Sekaraia 8

1

2

3

4

5

6

7

8

9

10

11

12

13

14

¹Iwe, ewe Samol mi Unusen Manaman a kapas ngeniei,

²“Üa ekipwichi ai üpwe alisi Jerusalem, pun üa fokun echeni aramasan. Lon ai echeniir üa song ngeni chon oputeer.”

³Iei alon ewe Samol mi Lapalap, “Üpwe liwinsefäliti Sion o imweimw lon Jerusalem. Iwe, Jerusalem epwe iteni ewe telinimw mi let, nge chuki epwe iteni ewe chuk mi pin.”

⁴Iei alon ewe Samol mi Unusen Manaman, “Chinlap mwän me chinlap fefin repwe motsefäl lon ekewe lenien mwicheich lon Jerusalem, eman me eman epwe wokukuni pokiten an chinlap.

⁵Nge ekewe alen ewe telinimw repwe ur ren ät me nengin mi urumot lor.”

⁶Iei alon ewe Samol mi Unusen Manaman, “Are ei epwe amwarar ngeni ekewe aramas mi chüen manau lon ei fansoun, ifa usun, epwe pwal amwarar ngeniei?”

⁷Iei alon ewe Samol mi Unusen Manaman, “Üpwe amanaua nei aramas seni ewe fanü ötiu, pwal seni ewe fanü lotou.

⁸Üpwe emwenireto pwe repwe imweimw lon Jerusalem. Iwe, ir repwe nei aramas, nge ngang üpwe ar Kot o nemeniir fän allükülük me pwüng.”

⁹Iei alon ewe Samol mi Unusen Manaman, “Ämi mi rongorong ekei kapas lon ekei rän seni ekewe soufos mi nom lon ewe rän, lupwen longolongun ewe Imwenfel a för, oupwe apöchökülakemi pwe ewe Imwenfel epwe kaüsefälitä.

¹⁰Pun mwen ekana rän esap wor mön än eman aramas angang ika än eman man angang, esap pwal wor eman a tongeni föri an angang fän kinamwe pokiten chon oputan. Pun üa föri pwe aramas repwe fitikokofengen.

¹¹Nge iei üsap chüen föri ngeni ekei aramas mi chüen manau, usun mine üa piin föri me lom.

¹²Aramas repwe amwora pwükil fän kinamwe. Epwe wor uän ewe irän wain, masouen lon pwül epwe märöch, nge läng epwe apüngätiu amurenipwin. Üpwe awora ekei feiöch meinisin ngeni ekei aramas mi chüen manau, pwe repwe eäniir.

¹³Ämi chon Juta me chon Israel, chon ekewe mwü ra piin eänikemi apööpö lon ar kapasen ottek. Nge iei üpwe amanauakemi pwe aramas repwe eänikemi apööpö lon ar kapasen feiöch. Ousap niuokus, nge oupwe apöchökülakemi.”

¹⁴Iei alon ewe Samol mi Unusen Manaman, “Lupwen ämi kewe lewo ra asongaei, üa ekiekietä pwe üpwe afeiengaueer, nge üsap piitela.

¹⁵Nge iei üa pwal ekiekietä pwe üpwe afeiöchü Jerusalem me ekewe chon Juta lon ekei rän. Iei mine ousap niuokus.

¹⁶Ikei ekewe föför oupwe föriir: Oupwe kapas wenechar lefilemi, oupwe eäni kapwüng fän pwüng pwe epwe fis kinamwe.

¹⁷Ousap ekiekin sorongau lon lelukemi eman ngeni eman, ousap pwal sani akapelmwäl. Pun ekei föför meinisin üa oput,” iei alon ewe Samol mi Lapalap.

¹⁸Iwe, ewe Samol mi Unusen Manaman a pwal kapas ngeniei pwe üpwe üreni ekewe aramas,

¹⁹“Ekewe ränin echikefel oua eäni lon arüanün maram, alimuen maram, afisuen maram me aengolun maram repwe wiliti fansoun pwapwa me mwänek me ränin kametip mi apwapwa ngeni chon Juta. Iei mine oupwe sani let me kinamwe.”

²⁰Iei alon ewe Samol mi Unusen Manaman, “Epwe war eu fansoun pwe chon ekewe mwü me chokewe mi imweimw lon chomong telinimw repwe feito Jerusalem.

²¹Chon eu telinimw repwe feila ren pwal chon eu o üra, ‘Ousipwe feila pwe sipwe fel ngeni ewe Samol mi Unusen Manaman o tüngor ngeni pwe epwe ümöümöch ngenikich. Iei sipwe le feila.’

²²Chomong aramas me mwü mi pöchökül repwe feito Jerusalem pwe repwe fel ngeni ewe Samol mi Unusen Manaman, repwe pwal tüngor ngeni pwe epwe ümöümöch ngeniir.

²³Lon ekana rän engol mwän seni ekewe mwü mi sokola ar kapas repwe amwöchü lepwülün üfen eman chon Juta o üra, ‘Kose mochen kopwe mwüt ngenikem pwe aipwe etikemi, pun äm aia rong pwe Kot a etikemi.’”