YƐSÃÃ 90:1-16

¹Mɔyiisi Kuyie nkóo nìtì kù bɑ̀ńtɛ̀mɛ̀. Kòò dɔ̀: Ti Yiɛ̀ nKuyie nnɛ̀ mɛketimɛ̀ mɔ̀nnì fɔ̃́ɔ̃̀ bɑɑ tú ti kó disɔ̀rì.

²Yɛtɑ̃rɛ̀ do í bo dìì mɔ̀nnì, kɛtenkɛ̀ mu ndo í dɔ̀ɔ̀ kɑ̀ɑ bomu sɑ̃́ɑ̃̀ kɛ tú Kuyie.

³Fɔ̃́ɔ̃̀ tɛ̃̀ńnìnko bɛnìtìbɛ̀ kɛtenkɛ̀ bɛ̀ yɛ̀nní kɛ̀ɛ̀ miɛkɛ. Fɔ̃́ɔ̃̀ ɔ̃ɔ̃ bɛ̀ nɑ̀kɛ́ kɛ dɔ̀: Bɛnìtìbɛ̀ díndi wɛ̃tɛnɛ̀ kɛtenkɛ̀.

⁴A borɛ̀, yɛbie ntɛkɔupíítɛ̀ (1000) dò ndiyiè dìmɑ́ɑ̀ ndi, kɛyènkɛ̀ kɛ̀ɛ̀ bo kɛ wennɔ́ɔ, tɛyenkɛ̀nkéétɛ̀.

⁵A ɔ̃ɔ̃ yɛ̀ pɛ̃ɛ̃̀mmu tidɔùntì tɛ̃mɛ̀, tìì ɔ̃ɔ̃ pɛ̃ɛ̃tóo dikṹnweńnì dɛ kó yɛbie nyí cɑ̃́ɑ̃́nnɛ̀ timútì.

⁶Timútì ɔ̃ɔ̃ kótɛ́mu dikṹnweńnì kɛ pórí, kuyuoku kɛ́mɔ́tɛ́ kɛ́kpeí.

⁷A miɛkɛ kɛɛ̀ ti yɛ̀ kɛ̀ ti wɛ̃rímú dèè, ɑ miɛkɛ kɛɛ̀ donnìnko ti kɔ̃m̀bùɔ̀tì.

⁸A wúómmu ti cɑɑ̀rìmɛ̀, ɑ kó kuwenniku mímu ti kó yɛsɔ̀rɛ̀ yɛmɔu.

⁹A miɛkɛ kɛɛ̀ ti yɛ̀ kɑ̀ɑ yɑ̀ɑ̀ri ti we, kòo nìtì ɔ̃ nyóó wei mɛ̀mɑ́ɑ̀ kòo fòmmu pɑ̃̀nkɛ deè.

¹⁰Ti fòmmu kó yɛwe í pɛ̃nkù yɛbie nsipísìyiekɛ̀, bɛkperíbɛ̀ bɛɛ̀ tùɔ̀kù yɛbie nsipísìni, dɛ kó yɛwe miɛkɛ yɛsṹkùyɛ̀ tu mutɔ̃mmú kpɛyɛ nyɛ nɛ̀ tihɔ̀ùtì nɛ̀ mɛsémmɛ̀, mufòmmu pɛ̃nkɛ́mu kɛ̀ ti kérí mukṹṹ mbíɛ́kɛ̀.

¹¹We nyɛ̃́ ɑ miɛkɛ kó kuyonku mɑmɛ̀ kɛ nɑ kɛ́ ndɑ dé? We mbo nɑ kɛ́yĩ́ɛ̃́tɛ́ ɑ miɛkɛ cɔ́ú nkɛ mɑmɛ̀?

¹²Ti bɛnkɛ ti we mɑ̀mɛ̀, kɛ̀ ti nɑ kɛ́mɔɔtɛ mɛyɛ̀mmɛ̀.

¹³Ti Yiɛ̀ nKuyie, dɛ̀ yó nkɑ̃́ɑ̃́kɛ́ dɛ kɑ̀ɑ wɛ̃tɛní ti bíɛ́kɛ̀? Ti kuɔ́ mmɛsémmɛ̀ tínti ɑ kó bɛtɔ̃mbɛ̀.

¹⁴Cṹũnní ɑ kó mɛsɑ̀ɑ̀ mmɛdiɛ̀ pìkɛ dikṹnweńnì, kɛ̀ ti nyɑ̃nku nɛ̀ diwɛ̀ì ti fòmmu mumɔu miɛkɛ.

¹⁵Ti duɔ́ ndiwɛ̀ì kɛ̀ dì mmɑnnɛ̀ ɑ ti dií mmɛ̀ɛ̀ sémmɛ̀. Ti duɔ́ nkuyɛǹnɑɑtí kɛ̀ kù mmɑnnɛ̀ ɑ ti dií nyɛ̀ɛ̀ bie nyifɛi.

¹⁶Yóu tínti ɑ kó bɛtɔ̃mbɛ̀ kɛ̀ ti yɑ̀ ɑ kó tidiɛtì, kɛ̀ ti yɑɑ̀bíi yɑ̀ ɑ kpeńnìmɛ̀.