1मिनु मोसामी इस्राएल आ थर थर ङा ठेयब मुर आन कली “परमप्रभु यावेमी अरेशो मार बाक्त देंशा हना,
2मुर कामी परमप्रभु यावे कली लोव़ पाप्तु हना यो, कसम जाप्तु हना यो, मेकोमी आ पशो लोव़ पचा नु आ कसम जशो खाप्चा माल्ब। मेको आ शोव़ रे मार लोव़ ग्रूशो बाक्मे, मेकोमी मेको खाप्चा माल्ब।
3मिनु मीश आलमी आ आम आफ आस खिंम बाक्मेनु, परमप्रभु यावे कली लोव़ गेप्तु हना यो, कसम जाप्तु हना यो, लेवी २७:२-२५; ब्यवस्था २३:२२; न्यायाधीस ११:३५; उपदेसक ५:३,४; गन्ती ६:१-२१
4मिनु मेको आ आफोमी आ लोव़ नेंशा यो सिक्सी पा बाक्त हना, मेको आ गेशो लोव़ बाक्त हना यो कसम बाक्त हना यो लीब।
5तन्न आ आफोमी मेको नेना नाक्ती ‘मेको मदुम्ब’ देंत हना, मेको आ लोव़ गेशो नु आ कसम जशो मलीब। मेको आ आफोमी मदुम्ब देंतीके परमप्रभु यावेमी मेको आ पाप क्याम्ब।
6मिनु मेकोम कसम जशो बाक्त हना यो, ममिम्थु लोव़ गेवा नोले आ ग्युंबे दुम्त हना,
7मिनु आ वोंइशेमी मेको नेंशा यो सिक्सी पा बाक्त हना, मेको आ गेशो लोव़ बाक्त हना यो कसम बाक्त हना यो मेको लीब।
8तन्न मेको आ वोंइशेमी मेको लोव़ नेंना नाक्त मेको कली ‘मदुम्ब’ देंत हना, मेको आ जशो कसम नु आ ममिम्थु गेशो लोव़ मलीब। मिनु परमप्रभु यावेमी मेको आ पाप क्याम्ब।
9आ वोंइश बेक्शो नु आ वोंइशेमी प्रोंइशो मीश मुरुमी कसम जाप्तु हना, मेको लीब।
10सुइ मीश मुरुमी आ वोंइश आ खिंम बाक्शा, लोव़ गेप्तु हना, कसम जाप्तु हना,
11मिनु आ वोंइशेमी मेको नेंशा यो सिक्सी पा बाक्त हना, मेको आ गेशो लोव़ बाक्त हना यो, कसम बाक्त हना यो, मेको लीब। येरमीया ४४:१९,२५
12तन्न आ वोंइशेमी मेको नेंशा ‘मदुम्ब’ देंत हना, मेको आ गेशो लोव़ ङा कसम मलीब। आ वोंइशेमी मेको आ गेशो लोव़ क्याम्शो बाक्त। मिनु परमप्रभु यावेमी मेको मीश मुर आ पाप क्याम्ब।
13आ वोंइशेमी आ मीश आ मारेइ लोव़ गेशो, आ मारेइ कसम जशो पचा गेने नु क्याम्ने चाप्ब।
14तन्न मेको आ वोंइशेमी मेको नेंशा यो नाक्त किंत किंत सिक्सी पा बाक्त हना, मेकोमी आ कसम जशो नु आ गेशो लोव़ पचा गेशो बाक्ब।
15तन्न मेकोमी नेंना आ नाक्त का निक्शी नोले ‘मेको मदुम्ब’ देंत हना, मेकोमी आ मीश आ तशो दोस कुरचा माल्ब” देंत।
16एको वोंइश मीश नु आ आम आफ आस खिंम बाक्शो मीश आल आ पर्बम फुल्लुम मुशा ब्रेक्शो लोव़ एको बाक्ब। एको लोव़ परमप्रभु यावेमी मोसा कली अरेशो बाक्ब।
