Ʒare Biri 16:11-35

¹¹Irec go â ŋicfâcge ŋoŋe Wofuŋte maio mu kâroŋ epie mi sâckekac. Aroŋ e mo ŋic mo, irec mu kâroŋ ecneŋgopieŋ?”

¹²Eme Mosezi Eliabare ŋokâ jahec Dataŋ â Abiram jahe erao fisinicte dâŋ râeme dâŋ ʒiŋuc bâtikiecnepic: “Nâhe mi hefanacmu.

¹³Mâreŋ burocnao hâmo sipiric enaŋte susu â baŋac fusucmarâ qâmbâriŋkeekac mâreŋ irecnec jowac‐nâpo waremeŋ i go manatec afeckeha ŋicbomboŋ enârezo mukic me?

¹⁴Erâ go mâreŋ susu â baŋac fusucmarâ qâmbâriŋkeekacko râec‐nâpotec mi raʒimbeŋ, ehuc mâreŋ â waiŋ gie wiac nâŋere biŋe eocte wâc nâre tahac mi emeŋ. Go ʒâŋe bâsoŋ enârezo mukic me? Nâhe mi hefanacmu.”

¹⁵Eme Mose e dâŋ i manarâ aaricke sâqoreme Wofuŋ ʒiŋuc âzâcnewec: “Go taha wiac‐jeŋic hone aŋac mi ezemec. No jaŋeraonec doŋgi wiac moc mi ropo erâ wiac gâgâpâcne wâc mi ejarepo.”

¹⁶Mose e iŋuc murâ Kora ʒiŋuc âzâcnewec: “Go gahacne mecne ŋicfâcge jaŋe mecne ŋoŋe tomâcko Aroŋhec Wofuŋte maio fuanʒepieŋ.

¹⁷Ehuc ŋoŋe mâmâc sasawa ʒocrâqâc‐ŋeŋic rofârerâ wiac âsu biaŋ râehuc Wofuŋte maio râenʒepieŋ, ʒocrâqâc 250 hâcne râenʒepieŋ. Erâ Aroŋhec ŋohe mâmâc râezepirec.”

¹⁸Iŋuc mume ŋic sasawa jaŋe ʒocrâqâc‐jeŋic rorâ maŋnao ʒoc kine â wiac âsu biaŋ ropie hume Mose â Aroŋ jahehec tutumaŋte qoruc bozere motâcko tumaŋnerâ domambiŋ.

¹⁹Domahapie Korazi ŋicfâc‐ticne sasawa ejareme jaŋe tutumaŋte qoruc bozere motâcko Mose â Aroŋ râsi ejactehuc domambiŋ. Ehame Wofuŋte huriri qâreŋzi kikefuŋ sasawa batamaec‐jopa‐fârewec.

²⁰Eme Wofuŋzi Mose â Aroŋ dâŋ ʒiŋuc jasawec:

²¹“Ŋohe kikefuŋ keci jaŋe behec‐joparâ bucŋekic domapire mi ʒoraha ututuŋ bâsirowec‐jopazepac.”

²²Eme jahe mâreŋko hetutuckerâ ʒiŋuc muhuc numupic: “O Anutu, go ŋic sasawa jaŋere Anutu, irec ŋic mocjahazi sâqocne bâfuame kikefuŋ sasawa bâsirowec‐jopatec sâckeocmu me?”

²³Iŋuc mupire Wofuŋzi Mose ʒiŋuc âzâcnewec:

²⁴“Go ŋic jazatec jaŋe Kora, Dataŋ â Abiram behec‐joparâ warepie buc domanʒepieŋ.”

²⁵Iŋuc âzâcneme Mosezi faharerâ Dataŋ â Abiram jaherao rahame Israe soŋaŋ micne jaŋe bâjâpembiŋ.

²⁶Ehame kikefuŋ ʒiŋuc jazawec: “Ŋoŋe ŋic repicne keci jaŋere boze behehuc wiac‐jeŋic ba bâuac moc mi enʒepieŋ, ŋoŋe jaŋere sâqocnere erâ sirowenʒipiŋte.”

²⁷Iŋuc jazame jaŋe Kora, Dataŋ â Abiram jaŋere boze behembiŋ. Eme Dataŋ â Abiram jahe ŋokac naru motecfâc‐jekic jaŋehec boze‐jeŋicte motâcko waha domambiŋ.

²⁸Domahapie Mosezi kecʒiŋuc muwec: “Gie sasawa keci i no nahacne maŋte mâcne, Wofuŋzi munareme baekopac irec fuŋne ʒi taniŋkeme honeniŋ.

²⁹Ŋic ʒi jaŋe, ŋiczi hâmoc omane hâmo‐fâreeŋgopeneŋ iŋuc sawa hâmopie, me wiac gâcne fua‐nâreekac irec sâc sawa fua‐jareme, ‘Wofuŋzi mi sorecguwec,’ iŋuc munarenʒepieŋ.

³⁰Me Wofuŋzi mâsi fuŋmoc bame mâreŋzi aŋkerâ ɋâcjopame wâcwiac‐jeŋichec ɋâricne hâmoc haeo hupie honerâ ʒiŋuc mananʒepieŋ: Ŋicguru keci jaŋe hâcne Wofuŋ behe qaisoc ecnembiŋte wiac iŋuc fua‐jarekac.”

³¹Eme Mose e dâŋ i mutara‐fârehame mâreŋ domambiŋ izi fâuckewec.

³²Fâuckerâ aŋkehuc Kora â ŋicfâcne garikiŋfâc‐jeŋic â mafa wiac‐jeŋichec ɋâcjopa‐fârewec.

³³Iŋuc fuame jaŋe wâcwiac‐jeŋichec ɋâricne hâmoc haeo hufârembiŋ. Hufârepie mâreŋ mocwâc kibâzickeme kikefuŋ jaŋere ŋondeŋkonec omaembiŋ hâcne.

³⁴Owackehuc hupie Israe ŋic rârec‐jopahuc domambiŋ jaŋe owa‐jeŋic manarâ kecʒiŋuc muhuc wise‐fârembiŋ: “Ʒira domahapene mâreŋzi ɋâcnâpozackohec.”

³⁵Eme Wofuŋtaonec ʒoc fuarâ ŋic 250 ʒocrâqâc badomambiŋ jaŋe ʒâseŋ‐jopa‐fârewec.