — «Абрам асман билән зиминниң Егиси болған Һәммидин Алий Тәңри тәрипидин бәрикәтләнсун!

²⁰Шундақла дүшмәнлириңни өз қолуңға тапшурған Һәммидин Алий Тәңригә Һәмдусана оқулғай!» — деди. Абрам болса ғәниймәт алған нәрсиләрниң ондин бирини униңға бәрди.

²¹Андин Содомниң падишаһи Абрамға: — Адәмләрни маңа бәргәйла, ғәниймәтләрни өзлиригә алғайла, — деди.

²²Лекин Абрам Содомниң падишаһиға җавап берип: — Мән болсам асман билән зиминниң Егиси болған Һәммидин Алий Тәңри Пәрвәрдигарға қол көтирип қәсәм қилғанмәнки,

²³мән сәндин һәтта бир тал жип нә бир тал боқучиниму нә сениң башқа һәр қандақ нәрсәңни алмаймән; болмиса, сән кейин: «мән Абрамни бай қилип қойдом» дейишиң мүмкин.

²⁴Шуңа жигитлиримниң йегән-ичкини, шундақла маңа һәмраһ болғанлар, йәни Анәр, Әшкол вә Мамрәләргә тегишлик үлүштин башқа, мән ғәниймәттин һеч нәрсә алмаймән; шулар өзлиригә тегишлик үлүшини алсун, — деди.