Ʒare Biri 12:3-14

³Mose e mâreŋte faio ŋic jumbiŋ jaŋe jowaruhuc maŋhuhuŋ jâmbâŋ juwec.

⁴Eme jahe dâŋ mupic i Wofuŋzi manarâ izia Mose â Aroŋ â Miriam ʒiŋuc jazawec: “Ŋic ŋokac jahec â moc ŋoŋe tutumaŋ qoruc bozeo wefuniŋ.” Iŋuc mume jaŋe fembiŋ.

⁵Eme Wofuŋ e karorac maŋko waharâ tutumaŋ qoruc bozere motâcko domahuc Aroŋ â Miriam wira‐jacteme mamai rapic.

⁶Eme e ʒiŋuc jasawec: “Ŋohe dâŋnane mananic: Ŋondeŋ‐ŋeŋicko porofete moc juocmu ine Wofuŋ no maŋɋârâŋ‐ticne bâtâcnehuc fuŋne‐nane âzâcne jâutuc epemu, ehuc guŋqâhâŋ ecnerâ dâŋnane âzâcnepemu.

⁷Kiŋaŋŋic‐nane Mose e wiac iŋucne moc mi ecneekopac, e kikefuŋfâc‐nane sasawa soŋaŋ‐jopaocte mucnekicne.

⁸No e guŋko mâcne, tâtâc mai fuacnehuc dâŋ âzâcnepe Wofuŋ qâreŋ‐nane honeekac. Ehame ŋohe wemocte mi hâwic‐ŋofaha kiŋaŋŋic‐nane Mose mana sâqorecnekopirec?”

⁹Eme Wofuŋ e kimbeŋ‐ticne bâruŋke‐jacteha behec‐jofarâ rawec.

¹⁰Ehame karoraczi qoruc boze beherâ feme Miriam e mi wicsanaŋ fuacneme qaŋ kisieckerâ domazejec i! Eme Aroŋzi Miriamtao forisierâ honeme wicsanaŋhec domawec.

¹¹Iŋuc honerâ Mose ʒiŋuc muhuc wâsickewec: “O bomboŋ‐nane, nâhe mutuc erâ bahac bâfuaperec irec okacne mi mac nâctezemec.

¹²Go manatec kogoc moc neŋgoc bumaŋkonec ombâŋtâc fuaekac irec sâc mi ezejec.”

¹³Iŋuc mume Mosezi Wofuŋ kecʒiŋuc muhuc wiracnewec: “O Anutu, go bâpiaŋkecmurâ numu‐garekopac.”

¹⁴Wofuŋzi ine dâŋ ʒiŋuc bâtikiecnewec: “Mamac‐ticnezi ʒâŋe mainao tâfeckeme muzac ine mimiehuc juhame ʒoaŋ 7 tarazac. Irec teuŋ râpenao râepie hurâ juhame ʒoaŋ 7 tarazejec, tarame ine mocwâc ecnepie wefuzejec.”