NARONAA 12:3-14

³Musa bi gbɛ̃ busɛɛmɛ, a sára kú andunia gũnlo.

⁴Gwe gↄ̃̀nↄ Dikiri pì Musa kũ Harunao kũ Miriamuoonɛ: À bↄtɛ à gɛ́ dakarɛki kuta kia á gbɛ̃nↄn aakↄ̃. Akũ ò gɛ̀ɛ ń gbɛ̃nↄn aakↄ̃ ń pínki.

⁵Dikiri kìpa tɛ́luku gũn à zɛ̀ kuta pì kpɛ́lɛlɛa. À Haruna kũ Miriamuo sìsi, akũ ò nài ń pla ń pínki.

⁶À pìńnɛ: À ma yã ma. Tó ma annabi ke kú á tɛ́, madì bo mà sua wɛ́gupu gũn madì yã onɛ nana gũmmɛ.

⁷Ama à de lɛ kũ ma zↄ̀bleri Musaoro. Zĩkɛri náanidemɛ ma ↄn gbɛ̃nↄ tɛ́ ń pínki.

⁸Odì yã bo kↄ̃ lɛ́n. Madì yã onɛ mà a ke utɛnɛro. Àdi wɛ́ si ma takalɛ. À kɛ̀ dera ádi ma zↄ̀bleri Musa taari'ena vĩna kɛroo?

⁹Akũ Dikiri pↄ fɛ̃̀ńyĩ à a tá o.

¹⁰Kũ tɛ́luku pìi gò kuta pìla, kusu dà Miriamula gↄ̃̀nↄ, à pura kũ̀ lán buu bà. Kũ Haruna lìtɛ à a gwà, à è kusu dàala,

¹¹akũ à pì Musanɛ: N yã nna Baa! Ǹsun tó ò yↄ̃nkↄyã taarikɛnaa gbɛ̀ lero.

¹²Ǹsun tó àgↄ̃ de lán nɛ́ kũ ò ì gɛ̀ ũ a mɛ̀ kpado yàkanaa bàro.

¹³Musa ↄ́ↄ dↄ̀ Dikirinɛ à pì: Luda, n yã nna! Ǹ a werekↄ̃a.

¹⁴Akũ Dikiri pìnɛ: Tó a de mɛ́ à lɛ́'i fã̀ a ãnnwa, ani kɛnɛ wé'iyã ũ ari gↄrↄ supplaroo? Ò bo kãao bùra kpɛ gↄrↄ suppla gĩa, gbasa ò a sí.