1Gè ɠaazuwuzeɠeni. gè soo wotolo naanigɔ ɠa, ti ɗa ɠula kɔlu ɓɔi gize felegɔiti zɔɠɔzuʋɛ.
2Soo maaɓɔikpɔigiti ka ti ɠɛni ma mɔungi ʋa, soo lɛigiti ti ɠɛ felesiɛi ʋa.
3Soo ɠolegiti ti ɠɛ saʋasiɛi ʋa, soo ʋɔnɛgiti ti zuɓaai ti ɠɛni naanisiɛi ʋa.
4Gè geezuɠeelai ɠaazaɠani, é ɠɛni ɓɔɛzu pɔ̀, gè ɠɛ ma: «Màliɠii, lee zoo ɠa ga nuuti?»
5É gòoɠaaʋoteni, é ɠɛ mà: «Fiilɛ naanigɔiti be, ti ɠɛa loni eteai Maliɠii ɠobaʋɛ, ti ɠulazu ná niina, ti ɗa li.»
6Soo lɛigi niiti ti ɠɛni wotoloi gilagi ʋa, naati ti liini ga lɛkpɛmaʋɛ nu ɠɔʋɛzu ʋelei yooi zu, naa ʋolu soo ɠolegiti ɓalaa ti ɠulani, soo ʋɔnɛgiti ti liini ga lɛkpɛmaʋɛ nu yeezazu ʋelei yooi zu.
7Soo zuɓaagiti pɛ ti ɠulani, wɔin wola ɠɛni ti ma ga ti eteai ɠɔlɔkɔlɔmaʋɛ pɛ suɓizɛ. É ɠɛni ti ma: «À liina wo eteai ɠɔlɔkɔlɔmaʋɛ pɛ suɓizɛ.» Tama ti eteai ɠɔlɔkɔlɔmaʋɛ pɛ suɓizɛni.
8É tòlini, é ɠɛ mà: «Wɛlɛna zɔiti ti liizu lɛkpɛma ʋelei nu ɠɔʋɛzuʋɛ, naati ta ziilɛigi ve Zɛ̀nvui ʋɛ naama yooi zu.»
9Ɠɔoɠɔ GALAGI ɓɔɛni pɔ̀ ɠani:
10«Yeezei kula zou ʋa nuiti ta-vebɛaniiti bu, nii Ɠɛledayi, ta Toɓiya ta Yedaya ti ʋaai la. Liina za nɔ Sofoni ná-doun zunui Zɔziase ná-pɛlɛi wu, ʋɛ nui niiti ti laayeiɗai ná, ti zeɠeai ma Ɓaɓilɔne.
11Ɗa walii ta zanugi zeɠezu, è ti ɓɛtɛ ga masa bɔɔlɔgi, è dɔ zalaɠa ɠula ɠundiɠi wolai Zozuwe unma, Yewɔsadake ná-doun zunui.
12Ɠɛ ma: ‹Ɠɔoɠɔ GALAGI Fai-Pɛ-Maliɠii wooi ɠaa: Zunui ta ɠa ʋɛ, daaseigi ga Ma Ʋɔnɔgi, toɠa ʋɔnɔ ʋɛ é ná, é Ɠɔoɠɔ GALAGI zei ʋɛlɛi lo.
13Tɔ ɓɔɠɔ ɓa ka é tosu ʋolu. Maa ɠa ɠili ga masa sɔɔlaiti, é masadai ɠɛ ná-masa kpɔkpɔgi zu. Toɠa ɠɛ ga zalaɠa ɠula nui ɓalaa ná-masa kpɔkpɔgi ɠa. Goolaama ʋagɔi ɠa ɠɛ boti felegɔi naati zɔɠɔzu.›
14Masa bɔɔlɔgi ɠa makɛsu Ɠɔoɠɔ GALAGI zei ʋɛlɛi wu, é ɠɛ ga ɠizɛsu anii Ɠeelɛme vaa ma, ta Toɓiya ta Yedaya, naa ʋɛɛ Sofoni ná-doun zunui ná-nuɓɔɠɔlai ʋa.»
15Numaa ta ɠɛ zeɠezu ɠoozama, ti ɗa ʋa, kpɔbai wosu Ɠɔoɠɔ GALAGI zei ʋɛlɛi lo fai zu. Wa kwɛɛ naazu ga Ɠɔoɠɔ GALAGI Fai-Pɛ-Maliɠii ɠa é tèʋegai wo ma. Naa ɠa ɠɛ nɔ ti, ni wa ɠolona Ɠɔoɠɔ GALAGI wooi ʋɛ, wa-ƓALAGI.
