Numero 12:3-14

³(Si Moises iyan etew he kenà mepelevawen te langun he menge etew te tivuuk he kelibutan.)

⁴Umbe, migkeǥiyan te Nengazen si Moises, si Aaron, wey si Miriam te, “Gawas kew is tetelu keniyan te kampu ne hendiyè kew te Tulda he Edtelevukaayan.” Umbe migawas sikandan is tetelu ne midhendiyè dan te Tulda.

⁵Ne mibulus is Nengazen pinaaǥi te ǥapun he henduen be te tukud ne midhitindeg diyà te ǥemawan duen te Tulda he Edtelevukaayan ne mid-umew zin si Aaron wey si Miriam. Ne hein mid-uvey haazà is dezuwa,

⁶migkaǥi is Nengazen te, “Pemineǥa niw heini: Emun duen ku ebpeneuven diyà te keniyu, ne ebpekidlalag a kandin pinaaǥi te ibpelewasan ku wey ibpeteǥeinep ku.

⁷Piru kenà iring keniyan emun iyan ku edlelaǥan is suluǥuen ku he si Moises, he egkeseriǥan he pengulu te menge etew ku.

⁸Emun ebpekidlalag a kandin, ne iring te ebpeetuvangè key su keladu is kebpekidlalag ku. Ne iring ded te neehè e zin. Piru minsan pa te iyan haazà wazè kew mahandek he egkaǥi te mezaat he ebpekesuǥat diyà te suluǥuen ku he si Moises?”

⁹Utew sikandan nepeuki te Nengazen ne mid-awà sikandin.

¹⁰Hein mid-awè en haazà is gapun diyà te zivavew zuen te Tulda, ne segugunà midtuvùi te zaru te lundis si Miriam, ne utew mibmeputì is lundis din. Ne hein naahà haazà ni Aaron,

¹¹migkeǥiyan din si Moises te, “Datù, kenè key kenikew ipaantus tenged te salà he tinulebung is kegkeveeli zey zuen.

¹²Kenè nu ituǥut he egkeiring si Miriam te vatà he neranran he is ketengà te lawa zin neredak en.”

¹³Umbe, mibpehizuhizu si Moises te Nengazen he ke sikandin te, “He Megbevayè ku, edhangyù a ziyà te kenikew he bewii nu si Miriam.”

¹⁴Midtavak te Nengazen si Moises te, “Kenè be ke ed-ilevan sikandin te amey zin diyà te zagwey zin tenged te kedsewaya zin kandin, ed-entusen din is keelezan seled te pitu he andew? Umbe ipeǥawas sikandin keniyan te kampu seled te pitu he andew, ne emun egkepasad haazà is pitu he andew ne egkehimu en he edlikù sikandin.”