NARONA 12:3-14

³Musa nɛ́ gbɛ̃ busɛmɛ, à sáa kú anduna guuro.

⁴Gwe gↄ̃ↄ Dii bè Musa kↄ̃n Arunao kↄ̃n Miriamuonɛ: À bↄɛ à gá dakↄ̃rɛki kuta kiia a gↄ̃ↄn aagↄ̃a. Ben aↄ̃ gàa ń gↄ̃ↄn aagↄ̃a ń píngi.

⁵Dii pìta tɛ́luguu guu à zɛ̀ kutaa pì kpɛɛlɛa. À Aruna kↄ̃n Miriamuo sìsi, ben aↄ̃ sↄ̃̀zi ń plaa ń píngi.

⁶À bèńnɛ: À ma yã ma. Tó ma annabi kee kú a tɛ́, mɛɛ̀ bↄ mà mↄ́zi wɛ́ɛgupu guu mɛɛ̀ yã onɛ nanaa guumɛ.

⁷Mↄde à dɛ lɛ kↄ̃n ma zↄ̀bleri Musaoro. Zĩkɛri náanɛdeemɛ ma ua gbɛ̃nↄ tɛ́ ń píngi.

⁸Weè yã bↄ kↄ̃ lɛ́n. Mɛɛ̀ yã onɛ mà à ke utɛnɛro. È wɛ́ɛ si ma takalɛ. À kɛ̀ dia ée ma zↄ̀bleri Musa taari'ena vĩa kɛroo?

⁹Ben Dii pↄ fɛ̃̀ńzi, à a taa o.

¹⁰Kɛ̀ tɛ́luguu pì gò kutaa pìla, kusu dà Miriamula gↄ̃ↄ, à pura kũ̀ lán buu bà. Kɛ̀ Aruna lìɛ à à gwà, à è kusu dààla,

¹¹ben à bè Musanɛ: N yã nna Baa! Ǹton tó wà mìsaiyã taarikɛna gbɛ̀ ero.

¹²Ǹton tó àgↄ̃ dɛ lán nɛ́ kɛ̀ wà ì gɛ̀ à mɛ̀ kpadoo yakana bàro.

¹³Musa wii pɛ̀ Diizi à bè: Luda, n yã nna! Ǹ à kɛ̃kↄ̃a.

¹⁴Ben Dii bènɛ: Tó à de bé à lóu sù à uua, eé kɛnɛ wíyã ũ ai gurↄ swɛɛplaaroo? Wà bↄo bùra kpɛɛ gurↄ swɛɛplaa gĩa, gbasa wà à sí.