Sɑkɑri 8

1

2

3

4

5

6

7

8

9

10

11

12

13

14

¹Gusunɔ wɔllu kɑ tem Yinni u geruɑ u nɛɛ,

²nɛn nisinu kpɑ̃ Yerusɑlɛmun sɔ̃. Domi nɑ ye kĩ gem gem.

³Yen sɔ̃nɑ nɑ nɛɛ, kon wurɑ Yerusɑlɛmu ye sɔɔ kpɑ nɑ n wɑ̃ɑ mi. Bɑ koo ye soku wuu gemguu. Kpɑ bu mɑɑ nɛ, Gusunɔ wɔllu kɑ tem Yinnin guu te soku guu dɛɛrɑru.

⁴Durɔ tɔkɔnu kɑ kurɔ tɔkɔnu nu koo kɑ dɛki sĩimɑ kpɑ nu nɑ nu sinɑ yen bɑtumɑbɑ sɔɔ.

⁵Bii ɑluwɑɑsibɑ kɑ bii wɔndiɑbɑ bɑ koo yibu yen bɑtumɑ be sɔɔ bɑ n dweebu mɔ̀.

⁶Isireli be bɑ tien nɔni sɔɔ, yɑ ko n sɑ̃ɑ nge ye yɑ kun kpɛ̃ yu koorɑ. Adɑmɑ nɛ, Gusunɔ wɔllu kɑ tem Yinni, kon kpĩ n mɑɑmɑɑki ye ko. Nɛnɑ nɑ yeni geruɑ.

⁷Wee nɑ nɛn tɔmbu fɑɑbɑ mɔ̀ be bɑ wɑ̃ɑ sɔ̃ɔ yɑri yerɔ kɑ sɔ̃ɔ duu yerɔ.

⁸Kon kɑ bu wurɑmɑ kpɑ bu sinɑ Yerusɑlɛmuɔ bɑ n sɑ̃ɑ nɛn tɔmbu kpɑ nɑ n mɑɑ sɑ̃ɑ ben Yinni gemgii wi u nɑɑnɛ mɔ.

⁹Wee ye nɛ, Gusunɔ wɔllu kɑ tem Yinni nɑ geruɑ. Nɑ nɛɛ, i wɔrugɔru koowo bɛɛ be i nuɑ gisɔ ye nɛn sɔmɔbu bɑ geruɑ sɑnɑm mɛ bɑ nɛn sɑ̃ɑ yee ten kpɛɛkpɛɛku swĩi.

¹⁰Domi yellu, goo ku rɑ win sɔmburun kɔsiɑru wɑ. Goo ku rɑ mɑɑ yɑɑ sɑbe ni nu nùn sɔmburu kuɑn kɔsiɑru wɛ̃. Sɑɑ ye sɔɔ, goo ku rɑ yɑri. Goo ku rɑ mɑɑ du kɑ bɔri yɛndu yibɛrɛbɑn sɔ̃. Domi nɑ tɔmbu yɔ̃suwɑ bu kɑ wɔrinɑ.

¹¹Adɑmɑ tɛ̃, nɑ ǹ mɑɑ Isireli be bɑ tie kuɑmmɛ nge mɛ nɑ kuɑ yellu. Nɛ, Gusunɔ wɔllu kɑ tem Yinniwɑ nɑ yeni geruɑ.

¹²Kon de bɔri yɛndu tu duwɑ tem sɔɔ kpuro. Resɛm yɑ koo mɑ. Gurɑ yɑ koo nɛ kpɑ tem mu dĩɑnu ko. Domɑ nini kpurowɑ kon Isireli be bɑ tie kuɑ.

¹³Bɛɛ Yudɑbɑ kɑ Isirelibɑ, wee i kuɑ bwese te nɑ bɔ̃rusi bwesenun suunu sɔɔ. Adɑmɑ tɛ̃, kon bɛɛ fɑɑbɑ ko kpɑ i n sɑ̃ɑ domɑrugibu tɔmbun suunu sɔɔ. Yen sɔ̃, i ku bɛrum ko. I de i n wɔrugɔru mɔ.

¹⁴Amɛniwɑ nɛ, Gusunɔ wɔllu kɑ tem Yinni nɑ geruɑ. Nɑ nɛɛ, nɑ rɑɑ gɔ̃ru doke n bɛɛ kɔ̃sɑ kuɑ yèn sɔ̃ bɛɛn bɑɑbɑbɑ bɑ nɛn mɔru seeyɑ. Nɑ ǹ dɑɑ gɔ̃ru gɔsie n ye kɔbiɑ.

¹⁵Adɑmɑ tɛ̃, nɑ gɔ̃ru doke n Yerusɑlɛmu kɑ Yudɑn tem kpuro geɑ kuɑ. Yen sɔ̃, i ku bɛrum ko.

¹⁶I kɑ gɑri yini sɔmburu koowo. Yiyɑ, bɑɑwure u n dɑ win winsim gem sɔ̃. Kpɑ i n dɑ bɑɑwure siri gem sɔɔ i n kɑ wɑ̃ɑ bɔri yɛndu sɔɔ.

¹⁷I ku goo kɔ̃sɑ kuɑ. I ku bɔ̃ri weesugii ko. Domi yenibɑ kpurowɑ nɑ tusɑ. Nɛ, Yinni Gusunɔwɑ nɑ yeni geruɑ.

¹⁸Gusunɔ wɔllu kɑ tem Yinni u nɛɛ,

¹⁹nɔɔ bɔku ni i rɑ ko suru nnɛse sɔɔ kɑ suru nɔɔbuse sɔɔ kɑ suru nɔɔbɑ yiruse sɔɔ kɑ suru wɔkuruse sɔɔ, nu koo gɔsirɑ nuku dobun tɔ̃nu Yudɑɔ. Ni sɔɔrɑ bɑ ko n dɑ tɔ̃ɔ bɑkɑnu di. Adɑmɑ yebɑ kpuro sɔɔ, i de i gem kɑ bɔri yɛndu kĩɑ.

²⁰Nɑ mɑɑ wure nɑ nɛɛ, tɔmbu bɑ koo nɑ Yerusɑlɛmuɔ sɑɑ wusu dɑbinun di.

²¹Wusu gɑsun tɔmbu bɑ koo gɑsun tɔmbu sɔ̃ bu nɛɛ, bu dɑ bu nɛ, Gusunɔ wɔllu kɑ tem Yinnin durom kɑsu Yerusɑlɛmuɔ kpɑ bu mɑn sɑ̃.

²²Geemɑ, bwese dɑbinu kɑ mɑɑ bwese ni nu dɑm mɔ nu koo nɑ nu nɛn durom mɛ kɑsu kpɑ nu mɑn sɑ̃.

²³Nɛ, Gusunɔ wɔllu kɑ tem Yinni nɑ nɛɛ, yen tɔ̃ɔ te, bweseru bɑɑtere sɔɔ, tɔmbu wɔku wɔkubu bɑ ko n Yuu turon yɑbe soo nɛni bɑ n mɔ̀, bɑ koo kɑ nùn dɑ. Domi bɑ nuɑ mɑ nɛ, Gusunɔ nɑ wɑ̃ɑ kɑ wi.