IOANE 1

1

2

8

10

18

20

21

¹MIZMIZ 1 NOSIK 1-20 Keubu able gesep batagmi able Logo dawer; e dawer Agudi kemiem a e dawer able orwaiorwai mokaklam Agud.

²E dawer Agudi doge able giz agraretlam.

³E Agudi kemiem dawer giz agraret kerkerge.

⁴Abi neige Agudide gair lu daratagemda; nole netat lu ge abi umerkak barsirda muige gair lu atagemge.

⁵Able Logo dawer giz ididira, a able idid dawer bi gair leem.

⁶Able bi zorom ezimuli kupkupige a able kupkupide nole netat gaber abi esami.

⁷Agudide temarikda tabara mir aisisle, abra nei dikereder Ioane.

⁸E tabakiamuda le wadaratagerda able bilam, wayakaida legize able mir wayasorda a yaba o wadaraturda.

⁹E nole dawer able bi tababu; e tabakiamuda yabi wadaratagerda able bilam.

¹⁰Able agekar bi pe bi waiswerer gair leem ya watabakiamuda gesepem.

¹¹Able Logo dawer muige able gesep a Agudide able gesep detagmi abi neige ege able gesepide nole abi opdasrerti.

¹²E tabakiamuda able gedim ge abra irdireder ege abi buaigize nole abi erpeidarda.

¹³Wader legize abi erpeidarda a abidoge tabara owatur idagda ege yabi sasrim naiswerda ko bakeri Agudira omaskir berda.

¹⁴Wi nole Agudira omaskir berda gesep tonarge ablegise mokakalam omaskir obaos gesep ablam; Agud dawer tababu yaba Ab.

¹⁵Able Logo akaida le baida a dawer merbi doge mi abra zorom dasmerda, able zorom ge e terpeida a ableglam Babira netat a tebteb werem e dawer au mitkar a omarge agekarge.

¹⁶Ioanede abi detauti.

¹⁷E erer ekrier kega, “Pe dali able le geka abi tiditauter kega, 'e kari keubu tikase a epe no aukale dali karim ableglam e tadawer keubu kaka eosmeda'.”

¹⁸A abi mitkar omarlam mi gair legize erepda werkab a yako areplare gair kerkerge.

¹⁹Gelar ge tabakiamuda mosei doge; omar a agekarmir tabakiamulei Iesu Kerisoi doge.

²⁰Nole netat lelut Agudi dasmeri no able netat a tebteb wermet pe timi Babi tuter tag peke, e abi ikaida paretkak baida.