Zakali 14

1

2

3

4

5

6

7

8

9

10

11

12

13

14

¹Wɛlɛ Ɠɔoɠɔ GALAGI ná-foloi ʋa é ʋaazu, foloi nii ta ɠɛ aniiti gaaɠwɛɛzu la ɗa-ziɠigi ɠoozu, niiti ti zogai kɔɔi zu è ʋɔ bɛ.

²Nà zii ɠiligiti pɛ gaalɛ ba, ti kɔɔi vala Zeeluzalɛme ʋa. Taai ɠa zo, toomai ɠa ɠɛ pɛlɛiti bu, pumai ɗa ɠɛ ga anzanuiti, nuɓusɛi ɠilazuʋɛ pɛ ka li duɔlai zu, kɛlɛ nuɓusɛi mɔta goi ɠa yɛ taazuʋɛ.

³Naa ʋoluma Ɠɔoɠɔ GALAGI ɠa ʋa é kɔɔi ɠɔ zii ɠiligi naati daalɔɠɔma, ʋelei a ɗa kɛɛ la kɔɔɠɔ voloiti su.

⁴Naama volo ná, toɠa lo Wolive ɠizei ma, nii é Zeeluzalɛme ɠobaʋɛ folo ɠulazu ʋelei. Wolive ɠizei ɠa ʋali sakpa ma, é zo folo ɠulazu ʋelei é li folo liizu ʋelei, pɛtu golai ɠɛ ti yɔɠɔzu, gizei ɠilazuʋɛ ɠa likpi ga lɛkpɛma ʋelei nu ɠɔʋɛzuʋɛ, gilazuʋɛ likpi ga lɛkpɛma ʋelei nu yeezazuʋɛ.

⁵Wa ʋela, wo li ga pɛtugi zu ʋelei, nii é nà-gizeiti zɔɠɔzuʋɛ, mazɔlɔɔ pɛtugi naa ɠa li é zei Asale ʋa. Wa ʋela ʋelei wo ɠɛni ʋelazu la zou ɓalii ʋa, Zuda masagi Wɔziase ná-siɛgi zu. Naa ʋoluma nà-GALAGI, Ɠɔoɠɔ GALAGI ɠa ʋa niina, ta ná-geezuɠeela ɲadegaiti pɛ.

⁶Naama volo ná, wozakala ge la mɔ ɠɛa ná, kɔɔlɛ la mɔ ɠɛa ná, ta ziɛɓun ge la mɔ ɠɛa ná.

⁷Foloi naa ɠila kpe nɔ ɠa é nɔnɔ ma, Ɠɔoɠɔ GALAGI ɠa é kwɛɛ, folo la mɔ ɠɛa ná, ɓa kpidi, anɛɛ kpɔkɔi wozakalagi ɠa volo.

⁸Naama volo ná, zɛnvu su ɗɛungi laa ɠa lao Zeeluzalɛme, é ɗa yei, ma ɗɛi ɠilazuʋɛ ɠa yei ga folo ɠulazu ʋele ɓoloɗɛi ʋɔ pelei, gilazuʋɛ yei ga folo liizu ʋele ɓoloɗɛi ʋɔ pelei, ʋele ɠana a ɠɛ la foɠoi ta samai.

⁹Ɠɔoɠɔ GALAGI ɠa masadai ɠɛ eteai pɛ unda. Naama volo ná, Ɠɔoɠɔ GALAGI ɠila kpe nɔ ɠa a ɠɛ ɓɔɠɔ ɠaazu, tɔ ɠila kpe nɔ ɠa tɔɠɔi a ɠula ɓalaa.

¹⁰Zooi naa pɛ ka valibo ga nɛmɛi, é zo Geeɓa é li Limon, Zeeluzalɛme lɛkpɛma ʋelei nu yeezazuʋɛ. Zeeluzalɛme ɠaa ɠa ɠooza koba laaiti pɛ ba, taai zu ɠa wɔɔlɔ, é zo Ɓɛnzamɛn siɠidaʋɛ, é zeeli siɠida ʋɔlɔmai ma, é li Zokosu siɠidaʋɛ, é zo mɔnɔ Ɠananeyɛle ʋɛlɛ ɠaaɠooza golai ma, é zeeli masagi ná-kɔɠɛlaʋɛ.

¹¹Sei ɠa wo taazuʋɛ, ani la mɔ ɠɛa ná nii foovoai, Zeeluzalɛme ɠa zei ziilɛigi zu.

¹²Wɛlɛ maanɔɠɔi niiti ka Ɠɔoɠɔ GALAGI a ti zei nuɓusɛi naati ma, niiti ti kɔɔi ɠɔai Zeeluzalɛme laalɔɠɔma. Ta yɛ vulua ti-ɠɔlɔgi luula ti ma, ti-ɠaazuɠɛzɛgiti ti luula ti-ɠaazuɠokologiti su, ti-nɛgiti ti luula ti-laaɠoozuʋɛti.

¹³Naama volo ná, Ɠɔoɠɔ GALAGI ɠa ti ɠɛ unga wuulee, ta ɠɛ ɓɔɠɔ ziɠazu ga ti-yeeɓuinti, ti dɔ ga kili ga kakaɲɛpi.

¹⁴Zuda nuiti ta ʋɔɔpɛɛ Zeeluzalɛme ɲɛpi ʋa, ta naavoloi ɠula ti-maaɠoolii zu zii ɠiligiti zea, ta zanugi ɠaalɛ ba, naa ʋɛɛ walii ʋa, naa ɓɔ seɠe mɔinmɔin ba.

¹⁵Maanɔɠɔi nii nɔ a zeeli nuɓusɛiti ma, naa ɠɛɠalai nɔ ɠa a zeeli zii ɠiligiti ta-loganiiti ma, ta ɠɛ kɔɔɠɔzuʋɛ, sooiti, soovale fuuluiti, soovalegiti, ta ɲɔmɛiti.

¹⁶Naazu zii ɠiligi niiti kpein ti kɔɔi valaai Zeeluzalɛme ʋa, ta-nuɓusɛi mɔtai niiti ta yɛ vulua naati ta ɗa lɛ kona-o-kona, ti nɔkɔ masagi wu, Ɠɔoɠɔ GALAGI Fai-Pɛ-Maliɠii, ta ti kota vɛtii ɠula.

¹⁷Kɛlɛ ni eteai zu yooi gila kpalaa ka ɠɛlɛna lɛɛzu Zeeluzalɛme, é ʋa nɔkɔ masagi wu, Ɠɔoɠɔ GALAGI Fai-Pɛ-Maliɠii, naama yooi la mɔ tona zɔlɔɔga.

¹⁸Ni Ezipete nuiti ta ɠɛlɛna lɛɛzu Zeeluzalɛme, ti ʋa kota vɛtii ɠula, maanɔɠɔi nii Ɠɔoɠɔ GALAGI daazu zii ɠiligi zɔiti ma, ti la lɛɛni fɛti ɠulazuʋɛ, naa ɠɛɠalai nɔ ɠa a zei ti ma.

¹⁹Naa ɠa a ɠɛ ga Ezipete ta zii ɠiligi zɔiti ta-ɓakɔi a zeeli ti ma, tɛiti ti la lɛɛni kota vɛti ɠulazuʋɛ.

²⁰Naama volo ná, ta sɛʋɛi ɠɛ sooiti kɔbu lalagiti ma, ti ɠɛ ma: «Makɛgɛ Ɠɔoɠɔ GALAGI ʋɛ.» Ɠɔoɠɔ GALAGI ná-pɛlɛi wu liɠiiti ta ɲade, eɠɛ ɲama vaza aniɲakaiti zalaɠa ɠulazuʋɛ ɠakalaʋɛ.

²¹Zeeluzalɛme, ta Zuda liɠiiti kpein ta ve Ɠɔoɠɔ GALAGI ʋɛ, Fai-Pɛ-Maliɠii, niiti kpein ta ɠɛ ʋaazu zalaɠa ɠula vai ma, naati ta ɗa ma liɠiiti seɠe, ti ɗa zalaɠa zuai ɠili ti zu. Naama volo ná, yaaɠo nɔpɛ ge la mɔ ɠɛa Ɠɔoɠɔ GALAGI Fai-Pɛ-Maliɠii ná-pɛlɛi wu.